ຊີບີເອຟ ຟາຣມາ ສະຫຼອງຄົບຮອບ 25 ປີ

  ໃນວັນທີ 3 ກໍລະກົດ 2020 ບໍລິສັດ ຊີບີເອຟ ຟາຣມາ ຈຳກັດ ໄດ້ຈັດພິທີສະເຫຼີມສະຫຼອງວັນສ້າງຕັ້ງບໍລິສັດຊີບີເອຟຄົບຮອບ 25 ປີ ຂຶ້ນຢ່າງເປັນທາງການທີ່ໂຮງ ແຮມຈຳປາສັກແກຣນຊຶ່ງໃຫ້ກຽດເຂົ້າຮ່ວມເປັນປະທານຂອງທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ ກາວ ດຶກ ຖັງ ຮອງເຈົ້າແຂວງໆບິ່ງດິ້ງ ສສ ຫວຽດນາມ, ທ່ານ ດຣ. ຈິນດາ ວົງສຸລິ ອໍານວຍການບໍລິສັດ ຊີບີເອຟ ຟາຣມາ ຈໍາກັດ ພ້ອມບັນດາທ່ານໃນຄະ ນະບໍລິຫານງານຂອງບໍລິສັດ, ຄະນະອຳນວຍການໂຮງງານຜະລິດຢາຊີບີເອຟສາຂານະຄອນຫຼວງ, ແຂວງສະຫວັນນະເຂດ, ຫົວໜ້າຂະແໜງ, ຮອງຂະແໜງ ແລະພະນັກງານວິຊາການຂອງບໍລິສັດຊີບີເອຟ, ບັນດາທ່ານຈາກພະແນກການ, ກົມກອງພາຍໃນແຂວງຈຳປາສັກເຂົ້າຮ່ວມຢ່າງພ້ອມພຽງ.

  ທ່ານ ດຣ. ຈິນດາ ວົງສຸລິ ອຳນວຍ ການບໍລິສັດ ຊີບີເອຟ ຟາຣມາ ຈຳກັດ ກ່າວວ່າ: ບໍລິສັດຊີບີເອຟ ຟາຣມາ ຈຳກັດ ສ້າງຕັ້ງຂຶ້ນໃນວັນທີ 1 ມັງກອນ 1995, ມາ ຮອດມື້ນີ້ກໍ່ອາຍຸຄົບຮອບ 25 ປີ ຊຶ່ງເກີດຂຶ້ນໃນເງື່ອນໄຂທີ່ປະເທດຊາດພວກເຮົາພວມມີນະໂຍບາຍເປີດປະເທດໂດຍຫັນປ່ຽນເສດຖະກິດແບບເກື້ອກູນໄປສູ່ກົນໄກເສດຖະ ກິດຕະຫຼາດຕາມແນວທາງການປ່ຽນແປງໃໝ່ຂອງພັກ,ດ້ວຍສາຍພົວພັນແບບພິເສດລະຫວ່າງສອງຊາດລາວ ແລະຫວຽດນາມ, ເປັນປັດໄຈຕັດສິນໃນການຮ່ວມມືກໍ່ຕັ້ງບໍລິສັດ ຊີບີເອຟ ຟາຣມາ ຈຳກັດ (CBF ຫຍໍ້ມາຈາກ CHAMPASACK-BINHDINH FRIENDSHIP) ເປັນສັນຍາ ລັກແຫ່ງມິດຕະພາບ ແລະ ຄວາມສາມັກຄີຂອງສອງແຂວງແຮກສ່ຽວຈຳປາສັກ-ບິ່ງດິ້ງ.

