ພູເບ້ຍ ສິ່ງມະຫັດສະຈັນທີ່ທຳມະຊາດສ້າງຂຶ້ນ ພວມຈະກາຍເປັນອີກແຫຼ່ງທ່ອງທ່ຽວໜ້າສົນໃຈຂອງລາວ

  ຄົນລາວມີຄວາມໂຊກດີທີ່ສຸດເກີດຂຶ້ນມາຢູ່ເທີງຜືນແຜ່ນດິນລາວແຜ່ນດິນແຫ່ງຄວາມອຸດົມສົມບູນຂອງຊັບໃນດິນສິນໃນນໍ້າຫີບເງິນຫີບຄຳທີ່ບັນພະບູລຸດເຮົາເຝົ້າ ແລະຫວງແຫນຈົນມາເຖິງທຸກວັນນີ້ເມື່ອຮອດຮຸ່ນພວກເຮົາເຈົ້າຂ້ອຍເກີດໃໝ່ໃຫຍ່ລຸນຈະຂຸດຂຶ້ນມານຳໃຊ້ແນວໃດໃຫ້ເກີດປະໂຫຍດ ແລະຍືນຍົງກິນບໍ່ໝົດຈົກບໍ່ແຫ້ງສະນັ້ນພັກ ແລະ ລັດຖະບານຈຶ່ງໄດ້ກຳນົດການທ່ອງທ່ຽວເປັນອຸດສະຫາກຳສ້າງລາຍຮັບກັບທີ່ສ້າງລາຍໄດ້ໃຫ້ຊຸມຊົນນັບເປັນອີກຫົນທາງໜຶ່ງຈະຊ່ວຍນຳພາປະຊາຊົນຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.

  ສຳລັບພູເບ້ຍຢູ່ເມືອງອານຸວົງ ແຂວງໄຊສົມບູນ ແມ່ນເປັນພູທີ່ມີຊື່ສຽງໂດ່ງດັງ ແລະສູງທີ່ສຸດໃນລາວປະມານ 2.820 ແມັດ ທີ່ຍັງເຕັມໄປດ້ວຍຄວາມອຸດົມສົມບູນຂອງທຳມະຊາດບວກອາກາດຊຸ່ມຊື່ນເຢັນຕະຫຼອດປີຊຶ່ງເໝາະສົມໃຫ້ແກ່ການທ່ອງທ່ຽວທຳມະຊາດຊົມວິວຈອມພູສູງ, ປ່າໄມ້ເປັນຂົນ, ຜາເທີສິ່ງມະຫັດສະຈັນທີ່ທຳມະຊາດສ້າງຂຶ້ນເປັນເອກະລັກນໍຫີນສີລາພົ້ນໂກ່ໂລ່ຂຶ້ນຢູ່ເທີງຈອມພູເບ້ຍ, ປ່າໄມ້ໃຫຍ່ດົງດິບ, ຊາພັນປີ, ຊີວະນາໆພັນພືດ ແລະດອກຈຳປາພັນປີທີ່ມີຢູ່ທີ່ນີ້ແຫ່ງດຽວໃນລາວ.

ແນວໃດກໍດີໃນອະນາຄົດອັນໃກ້ນີ້ພູດັ່ງກ່າວກຳລັງຈະຖືກພັດທະນາໃຫ້ກາຍເປັນສະຖານທີ່ທ່ຽວລະດັບຊາດໃນນາມຊື່ໂຄງການ KPG ສະຫວັນທະເລໝອກພູເບ້ຍແຂວງໄຊສົມບູນ ຊຶ່ງເວລານີ້ບໍລິສັດກຸ່ມຄຳໄພຊະນະຈຳກັດຜູ້ດຽວຜູ້ໄດ້ຮັບບູລິມະສິດໄດ້ສຳເລັດການລົງສຳຫຼວດລະອຽດຂັ້ນຕອນສຸດທ້າຍໂດຍທ່ານ ຄຳໄພ ສົມຊະນະປະ ທານກຸ່ມບໍລິສັດຄຳໄພຊະນະຈຳກັດຜູ້ດຽວໄດ້ນຳພາທີມລົງສຳຫຼວດ ແລະ ກຳນົດກິດຈະກິດທ່ອງທ່ຽວອະນຸລັກປະຊາຊົນມີສ່ວນຮ່ວມດ້ວຍຕົນເອງໃນລະຫວ່າງກາງເດືອນທັນ ວາ 2019 ຜ່ານມານີ້.

