ບ້ານຈອມອອງ ແລະບ້ານກິ່ວຈຣຸໄດ້ຮັບເຄື່ອງນຸ່ງ ແລະອຸປະກອນການຮຽນ

 ວັນທີ 3 ມັງກອນ ຜ່ານມາພະນັກງານລັດຖະກອນພາຍໃນພະແນກ ຖວທ ແຂວງອຸດົມໄຊ ນໍາໂດຍທ່ານ ພອນສະຫວັນ ພະທະວິຈິດ ຫົວໜ້າພະແນກ ຖວທ ແຂວງຮ່ວມກັບ ຖວທ ເມືອງໄຊ, ຕາງໜ້າບັນດາບໍລິສັດທີ່ປຶກສາ ແລະບໍລິສັດທີ່ຮັບເໝົາກໍ່ສ້າງເສັ້ນທາງເຂົ້າຫາຖໍ້າຈອມອອງໄດ້ນໍາເອົາເຄື່ອງນຸ່ງ, ອຸປະກອນການຮຽນມອບໃຫ້ກັບປະຊາຊົນ ແລະນັກຮຽນ 2 ບ້ານ ຄື ບ້ານຈອມອອງ ແລະບ້ານກິ່ວຈຣຸ.

  ການຈັດກິດຈະກໍາດັ່ງກ່າວກໍເພື່ອເປັນການຊຸກຍູ້, ຊ່ວຍເຫຼືອປະຊາຊົນ ແລະ ນ້ອງນັກຮຽນຜູ້ທຸກຍາກ, ຂາດເຂີນ, ຜູ້ດ້ອຍໂອກາດໃຫ້ມີກຳລັງໃຈໃນການດໍາລົງຊີວິດ ແລະການສຶກສາຮໍ່າຮຽນ,ມີອຸປະກອນການຮຽນທີ່ຄົບຊຸດ, ມີເຄື່ອງນຸ່ງຫົ່ມທີ່ດີຂຶ້ນໂດຍສະເພາະແມ່ນຊ່ວງລະດູໜາວນີ້, ນອກນັ້ນຍັງເປັນການພົບປະໂອ້ລົມ ແລະ ສ້າງຄວາມເຂົ້າໃຈໃຫ້ແກ່ປະຊາຊົນຕໍ່ກັບວຽກງານການທ່ອງທ່ຽວໂດຍສະເພາະແມ່ນໂຄງການພັດທະນາຖໍ້າຈອມອອງແນໃສ່ເຮັດໃຫ້ປະຊາຊົນມີສ່ວນຮ່ວມ, ມີຜົນໄດ້ຮັບຈາກການບໍລິການໆທ່ອງທ່ຽວລວມທັງການປະກອບສ່ວນເຮັດໃຫ້ໂຄງການພັດທະນາຖໍ້າຈອມອອງດຳເນີນໄປຕາມທິດທາງແຜນການ ແລະສຳເລັດຕາມລະດັບຄາດໝາຍ.

   ສໍາລັບເຄື່ອງທີ່ນໍາໄປມອບໃນຄັ້ງນີ້ປະກອບມີ: ເຄື່ອງນຸ່ງຫົ່ມຈໍານວນ 7 ຖົງ, ປຶ້ມຂຽນ 36 ຕັບ, ບິກ 12 ກັບ, ສໍດຳ 24 ກັບ, ບານສົ່ງ, ກະຕໍ້ຫວາຍ ແລະອື່ນໆ ລວມເປັນມູນຄ່າທັງໝົດ 10 ລ້ານກວ່າກີບ, ຕາງໜ້າມອບໂດຍທ່ານ ພອນສະຫວັນ ພັນທະວິຈິດ ຫົວໜ້າພະແນກ ຖວທ ແຂວງອຸດົມໄຊ ແລະຮັບໂດຍນາຍບ້ານລວມທັງບັນດາຄະນະບ້ານ, ປະຊາຊົນຕະຫຼອດຮອດນ້ອງນັກຮຽນ.

_____________

ໂດຍ: ຄານມະນີ ຮຽນດໍຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์