ປູກຝັງ-ລ້ຽງສັດພາໃຫ້ຄອບຄົວມີລາຍຮັບດີຂື້ນ

  ຄອບຄົວຂອງລຸງໜູພັນ ວໍລະວຸດ ອາຍຸ 68 ປີ ປະຈຸບັນຢູ່ບ້ານ ເມືອງຮໍາ ເມືອງບໍ່ແຕນ ແຂວງໄຊຍະບູລີ ເປັນຄອບຄົວໜຶ່ງທີ່ມີລາຍຮັບໃນການປູກຜັກປອດສານຜິດ, ລ້ຽງສັດ ແລະຂາຍຜົນຜະລິດເຂົ້ານາປີ, ປີໜຶ່ງສ້າງລາຍຮັບເຂົ້າໃນຄອບຄົວບໍ່ຕໍ່ກວ່າ 40 ລ້ານກີບ.

   ລຸງ ໜູພັນ ວໍລະວຸດ ໄດ້ເວົ້າວ່າກ່ອນຈະກ້າວມາເຖິງຈຸດນີ້ໄດ້ໃນເມື່ອກ່ອນຄອບຄົວຂອງລຸງແມ່ນຍຶດຖືອາຊີບເຮັດນາ, ເຮັດສວນຜັກຫຼາຍສະນິດພໍແຕ່ຮັບໃຊ້ບໍລິໂພກຢູ່ພາຍໃນຄອບຄົວເທົ່ານັ້ນ, ຍ້ອນຂາດຄວາມຮູ້ທາງດ້ານເຕັກນິກການປູກ, ການບົວລະບັດຮັກສາໃສ່ຝຸ່ນບວກກັບອຸປະກອນຮັບໃຊ້ປູກຝັງບໍ່ທັນດີຍັງຫຼ້າຫຼັງ, ໃຊ້ແຮງງານຄົນເປັນຫຼັກພ້ອມທັງຕະຫຼາດຮອງຮັບຍັງບໍ່ທັນຫຼາຍ ຊໍ້າບໍ່ໜໍາຄອບຄົວມີເຖິງ 8 ຄົນ ໃນເວລານັ້ນເຮັດໃຫ້ຊີວິດຄອບຄົວກໍ່ມີລາຍໄດ້ ຕໍ່າພໍແຕ່ກຸ້ມຢູ່ກຸ້ມກິນໄປວັນໆເທົ່ານັ້ນ.

  ຍ້ອນມີການຊີ້ນໍາໆພາແນວທາງທີ່ຖືກຕ້ອງສອດຄ່ອງຂອງ ພັກ-ລັດ ການຈັດຕັ້ງໂດຍສະເພາະຫ້ອງການກະສິກໍາ ແລະປ່າໄມ້ເມືອງບໍ່ແຕນໄດ້ສົ່ງພະນັກງານ ລົງປະຈໍາແຕ່ລະເຂດ ແຕ່ລະກຸ່ມບ້ານເພື່ອສ້າງຄວາມຮູ້ຕ່າງໆ ແລະ ເຕັກນິກການປູກການລ້ຽງການບົວລະບັດຮັກສາໃຫ້ພໍ່ແມ່ປະຊາຊົນ. ຈາກນັ້ນຄອບຄົວຂອງລຸງຈຶ່ງໄດ້ເປັນເອກະພາບກັນຊອກຫາທາງອອກຈາກຄອບຄົວພໍ່ແຕ່ກຸ້ມກິນໃຫ້ກາຍເປັນຄອບຄົວທີ່ມີລາຍຮັບທີ່ດີຂຶ້ນ. ໂດຍອາໃສທ່າແຮງເງື່ອນໄຂຕົວຈິງຂອງຕົນໂດຍສະເພາະເນື້ອທີ່ດິນນາ ແລະດິນເປົ່າວ່າງຂອງຕົນຢູ່ແຄມນາມີເນື້ອທີ່ທັງໝົດ 1,2 ເຮັກຕາ, ຍາມເຮັດນາກໍ່ປູກເຂົ້າຍາມກ່ຽວເຂົ້າອອກກໍ່ເຮັດສວນປູກຜັກໃສ່ດິນນາເຊິ່ງເລີ່ມເຮັດສ່ວນປູກຜັກຫຼາຍໆສະນິດທັງລ້ຽງສັດພ້ອມມາແຕ່ປີ 2010 ຈົນເຖິງປະຈຸບັນ, ໃນສວນຂອງລຸງແມ່ນປູກຜັກກະລໍ່າປີ, ຜັກສະລັດ, ຜັກກາດ, ໜາກເຜັດ, ໜາກເຂືອ, ໝາກແຕງ, ໝາກຖົ່ວ, ໝາກເລັ່ນ ແລະ ພືດຜັກອື່ນໆອີກໃນການປູກ 3 ເດືອນ ແມ່ນໄດ້ເກັບຂາຍສະ ເລ່ຍກິໂລລະ 5 ພັນກີບ ເຖິງ 7 ພັນກີບ ຜົນຜະລິດປີໜຶ່ງໄດ້ເຖິງ 5 ໂຕນເປັນເງິນ 25 ລ້ານ ກວ່າກີບຕໍ່ປີໂດຍຈະແມ່ນແມ່ຄ້າພາຍໃນເມືອງ ແລະ ຈາກເມືອງແກ່ນທ້າວມາຮັບຊື້ຢູ່ກັບສ່ວນ.

