ລັດຈະຄຸ້ມຄອງຮັດກຸມຂຶ້ນສໍາລັບທຸລະກິດພາຫະນະທາງບົກໃນລາວ

  ເພື່ອເປັນການຜັນຂະຫຍາຍ ແລະຈັດຕັ້ງປະຕິບັດໃຫ້ໄດ້ປະສິດທິພາບ ແລະປະສິດທິຜົນໃນການຕິດຕາມກວດກາການດໍາເນີນທຸລະກິດຍານພາຫະນະທາງບົກຢູ່ ສປປ ລາວ ໃຫ້ຖືກຕ້ອງ,ສອດຄ່ອງກັບກົດໝາຍ ແລະລະບຽບການແນໃສ່ປົກປ້ອງສິດ ແລະຜົນປະໂຫຍດຂອງຜູ້ດໍາເນີນທຸລະກິດ, ຜູ້ຊົມໃຊ້ ແລະ ຜົນປະໂຫຍດຂອງລັດເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດດັ່ງນັ້ນລັດຖະບານ ແຫ່ງ ສປປ ລາວ ຈຶ່ງໄດ້ອອກດໍາລັດວ່າດ້ວຍການຄຸ້ມຄອງທຸລະກິດຍານພາຫະນະທາງບົກເລກທີ 470/ລບ, ລົງວັນທີ 27 ທັນວາ 2019.

  ຕາມຂໍ້ມູນຈາກສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ເປີດເຜີຍໃຫ້ຮູ້ວ່າ: ການອອກດຳລັດດັ່ງກ່າວກໍເພື່ອກຳນົດຫຼັກການລະບຽບການ ແລະມາດຕະການກ່ຽວກັບການຄຸ້ມຄອງ, ຕິດຕາມ ແລະກວດກາການດໍາເນີນທຸລະກິດຍານພາຫະນະທາງບົກຢູ່ ສປປ ລາວ ໃຫ້ເປັນລະບົບສາມາດຄອບຄຸມໄດ້ໂດຍກໍານົດບັນດາຫຼັກການ ແລະມາດຕະການທີ່ຮັບປະກັບຜົນປະໂຫຍດຂອງພາກທຸລະກິດ, ພາກລັດ ແລະ ຜູ້ຊົມໃຊ້.

   ການແຈ້ງຂຶ້ນທະບຽນວິສາຫະກິດຂອງທຸລະກິດການນໍາເຂົ້າ, ສົ່ງອອກ, ຜະລິດ, ແລະປະກອບພາຫະນະທາງບົກແມ່ນສໍາລັບບຸກຄົນ, ນິຕິບຸກຄົນທັງພາຍໃນ ແລະຕ່າງປະເທດທີ່ມີຈຸດປະສົງດໍາເນີນທຸລະກິດດັ່ງກ່າວຕ້ອງແຈ້ງຂຶ້ນທະບຽນວິສາຫະກິດຕາມກົດ ໝາຍວ່າດ້ວຍວິສາຫະກິດ ແລະລະບຽບການອື່ນທີ່ກ່ຽວຂ້ອງ.

    ປະເພດທຸລະກິດຍານພາຫະນະທາງບົກແມ່ນມີ 3 ປະເພດຄື: ທຳອິດແມ່ນທຸລະກິດການນໍາເຂົ້າ ແລະ ສົ່ງອອກຍານພາຫະນະທາງບົກແມ່ນການດໍາເນີນທຸລະກິດກ່ຽວ ກັບການນໍາເຂົ້າຍານພາຫະນະທາງບົກເພື່ອຂາຍຍົກໃຫ້ຜູ້ດໍາເນີນທຸລະກິດການຈໍາໜ່າຍຍານພາຫະນະທາງບົກ, ສົ່ງອອກຕໍ່, ເປັນຕົວແທນ ຫຼືຊື້ຍານພາຫະນະທາງບົກຈາກຜູ້ຜະລິດ, ປະກອບຍານພາຫະນະທາງບົກຢູ່ ສປປ ລາວ ເພື່ອຈໍາໜ່າຍຢູ່ພາຍໃນ ຫຼືສົ່ງອອກໄປຕ່າງປະເທດ.

