ຊາວເຜົ່າມົ້ງ ຫຼວງພະບາງຈັດງານບຸນນໍເປເຈົ່າ

  ຊົນເຜົ່າມົ້ງແມ່ນຊົນເຜົ່າໜຶ່ງໃນບັນດາ 3 ຊົນເຜົ່າໃຫຍ່ໃນວົງຄະນະຍາດຂອງລາວເຮົາ, ເປັນຊົນເຜົ່າໜຶ່ງທີ່ມີຄວາມດຸໝັ່ນຂະຫຍັນພຽນ, ມີພາສາຂຽນ, ການປາກ ເວົ້າປະເພນີທີ່ເປັນເອກະລັກ ແລະມີມູນເຊື້ອອັນພິລະອາດຫານໃນການຕໍ່ສູ້ປົດປ່ອຍຊາດ, ມີນໍ້າໃຈສູງສົ່ງຮັກຊາດຮັກບ້ານເກີດເມືອງນອນພາຍໃຕ້ແສງສະຫວ່າງອັນສະ ຫຼາດສ່ອງໃສ່ຂອງພັກ-ລັດ, ຊຶ່ງໃນວັນທີ 30 ທັນວາ ຜ່ານມາທີ່ບ້ານຜານົມນະຄອນຫຼວງພະບາງໄດ້ມີງານສະເຫຼີມສະຫຼອງບຸນປະເພນີນໍເປ້ເຈົ່າກິນຈຽງຂອງຊາວເຜົ່າມົ້ງປະຈໍາປີ 2019 ໂດຍມີ ທ່ານ ສາຍສະໜອນ ຄົມທະວົງ ຮອງເລຂາພັກແຂວງ, ທ່ານ ວົງສະຫວັນ ເທບພະຈັນ ຮອງເຈົ້າແຂວງໆຫຼວງພະບາງ, ພ້ອມດ້ວຍພະນັກ ງານການນຳຂັ້ນແຂວງ, ເມືອງ, ນະຄອນ ແລະພໍ່ແມ່ປະຊາຊົນບັນດາເຜົ່າເຂົ້າຮ່ວມເປັນຈຳນວນຫຼາຍພັນຄົນ.

  ທ່ານ ໄຊຊົວລືເຮີ ປະທານສະມາຄົມມົ້ງ ແຂວງຫຼວງພະບາງ ກ່າວວ່າ: ຊົນເຜົ່າມົ້ງແມ່ນຊົນເຜົ່າໜຶ່ງທີ່ມີຄວາມດຸໝັ່ນຂະຫຍັນພຽນໃນການສ້າງສາເສດຖະກິດຄອບ ຄົວໃຫ້ມີຄວາມຢູ່ດີກີນດີປະກອບອາຊີບຊາວນາ-ຊາວສວນເປັນສ່ວນໃຫຍ່ຕິດພັນກັບການຄ້າ-ການບໍລິການດ້ານຕ່າງໆ ທີ່ຖືເອົາການຜະລິດເປັນປັດໄຈສຳຄັນຕົ້ນຕໍ,ພາຍ ຫຼັງໄດ້ມີການເກັບມັດມ້ຽນ  ຜົນລະປູກສຳເລັດໃນທຸກໆປີພໍເຖິງທ້າຍເດືອນ 12 ລາວ ພໍ່ແມ່ພີ່ນ້ອງ ຊາວເຜົ່າມົ້ງກໍ່ໄດ້ມີການເຕົ້າໂຮມ ກັນເພື່ອຈັດງານບຸນກິນຈຽງເຜົ່າມົ້ງຂຶ້ນເປັນການສົ່ງທ້າຍປີເກົ່າ ແລະຕ້ອນຮັບປີໃໝ່ ແລະຍັງເປັນການຮັກສາປະເພນີອັນດີງານທີ່ບັນພະບູລຸດໄດ້ສືບທອດກັນມາແຕ່ດຶກດຳບັນທັງເປັນການເຄົາລົບບັນພະບູລຸດພໍ່ແມ່, ເຖົ້າແກ່ອາວຸໂສ,ຜູ້ຊົງຄຸນວຸດທິຂອງຕະກຸນເພື່ອມາພົບປະສ້າງສັນແລະອວຍພອນໃຫ້ບັນດາລູກຫຼານໃຫ້ມີຄວາມສຸກກາຍສະບາຍໃຈ, ມີໂຊກມີໄຊ ແລະໄຫ້ວແຈກຫາຜູ້ລ່ວງລັບໄປອີກດ້ານໜຶ່ງກໍ່ເປັນການເອກອ້າງຜົນລະປູກຂອງຝັງ,ການຜະລິດເຄື່ອງຫັດຖະກຳສີໄມ້ລາຍມື, ການຫຍິບປັກທັກແສ່ວ, ການສະແດງສິລະປະວັນ ນະຄະດີ, ກີລາ ແລະສິ ລະປະຢຸດໃນການປ້ອງກັນຕົວທີ່ເປັນເອກະລັກຂອງຊົນເຜົ່າໃຫ້ຄົງຄຸນຄ່າຕະຫຼອດໄປ, ພິເສດໃນງານກິນຈຽງປີນີ້ໄດ້ມີກິດຈະກຳທີ່ພົ້ນເດັ່ນຫຼາຍຢ່າງເປັນຕົ້ນແມ່ນ: ກີລາຕີດອກປີກໄກ່, ໜ້າເກັກ, ຕີໜາກຂັງ,ງົວຊົນງົວ ແລະ ໂຍນໜາກຄອນທີ່ເປັນການດຶງດູດນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວຊົມເປັນຈຳນວນຫຼວງຫຼາຍໃນທຸກໆປີ, ຊຶ່ງງານສະເຫຼີມສະຫຼອງນໍເປ້ເຈົ່າກິນຈຽງຂອງຊາວເຜົ່າມົ້ງນີ້ດຳເນີນເປັນເວລາ 10 ວັນ ແຕ່ວັນທີ 25 ທັນວາ 2019- ວັນທີ 4 ມັງກອນ 2020.

  ຫຼັງຈາກນັ້ນທ່ານ ສາຍສະໜອນ ຄົມທະວົງ ໄດ້ກ່າວອວຍພອນ ແລະ ຊົມເຊີຍຕໍ່ຜົນງານການພັດທະນາຂອງປະຊາຊົນຊົນເຜົ່າມົ້ງໃນໄລຍະຜ່ານມາພ້ອມມອບເງິນຈຳ ນວນ 5 ລ້ານກີບ ໃຫ້ແກ່ສະມາຄົມມົ້ງໃນການສະເຫຼີມສະຫຼອງປີໃໝ່ມົ້ງນຳອີກ.

___________

ຂຽນໂດຍ: ສອນມະນີ ໄຊສະຫວັດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์