ສ້າງໜ່ວຍພັກ ທນບ ໜ່ວຍບໍລິການເມືອງສັງທອງ

 ເມື່ອບໍ່ດົນມານີ້ຄະນະປະຈຳພັກ ເມືອງສັງທອງ ນະຄອນຫຼວງວຽງຈັນ ໄດ້ປະກາດສ້າງຕັ້ງໜ່ວຍພັກທະນາຄານນະໂຍບາຍ (ທນບ) ໜ່ວຍບໍລິການເມືອງສັງທອງຢ່າງເປັນທາງການໂດຍການໃຫ້ກຽດເຂົ້າຮ່ວມຂອງສະຫາຍນາງ ແກ້ວ ພົມມະລາດ ຮອງເລຂາພັກເມືອງ-ຮອງເຈົ້າເມືອງ,ປະທານຄະນະກຳມະການຄຸ້ມຄອງສິນເຊື່ອ ທນບ ຂັ້ນເມືອງ ແລະມີບັນດາຜູ້ຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມ.

 ໜ່ວຍພັກ ທນບ ໜ່ວຍບໍລິການເມືອງສັງທອງຮັບການສ້າງຕັ້ງຂຶ້ນຕາມມະຕິຕົກລົງຂອງຄະນະປະຈຳພັກເມືອງສັງທອງເລກທີ 255/ຄພ.ສທ, ລົງວັນທີ 20 ທັນວາ 2019 ວ່າດ້ວຍການອະນຸມັດແຍກໜ່ວຍພັກຫ້ອງການ-ການເງິນເມືອງ ອອກເປັນ2 ໜ່ວຍພັກຄື: ໜ່ວຍພັກຫ້ອງການ-ການເງິນເມືອງ ແລະ ໜ່ວຍພັກ ທນບ ໜ່ວຍບໍລິການເມືອງສັງທອງ ແລະມະຕິຕົກລົງຂອງຄະນະປະຈຳພັກ ເມືອງສັງທອງ ເລກທີ 256/ຄພ.ສທ ວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກ, ຮອງເລຂາ ແລະຄະນະໜ່ວຍພັກ ທນບ ໜ່ວຍບໍລິການເມືອງສັງທອງ ໂດຍເຫັນດີບົ່ງຕົວແຕ່ງຕັ້ງ ສະຫາຍ ປັນຍາສະໄຫວ ຣັດຖະເສນາ ເປັນເລຂາໜ່ວຍພັກ ແລະສະຫາຍ ນາງ ເດືອນ ວິໄລຫົງ ເປັນຮອງເລຂາ ແລະຜູ້ກວດກາໜ່ວຍພັກ.

 ປະຈຸບັນມີພະນັກງານທັງໝົດ 10 ຄົນ; ມີສະມາຊິກພັກກວມເຄິ່ງໜຶ່ງຂອງພະນັກງານຊຶ່ງໃນຜ່ານມາສະພາບລວມຂອງສະມາຊິກພັກ-ພະນັກງານຍັງມີແນວຄິດອຸ່ນອຽນ,ທຸ່ນທ່ຽງ ແລະເຊື່ອໝັ້ນແນວທາງຂອງພັກ, ນະໂຍບາຍຂອງລັດ, ການຊີ້ນໍາ-ນໍາຂອງຄະນະພັກຄະນະອຳນວຍການ, ມີສະຕິເຄົາລົບລະບຽບ ແລະກົດໝາຍຂອງລັດ; ປະຕິບັດບັນດາມະຕິ, ຄໍາສັ່ງຂອງຂັ້ນ ເທິງວາງອອກຢ່າງເຂັ້ມງວດ; ຈັດຕັ້ງ ເຜີຍແຜ່ເອກະສານທີ່ສຳຄັນຂອງຂັ້ນ ເທິງເປັນຕົ້ນຂໍ້ຫ້າມຂອງສະມາຊິກພັກ, ຂໍ້ຫ້າມຂອງພະນັກງານທະນາຄານນະໂຍບາຍ, ກົດໝາຍວ່າດ້ວຍການສໍ້ລາດບັງຫຼວງ, ນໍາພາຮ່ວມຊີວິດປະຈໍາອາທິດ, ເດືອນ ແລະງວດເປັນປົກກະຕິ, ຜ່ານພຶດຕິກໍາດັ່ງກ່າວ ເຮັດໃຫ້ສະມາຊິກພັກ -ພະນັກງານມີຄວາມສະຫງົບດ້ານແນວຄິດ, ມີຄວາມສາມັກຄີ ແລະ ຄວາມເປັນເອກະພາບພາຍໃນສູງສາມາດຕີຖອຍສະກັດກັ້ນບັນຫາປາກົດ ການຫຍໍ້ທໍ້ໃນຖັນແຖວສະມາຊິກພັກ-ພະນັກງານໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍ.

ດ້ານວິຊາສະເພາະປີ 2019 ໄດ້ຮັບອະນຸມັດແຫຼ່ງທຶນຈາກ ທນບ ສໍານັກງານໃຫຍ່ທັງໝົດ 5,38 ຕື້ກີບ ແລະໄດ້ປ່ອຍເງິນກູ້ທັງໝົດ 4,10 ຕື້ກີບ, ກວມ 14 ບ້ານ, 89 ກຸ່ມ, 655 ຄອບຄົວ, ໄລຍະສັ້ນ 2,28 ຕື້ກີບ, ໄລຍະຍາວ 1,5 ຕື້ກີບ ໃນນີ້ເມືອງເປົ້າໝາຍ 1,31 ຕື້ກີບ, ຈຸດສຸມ 1,26 ຕື້ກີບ, ບ້ານ 3 ສ້າງ 1,52 ຕື້ກີບ.

   ໃນໂອກາດດັ່ງກ່າວ, ສະຫາຍຮອງເລຂາພັກເມືອງສັງທອງ ໄດ້ເນັ້ນໃຫ້ບັນດາສະຫາຍຄະນະໜ່ວຍ ແລະ ສະມາຊິກພັກຈົ່ງພ້ອມກັນຈັດຕັ້ງປະຕິບັດທາງດ້ານການເມືອງແນວຄິດ; ການຈັດ ຕັ້ງ, ແບບແຜນວິທີນໍາພາ; ເສີມຂະ ຫຍາຍມູນເຊື້ອສາມັກຄີ, ຄວາມເປັນແບບ ຢ່າງໃນການນໍາພາ ແລະຄວາມຮັບຜິດຊອບອັນສູງສົ່ງເຂົ້າໃນການຈັດຕັ້ງ ປະຕິບັດແນວທາງນະໂຍບາຍຂອງພັກ ແລະລັດ ໂດຍສະເພາະແມ່ນມະຕິ, ທິດ ທາງຂອງອົງຄະນະພັກ-ອົງການປົກຄອງນະຄອນຫຼວງວຽງຈັນກໍ່ຄືເມືອງສັງທອງແລະແຜນການຂອງຄະນະອໍານວຍການ ທນບ ວາງອອກໃຫ້ປະກົດຜົນເປັນຈິງ;ພ້ອມນັ້ນ,ກໍ່ເຂົ້າຮ່ວມການຈັດຕັ້ງປະຕິບັດຕາມທິດຂອງເຈົ້າຄອງນະຄອນຫຼວງ ວຽງຈັນ ກ່ຽວກັບ “ 3 ຫຼຸດ-3 ເພີ່ມ ”, “6 ສ ” ແລະ “ 5 ຮ່ວມ” ໃຫ້ໄດ້ຮັບຜົນດີ.

______________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์