ປກສ ໄຊຍະຈັດພິທີປະກາດການເລື່ອນຊັ້ນ

  ວັນທີ 30 ທັນວາ 2019 ນີ້ກອງບັນຊາການ ປກສ ແຂວງໄຊຍະບູລີ ໄດ້ຈັດພິທີປະກາດການເລື່ອນຊັ້ນຢ່າງສົມກຽດໃຫ້ນາຍ ແລະພົນຕຳຫຼວດຜູ້ທີ່ມີຜົນງານດີເດັ່ນ ແລະ ຮອດກຳນົດການເລື່ອນຊັ້ນຢູ່ທີ່ສະໂມສອນກອງບັນຊາການ ປກສ ແຂວງໂດຍການໃຫ້ກຽດເຂົ້າຮ່ວມຂອງ ທ່ານ ພັອ ບຸນຫຼ້າ ສຸລິຍາ ຮອງຫົວໜ້າກອງບັນຊາການ ປກສ ແຂວງໄຊຍະບູລີ, ມີບັນດາສະຫາຍຄະນະພັກ-ຄະນະບັນຊາ,ແຂກຖີກເຊີນ, ພະນັກງານຫຼັກແຫຼ່ງພ້ອມດ້ວຍພະນັກງານ-ນັກຮົບເຂົ້າຮ່ວມ.

   ທ່ານ ພັທ ຄຳສິນ ຜິວວັນນາ ຫົວໜ້າຫ້ອງການເມືອງໄດ້ຜ່ານຂໍ້ຕົກລົງຂອງຫົວໜ້າກົມໃຫຍ່ການເມືອງກະຊວງປ້ອງກັນຄວາມສະຫງົບເລກທີ 4308/ ກມປສສ ລົງວັນທີ 17 ທັນວາ 2019, ວ່າດ້ວຍການເລື່ອນຊັ້ນໃຫ້ນາຍຕຳຫຼວດທີ່ຂຶ້ນກັບກອງບັນຊາການ ປກສ ແຂວງໄຊຍະບູລີ ແລະ ຂໍ້ຕົກລົງຂອງຫົວໜ້າກອງບັນຊາການ ປກສ ແຂວງໄຊຍະບູລີ ສະບັບເລກທີ 7197/ປຊຍ ລົງວັນທີ 27 ທັນວາ 2019 ວ່າດ້ວຍການເລື່ອນຊັ້ນໃຫ້ພົນຕໍາຫຼວດໃນກຳລັງປ້ອງກັນຄວາມສະຫງົບ ແຂວງໄຊຍະບູລີ ຊຶ່ງມີຜູ້ໄດ້ຮັບການຍ້ອງຍໍເລື່ອນຊັ້ນທັງໝົດ 46 ສະຫາຍ ໃນນີ້ເລື່ອນ ຮຕ ຂຶ້ນເປັນ ຮທ 24 ສະຫາຍ, ຊັ້ນວາທີຮ້ອຍຕີຂຶ້ນ ເປັນຊັ້ນຮຕ 02 ສະຫາຍ, ສອ ຂຶ້ນເປັນຊັ້ນວາທີຮ້ອຍຕີ 12 ສະຫາຍ, ສທ ຂຶ້ນ ເປັນຊັ້ນ ສອ 7 ສະຫາຍ, ສຕ ຂຶ້ນ ສທ 1 ສະຫາຍໂອກາດນີ້ທ່ານ ພັອ ບຸນຫຼ້າ ສຸລິຍາ ຮອງຫົວໜ້າກອງບັນຊາການ ປກສ ແຂວງໄຊຍະບູລີ ໄດ້ໃຫ້ກຽດປະດັບຊັ້ນຢ່າງສົມກຽດໃຫ້ນາຍ ແລະພົນຕຳຫຼວດທີ່ໄດ້ຮັບການເລື່ອນຊັ້ນ.

------- 

 ຫຼັງຈາກນັ້ນທ່ານ ພັອ ບຸນຫຼ້າ ສຸລິຍາ ກໍໄດ້ໃຫ້ກຽດໂອ້ລົມຕໍ່ພິທີກ່ອນອື່ນໄດ້ສະແດງຄວາມຍ້ອງຍໍຊົມເຊີຍຕໍ່ບັນດາສະຫາຍນາຍ ແລະພົນຕຳຫຼວດທີ່ໄດ້ຮັບການຍ້ອງຍໍເລື່ອນຊັ້ນໃນຄັ້ງນີ້ຊຶ່ງເປັນການປະຕິບັດຕາມແນວທາງນະໂຍບາຍຂອງພັກ-ລັດ ທີ່ມີຕໍ່ບັນດາສະຫາຍນາຍ ແລະພົນຕຳຫຼວດທີ່ມີຜົນງານດີເດັ່ນ,ໄດ້ຮັບຄວາມໄວ້ເນື້ອເຊື່ອ ໃຈຈາກການຈັດຕັ້ງພັກ-ລັດ, ມີຜົນສໍາເລັດໃນໜ້າທີ່ວຽກງານພ້ອມທັງຮຽກຮ້ອງບັນດາສະຫາຍຈົ່ງສືບຕໍ່ຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້, ຄວາມສາມາດ, ຍົກສູງສະຕິລະວັງຕົວຕໍ່ກົນອຸບາຍຂອງສັດຕູ ແລະ ກຸ່ມຄົນບໍ່ດີ, ເອົາໃຈໃສ່ສຶກສາອົບຮົມການເມືອງ-ແນວຄິດ,ເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ, ເພີ່ມທະວີຍົກສູງຄວາມຮັບຜິດຊອບຕໍ່ໜ້າທີ່ວຽກງານທີ່ການຈັດຕັ້ງມອບໝາຍ ແລະສ້າງຜົນງານໃໝ່ຍິ່ງໃຫຍ່ກວ່າເກົ່າ.

____________

ຂຽນໂດຍ: ກອງແກ້ວ ຈັນທະລັງສີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์