ຖໍ້າຜາຫວາຍ ສະຖານທີ່ທ່ອງທ່ຽວເມືອງພຽງ

   ຖໍ້າຜາຫວາຍ ຖືເປັນອີກສະຖານທີ່ທ່ອງທ່ຽວທາງທໍາມະຊາດທີ່ສວຍງາມອີກແຫ່ງໜຶ່ງຂອງເມືອງພຽງ ທັງນີ້ກໍເນື່ອງຈາກວ່າຍັງຄົງມີຄວາມອຸດົມສົມບູນແບບທຳມະ ຊາດເປັນຢ່າງດີ, ບໍ່ວ່າຈະເປັນພູຜາປ່າໄມ້, ຫ້ວຍນໍ້າລຳທານ ແລະໂງ່ນຫີນທີ່ຢູ່ຕາມຕາດກໍຍັງຄົງມີສະພາບເດີມໂດຍບໍ່ໄດ້ມີການດັດສ້າງ ຫຼື ຕົບແຕ່ງແຕ່ຢ່າງໃດເວົ້າໄດ້ວ່າ:“ຍັງງົດງາມດ້ວຍທຳມະຊາດໂດຍແທ້” ຊຶ່ງກາຍເປັນມົນສະເໜ່ດຶງດູດຈິດໃຈຜູ້ທີ່ໄດ້ພົບເຫັນໃຫ້ຄິດຮອດຈົນຍາກທີ່ຈະລືມ, ຖໍ້າທີ່ວ່າຕັ້ງຢູ່ບ້ານສົມສະຫວາດຫ່າງ ຈາກຕົວເມືອງພຽງໄປທາງທິດໃຕ້ປະມານ 68 ກິໂລແມັດ, ການເຂົ້າເຖິງໂດຍເສັ້ນທາງລົດ ແລະສາມາດໄປໄດ້ທັງສອງລະດູ.

 ໃນເມື່ອກ່ອນຖໍ້າຜາຫວາຍມີຊື່ວ່າ: ຖໍ້າພະຫຼາຍຕາມການບອກເລົ່າຕໍ່ໆກັນມາວ່າເປັນເຂດປ່າທີ່ຕຶບໜາທີ່ຜູ້ຄົນເອີ້ນເປັນເຂດຜີບໍ່ລ່ອງຄົນບໍ່ທຽວ, ພາຍໃນຖໍ້າມີພະພຸດ ທະຮູບທີ່ຫຼາກຫຼາຍຍາມໜາວຝາຜະໜັງຖໍ້າຈະເປັນຮູບເງົາ ເຫຼື້ອມຄືສີເງິນ,ຫຼັງຈາກປີ 1988 ຖໍ້າໄດ້ຖືກທຳລາຍເຮັດໃຫ້ຖໍ້າມີ ໂຄງສ້າງລັກສະນະທີ່ແຕກຕ່າງຈາກເດີມ,ຈົນມາເຖິງປີ 1995-1996 ມີການບຸກເບີກເສັ້ນທາງຫຼວງ ແລະເປັນການຮູ້ຈັກຖໍ້າຫຼາຍຂຶ້ນໃນນາມ “ຖໍ້າຜາຫວາຍ” ເພາະເອີ້ນຊື່ຕາມສະພາບແວດລ້ອມ ອ້ອມຂ້າງເຫດຜົນຍ້ອນມີຕົ້ນຫວາຍຫຼາຍຊະນິດລາຍລ້ອມອ້ອມອອກຕາມຜາ ແລະໃນຕົວຖໍ້າກໍ່ບໍ່ພົບພະພຸດທະຮູບຈຶ່ງເອີ້ນວ່າ: ຖໍ້າຜາຫວາຍຈົນເຖິງທຸກວັນນີ້.

  ໃນແຂວງໄຊຍະບູລີ ກໍ່ຍັງມີຫຼາຍສະຖານທີ່ໆຍັງບໍ່ທັນໄດ້ນໍາສະເໜີຕໍ່ສາຍຕາຂອງຜູ້ອ່ານ, ໄຊຍະບູລີເປັນແຂວງທີ່ອຸດົມສົມບູນໄປດ້ວຍຊັບໃນດິນສິນໃນນໍ້າ, ມີແຫຼ່ງທ່ອງ ທ່ຽວທີ່ໜ້າສົນໃຈຫຼາຍແຫ່ງສະນັ້ນ,ເພື່ອຮອງຮັບນັກທ່ອງທ່ຽວ, ພາຍໃນແຂວງກໍ່ໄດ້ມີການຈັດສັນ ແລະປັບປຸງສະຖານທີ່ທ່ອງທ່ຽວຕ່າງໆ ເປັນຕົ້ນແມ່ນເສັ້ນທາງເຂົ້າຫາແຫຼ່ງທ່ອງທ່ຽວ, ຮ່ອງນໍ້າ, ລະບົບໄຟຟ້າ, ລະບົບຫ້ອງນໍ້າສາທາລະນະ, ເດີ່ນຈອດລົດສະຖານທີ່ການສະແດງ ແລະອື່ນໆ ເພື່ອຍົກສູງຄຸນນະພາບການບໍລິການໃຫ້ນັບມື້ສູງຂຶ້ນ.

___________

ຂຽນໂດຍ: ວົງມະນີ

แชร์