 ຫຼັງສຳເລັດຈາກການໄປສຳຫຼວດດັ່ງກ່າວທ່ານ ຄຳໄພ ສົມຊະນະ ໄດ້ເປີດເຜີຍຕໍ່ທີມຂ່າວພວກເຮົາວ່າ: “ເບ້ຍ” ແມ່ນຄຳສັບລາວບູຮານທີ່ບັນພະບູລຸດນຳໃຊ້ສືບທອດກັນມາຮອດປະຈຸບັນຊຶ່ງມີຄວາມ ໝາຍເຖິງຊັບສົມບັດຊັບສິນມີຄ່າ ເປັນເງິນເປັນຄຳສະນັ້ນຄຳວ່າ ພູເບ້ຍ ຈຶ່ງໝາຍວ່າ ພູເງິນ ພູຄຳ ຊຶ່ງ ພວກເຮົາເຈົ້າຂ້ອຍເຄີຍໄດ້ຍິນຊື່ພູນີ້ມາຕັ້ງແຕ່ຍັງນ້ອຍ ຫຼື ຮຽນຢູ່ຊັ້ນປະຖົມໂດຍຊີວິດສ່ວນຕົວ ແລະຄອບຄົວຂ້າພະເຈົ້າຫຼາຍຄົນອາດຮູ້ແລ້ວວ່າເປັນແນວໃດ ຊຶ່ງໃນຜ່ານມາເຮັດສີ່ງໃດກໍມີໝາກຜົນສຳເລັດເປັນກ້າວໆຈາກນ້ອຍຫາໃຫຍ່ໄປເລື້ອຍໆ ໃນເມື່ອເຮົາເຕີບໃຫຍ່ຍ້ອນພັກຍ້ອນລັດຍ້ອນປະຊາຊົນບວກສ່ວນຕົວມີຄວາມເຊື່ອໝັ້ນສູງ ແລະ ປະຕິບັດຕາມແນວທາງນະໂຍ ບາຍຂອງພັກ-ລັດ ເມື່ອໃດຂ້າພະເຈົ້າຫົວບໍ່ຕິດໝອນຫຼັງບໍ່ຕິດເຊື່ອກໍຈະບໍ່ຢຸດນຳພາລູກຫຼານພັດທະນາຕໍ່ໄປ ແລະກໍເຖິງເວລາແລ້ວທີ່ຈະຄືນ ຫຼື ບິແບ່ງປັນຄວາມຄວາມ ສຸກໃຫ້ພັກ-ລັດໃຫ້ປະຊາຊົນທຸກຄົນໃນຊາດໄດ້ມີຄວາມສຸກເດີນໜ້າໄປພ້ອມໆກັນຢ່າງບໍ່ຢຸດຢັ້ງຈຶ່ງໄດ້ມີຄວາມຕັດສິນໃຈສູງເອົາທຸກສະຕິປັນຍາ, ເຫື່ອແຮງ ແລະ ຄວາມຈິງໃຈເຮັດແທ້ທຳຈິງສຸມທຸກສີ່ງຢ່າງທີ່ມີເພື່ອມາພັດທະນາພູເບ້ຍໃຫ້ກາຍເປັນແຫຼ່ງທ່ອງທ່ຽວລະດັບຊາດລະດັບອາຊຽນໃຫ້ທຸກຄົນໄດ້ຊື່ນຊົມ.