 ຕະຫຼອດໄລຍະ 25 ປີ ການຜະລິດຢາປົວພະຍາດກໍ່ເຕີບໂຕສະເລ່ຍ 29% ຕໍ່ປີ, ອັດຕາການເຕີບໂຕຂອງບໍລິສັດແມ່ນ 19% ຕໍ່ປີ, ລາຍຮັບ 5 ປີ (2015-2019) ແມ່ນ 300 ຕື້ກວ່າກີບ ເມື່ອທຽບກັບ 5 ປີທຳອິດໃນການກໍ່ຕັ້ງ (1995-1999) ແມ່ນໄດ້ພຽງ 3,8 ຕື້ກີບ, ການມອບລາຍຮັບເຂົ້າງົບປະມານແມ່ນລື່ນຄາດໝາຍແຜນການທຸກໆປີເຊັ່ນ: 5 ປີ (2015-2019) ແມ່ນ 70 ຕື້ກີບ,ຜະລິດຕະພັນຂອງຊີບີເອຟໄດ້ຈຳໜ່າຍ ແລະຄວບຄຸມທຸກຂະແໜງການຂອງໂຮງໝໍ ແລະໄດ້ຈໍລະ ຈອນແຕ່ເໜືອເຖິງໃຕ້, ສະໜອງໃຫ້ກັບບັນດາກອງທຶນໝູນວຽນຢາຂອງໂຮງໝໍຂັ້ນສູນກາງຈົນເຖິງສຸກສາລາຂັ້ນບ້ານຂອງປະເທດເຮົາ, ພ້ອມທັງໄດ້ຮັບຄວາມເຊື່ອໝັ້ນ ແລະຍອມຮັບຈາກບັນດາກອງທຶນສາກົນ, ສາມາດສະໜອງອຸປະກອນການແພດທີ່ທັນສະໄໝ, ນຳໃຊ້ລະບົບ SAP Buniess One ເຂົ້າໃນການຄຸມຄອງການຜະ ລິດຕາມມາດຕະຖານສາກົນ, ບໍລິຫານຈັດການດ້ວຍຄຸນນະພາບຕາມລະບົບ ISO 9001: 2015. ລົງທຶນໃສ່ເຕັກໂນໂລຊີ, ການກໍ່ສ້າງພື້ນຖານໂຄງລ່າງຂອງໂຮງ ງານຜະລິດຢາຊີບີເອຟຊຶ່ງໄດ້ຮັບໃບຢັ້ງຢືນການຜະລິດຢາທີ່ດີ ແລະການປະຕິບັດຫ້ອງທົດລອງທີ່ດີ.

  ນອກຈາກນີ້ໃນພິທີຍັງໄດ້ມີການປະດັບຫຼຽນໄຊແຮງງານ, ຫຼຽນກາ ແລະ ມອບໃບຍ້ອງຍໍໃຫ້ພະນັກງານບໍລິສັດຊີບີເອຟ ຟາຣມາ ຈຳກັດ ແລະພະນັກງານບໍລິສັດການຢາອຸປະກອນການແພດແຂວງບິ່ງດິ້ງ ສສ ຫວຽດນາມ ທີ່ປະກອບສ່ວນໃນການພັດທະນາບໍລິສັດຊີບີເອຟໃນ 5 ປີຜ່ານມາ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງບໍລິສັດຄົບຮອບ 25 ປີ, ໃນນັ້ນ ໄດ້ມອບຫຼຽນໄຊແຮງງານຊັ້ນ I ມີ 3 ທ່ານ, ຫຼຽນໄຊແຮງ ງານຊັ້ນ II ມີ 2 ທ່ານ, ຫຼຽນໄຊແຮງ ງານຊັ້ນ III ມີ 4 ທ່ານ, ມອບຫຼຽນກາແຮງງານຈຳນວນ 8 ທ່ານ,ມອບຫຼຽນກາມິດຕະພາບຈຳນວນ 7 ທ່ານ,ມອບໃບຍ້ອງຍໍລັດຖະບານມີ 36 ທ່ານ,ມອບໃບຍ້ອງຍໍເຈົ້າແຂວງຈຳປາສັກ 45ທ່ານ.

___________

ຂຽນໂດຍ: ໂພທິຣາຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์