  ລຸງຍັງໃຫ້ຮູ້ຕື່ມວ່າການລົງທຶນປູກຜັກໃນແຕ່ລະຊຸດ ແລະການບົວລະບັດຮັກສາແມ່ນບໍ່ມີຄວາມຫຍຸ້ງຍາກ, ບໍ່ໄດ້ລົງທຶນຫຼາຍເພາະແນວພັນແມ່ນໄດ້ເລືອກໄວ້ໃນແຕ່ລະຊຸດແຕ່ລະປີ, ສ່ວນຝຸ່ນໃສ່ຜັກແມ່ນນໍາເອົາຂີ້ເປັດ, ຂີ້ໄກ່, ຂີ້ງົວ, ຂີ້ຄວາຍຢູ່ກັບທີ່ໃສ່ຈຶ່ງບໍ່ມີຄວາມກັງວົນ ແລະຫຍຸ້ງຍາກທັງຮັບປະກັນຕໍ່ສຸຂະ ພາບຕື່ມອີກ. ນອກຈາກການປູກຜັກປອດສານຜິດໝູນວຽນເປັນປະຈໍາແລ້ວຄອບຄົວຂອງເພິ່ນຍັງໄດ້ລ້ຽງເປັດ, ໄກ່, ຄວາຍ, ງົວ ຍາມເຮັດນາກໍ່ເຮັດນາ, ຜົນຜະລິດເຂົ້ານາສະເລ່ຍປີໜຶ່ງໄດ້ 20ໂຕນ, ສັງລວມແລ້ວປີໜຶ່ງຄອບຄົວຂອງລຸງສາມາດສ້າງລາຍຮັບຈາກການຂາຍຜັກ, ໄກ່, ເປັດ, ຄວາຍ, ເຂົ້າໄດ້ທັງ ໝົດບໍ່ຫຼຸດ 40 ລ້ານກີບຕໍ່ປີ,ຈາກການດຸໝັ່ນຂະຫຍັນພຽນເອົາຫຼັງສູ້ຟ້າເອົາໜ້າສູ້ດິນກັບຊິວິດຊາວສວນຍາມເຖົ້າແກ່ຢູ່ກັບສ່ວນກັບນາຂອງລຸງຈຶ່ງເຮັດໃຫ້ຄອບຄົວຂອງລຸງກາຍເປັນຄອບຄົວຕົວແບບດ້ານການປູກຝັງລ້ຽງສັດຂອງເມືອງບໍ່ແຕນທັງເປັນສິ່ງຍອມຮັບຂອງສັງຄົມໃນການມາຖອດຖອນບົດຮຽນນໍາລຸງຕື່ມອີກ.

แชร์