ນວ ຈະສູ້ຊົນຜະລິດເຂົ້າໃຫ້ໄດ້ 68 ພັນເຮັກຕາ

  ການຜະລິດເຂົ້າໃນປີນີ້ນະຄອນຫຼວງວຽງຈັນ (ນວ) ຈະສູ້ຊົນໃຫ້ໄດ້ 68 ພັນກວ່າເຮັກຕາໃນນີ້ເນື້ອທີ່ປູກເຂົ້ານາແຊງ 14.300 ເຮັກຕາ, ຄາດຄະເນຜະລິດສະມັດ ຕະພາບສະເລ່ຍ 4,68 ໂຕນຕໍ່ເຮັກຕາ ແລະຄາດວ່າຜົນຜະລິດລວມຈະໄດ້ປະມານ 319.400 ໂຕນ.

  ອີງຕາມຂໍ້ມູນຈາກນະຄອນຫຼວງວຽງຈັນ ໃຫ້ຮູ້ວ່າ: ການຜະລິດເຂົ້າໃນປີ 2020 ນີ້ ນະຄອນຫຼວງວຽງຈັນ ຈະສູ້ຊົນໃຫ້ບັນລຸ 68.273 ເຮັກຕາ (ເນື້ອທີ່ປູກເຂົ້ານາແຊງ 14.300 ເຮັກຕາ), ຄາດຄະເນຜະລິດສະມັດຕະພາບສະເລ່ຍ 4,68 ໂຕນຕໍ່ເຮັກຕາ ແລະ ຜົນຜະລິດລວມ 319.400 ໂຕນ; ສ່ວນການປູກພືດຜັກຈະສູ້ຊົນປູກໃຫ້ໄດ້ໃນເນື້ອທີ່ 11.068 ເຮັກຕາ (ເນື້ອທີ່ປູກພືດລະດູແລ້ງ 1.350 ເຮັກຕາ),ຄາດຄະເນຜະລິດສະເລ່ຍ 10,27 ໂຕນຕໍ່ເຮັກຕາຜົນຜະລິດ 113.700 ໂຕນໃນນີ້ການປູກໄມ້ກິນໝາກໃນລະດູຝົນໃຫ້ໄດ້ 1.500 ເຮັກຕາ, ຄາດຄະເນຜົນຜະລິດ 27.500 ໂຕນ ແລະ ເນື້ອທີ່ການປູກສາລີເປັນສິນຄ້າ 1.000 ເຮັກຕາ ຄາດ ຄະເນຜົນຜະລິດລວມ 4.700 ໂຕນ ໂດຍເນັ້ນໃສ່ 5 ເມືອງນອກຄື: ເມືອງໄຊທານີ, ນາຊາຍທອງ, ຫາດຊາຍຟອງ, ປາກງື່ມ ແລະເມືອງສັງທອງ.

  ນອກຈາກນັ້ນການສະໜອງຊີ້ນໝູນະຄອນຫຼວງວຽງຈັນ ຈະຊຸກຍູ້ໃຫ້ຊາວກະສິກອນໂດຍສະເພາະບັນດາຟາມລ້ຽງໝູໃຫ້ໄດ້ຂຶ້ນທະບຽນຟາມສັດຂະຫຍາຍພັນໝູທີ່ມີສາຍເລືອດລູກປະສົມພັນດີພໍ່ແມ່ລຸ້ນ1 (F1) ແລະລຸ້ນ 2 (F2) ຢູ່ເມືອງນາຊາຍທອງ,ໄຊທານີ ແລະ ເມືອງປາກງື່ມ ໃຫ້ມີໝູຊີ້ນອອກຈຳໜ່າຍບໍ່ຫຼຸດ 3,40 ແສນຫາ 3,50 ແສນໂຕ ແລະຜະລິດໝູນ້ອຍໃຫ້ໄດ້ 18 ພັນໂຕ.

  ທັງນີ້ກໍເພື່ອຮັບປະກັນທາງດ້ານສະບຽງອາຫານ ແລະການຜະລິດເປັນສິນຄ້າຊຶ່ງລັດຖະບານໄດ້ສ້າງຍຸດທະສາດການພັດທະນາກະສິກຳໂດຍແນໃສ່ສົ່ງເສີມສິນຄ້າກະສິ ກຳ ແລະມີນະໂຍບາຍສຳລັບການຜະລິດເປັນສິນຄ້າເພື່ອຕອບການສະໜອງຄວາມຕ້ອງການສິນຄ້າທີ່ເໝາະສົມໃຫ້ແກ່ຕະຫຼາດພາຍໃນ ແລ ະຕ່າງປະເທດ. ເນື່ອງຈາກປະເທດລາວໄດ້ເຂົ້າເປັນສະມາຄົມເສດຖະກິດອາຊຽນໃນປີ 2015, ຊຶ່ງຄວາມປອດໄພດ້ານສະບຽງອາຫານ, ຄຸນນະພາບຂອງອາຫານ, ຄວາມໝັ້ນຄົງດ້ານສະບຽງອາ ຫານ ແລະໂພຊະນາການແມ່ນຂົງເຂດບູລິມະສິດຂອງລັດຖະບານແຫ່ງ ສປປ ລາວ. ດັ່ງນັ້ນເພື່ອເຮັດໃຫ້ການຜະລິດບັນລຸເປົ້າໝາຍທີ່ວາງໄວ້ນະຄອນຫຼວງວຽງຈັນຈະຕ້ອງໄດ້ຮ່ວມມືກັບຫຼາຍພາກສ່ວນທັງພາກລັດ, ເອກະຊົນ ແລະຄູ່ຮ່ວມພັດທະນາເພື່ອປັບປຸງຄວາມອາດສາມາດໃນການຜະລິດ. 

------------

 ພາບ ແລະຂ່າວຈາກ: ໜັງສືພິມເສດຖະກີດ-ສັງຄົມ

แชร์