  ການປະກອບເອກະສານຂໍອະນຸຍາດດໍາເນີນທຸລະກິດການນໍາເຂົ້າ ແລະສົ່ງອອກຍານພາຫະນະທາງບົກແມ່ນຕ້ອງປະຕິບັດຕາມລະບຽບທີ່ກະຊວງອຸດສາຫະກໍາ ແລະການຄ້າປະກອບມີ 1) ໃບຄໍາຮ້ອງຂໍອະນຸຍາດດໍາເນີນທຸລະກິດ; 2) ເອກະສານການມອບສິດໃຫ້ເປັນຜູ້ນໍາເຂົ້າຍານພາຫະນະຈາກບໍລິສັດແມ່ຫຼື ສາຂາທີ່ໄດ້ຮັບມອບສິດຈາກບໍລິສັດແມ່; 3) ໃບທະບຽນວິສາຫະກິດ; 4) ໜັງສືແນະນໍາການຂໍອະນຸຍາດດໍາເນີນທຸລະກິດທີ່ອອກໂດຍພາກສ່ວນອອກໃບທະບຽນວິສາຫະກິດ.

  ທຶນຈົດທະບຽນຂອງວິສາຫະກິດດັ່ງກ່າວແມ່ນມີ 4 ຕື້ກີບ ຂຶ້ນໄປສໍາລັບຍານພາຫະນະທາງບົກທີ່ມີ 2 ຫຼື 3 ລໍ້ ແລະ 50 ຕື້ກີບ ຂຶ້ນໄປສໍາລັບຍານພາຫະນະທາງບົກທີ່ມີສີ່ລໍ້ຂຶ້ນໄປ.

  ຕໍ່ມາແມ່ນທຸລະກິດການຈໍາໜ່າຍຍານພາຫະນະທາງບົກແມ່ນການດໍາເນີນ ທຸລະກິດກ່ຽວກັບການຂາຍຍົກ, ຂາຍຍ່ອຍຍານພາຫະນະທາງບົກໃໝ່ ແລະ ຫຼື ຍານ ພາຫະນະທາງບົກທີ່ໃຊ້ແລ້ວທີ່ສາມາດຂາຍ ຫຼືເປັນຕົວແທນຈໍາໜ່າຍຍານພາຫະນະທາງບົກຍີ່ຫໍ້ໃດໜຶ່ງ ຫຼືຫຼາຍຍີ່ຫໍ້ຊຶ່ງບໍ່ສາມາດນໍາເຂົ້າ ແລະສົ່ງອອກໄດ້.

 ການປະກອບເອກະສານຂໍອະນຸຍາດດໍາເນີນກິດຈະການການຈໍາໜ່າຍພາຫະນະທາງບົກແມ່ນຕ້ອງປະຕິບັດຕາມລະບຽບທີ່ກະຊວງອຸດສາຫະກໍາ ແລະການຄ້າປະກອບມີ 1) ໃບຄໍາຮ້ອງຂໍອະນຸຍາດດໍາເນີນທຸລະກິດ; 2) ໃບອະນຸຍາດ ປຸກສ້າງສະຖານທີ່ວ່າງຈໍາໜ່າຍຍານພາຫະນະທາງບົກ; 3) ໃບທະບຽນວິ ສາຫະກິດ; 4) ໜັງສືແນະນໍາການຂໍອະນຸຍາດດໍາເນີນທຸລະກິດທີ່ອອກໂດຍພາກສ່ວນອອກໃບທະບຽນວິສາຫະກິດ.

 ສຸດທ້າຍແມ່ນທຸລະກິດການຜະລິດ ຫຼືການປະກອບຍານພາຫະນະທາງບົກຊຶ່ງແມ່ນການດໍາເນີນທຸລະກິດກ່ຽວກັບການຜະລິດ ຫຼືປະກອບ ຫຼືທັງຜະລິດ ແລະປະກອບຍານພາຫະນະທາງບົກໂດຍຜະລິດ,ນໍາເຂົ້າ ຫຼືຊື້ຊິ້ນສ່ວນຈາກຜູ້ຜະລິດຢູ່ພາຍໃນຈໍານວນໜຶ່ງ ຫຼືທັງໝົດເພື່ອປະກອບເປັນຍານພາຫະນະທາງບົກສົມບູນແລ້ວຈໍາໜ່າຍຢູ່ພາຍໃນ ຫຼື ສົ່ງອອກຕ່າງປະເທດ.

  ຜູ້ຜະລິດ ຫຼື ຜູ້ປະກອບຍານພາຫະນະທາງບົກຕ້ອງມີແຜນການເຄື່ອນໄຫວປະຈໍາປີໂດຍມີການຢັ້ງຢືນຈາກຂະແໜງການອຸດສາຫະກໍາ ແລະການຄ້າ, ກະຊວງອຸດສາຫະກໍາ ແລະການຄ້າ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์