  ທ່ານກ່າວຕື່ມວ່າ: ການລົງສຶກສາສຳຫຼວດໃນຄັ້ງນື້ແມ່ນເປັນຄັ້ງສຸດທ້າຍຂອງໂຄງການດ້ວຍການຢ່າງເດີນປ່າຂຶ້ນພູເພື່ອເກັບກຳຂໍ້ມູນໃຫ້ລະອຽດຊັດເຈນແຕ່ລະຈຸດແຕ່ ລະບ່ອນໃສ່ບົດວິພາກເສດຖະກິດ ແລະເຕັກນິກຂອງໂຄງການໃຫ້ສຳເລັດສົມບູນຊຶ່ງມາຮອດປະຈຸບັນແມ່ນມີຄວາມຄືບໜ້າປະມານ 90% ທັງໝົດນັ້ນແມ່ນໄດ້ຮັບຄວາມຮ່ວມໄມ້ຮ່ວມມືຈາກທຸກພາກສ່ວນຂອງລັດນັບແຕ່ຂັ້ນສູນກາງລົງຮອດທ້ອງຖີ່ນ ແລະ ຢືນຢັນອີກເທື່ອໜຶ່ງວ່າໂຄງການນີ້ເກີດຂຶ້ນຢ່າງແນ່ນອນແຕ່ທັງນີ້ທັງນັ້ນແມ່ນຈຳ ເປັນຈະຕ້ອງໄດ້ຮັບການສືບຕໍ່ເອື້ອອຳນວຍຄວາມສະດວກດ້ານຕ່າງໆ ຈາກພາກສ່ວນລັດໂດຍສະເພາະແມ່ນຂັ້ນຕອນການດຳເນີນດ້ານເອກະສານຂໍອະນຸມັດພັດທະນາຈາກລັດຖະບານເພື່ອໃຫ້ ໂຄງການໄດ້ດຳເນີນງານໃນຕົ້ນປີ ແລະທັນເປີດບໍລິການນັກທ່ອງ ທ່ຽວທັງພາຍໃນ ແລະຕ່າງປະເທດພາຍໃນລະຫວ່າງເດືອນທັນວາປີ 2020 ພ້ອມກັບການສະເຫຼີມສະຫຼອງວັນສະຖາປານາ ສປປ ລາວ ຄົບຮອບ 45 ປີ ແລະວັນຄ້າຍວັນເກີດປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວຄົບຮອບ 100 ປີ ໃຫ້ມີຄວາມໝາຍສຳຄັນ ແລະບັນຍາກາດຄຶກຄື້ນມ່ວນຊື່ນ.

  ສຳລັບໂຄງການບໍລິສັດແມ່ນຈະລົງທຶນທັງໝົດ 300 ລ້ານໂດລາສະຫະລັດ, ກຳນົດເວລາໃນການຄຸ້ມຄອງ ແລະບໍລິຫານໂຄງການ 75 ປີ ຊຶ່ງຈະມີຫຼາຍ 10 ກິດຈະ ກຳຕ້ອນຮັບແຂກເປັນຕົ້ນສັນຍາລັກອະລິຍະທຳປະຈຳຊາດຂອງບັນດາປະເທດ, ຂີ່ກະຕ່າລອຍຟ້າ, ເຮືອນຊົງລາວສຳພັດວິຖີຊີວິດແບບລາວ, ອາຊຽນແບບອະນຸລັກທຳມະ ຊາດ, ໂຮງແຮມ-ເຮືອນພັກຕາກອາກາດ, ສະຖານບັນເທີງ, ໂຮງລະຄອນ, ຮ້ານຂາຍສິນຄ້າ, ຮ້ານອາຫານ ແລະ ກິນດື່ມ,ຮ້ານຂາຍເຄື່ອງທີ່ລະນຶກ-ຫັດຖະກຳ ແລະແກະສະຫຼັກຂອງລາວ, ນວດແຜນບູຮານ, ສະຖານທີ່ສະແດງສິລະປະ ແລະກະຍາສິນ, ສວນນໍ້າ, ຕະລຸດ, ລອຍ ກົງເບັງ, ຄື້ນນໍ້າທະເລຈຳລອງ, ສວນດອກໄມ້, ພະພຸດທະຮູບໃຫຍ່ວັດວາອາລາມ, ຈຸດຊົມການສະແດງຄວາມມະຫັດສະຈັນນໍ້າເຕັ້ນລະບຳ ແລະສະໂມສອນຈຳລອງຫິມະ.

  ເນື່ອງໃນໂອກາດເລີ່ມຕົ້ນເດືອນໃໝ່ປີໃໝ່ 2020 ນີ້ທ່ານ ຄຳໄພ ສົມຊະນະ ໄດ້ຖືໂອກາດດັ່ງກ່າວອວຍພອນໄຊໃຫ້ບັນດາການນຳພັກ ແລະ ລັດຖະບານຈົ່ງມີສຸຂຸພາບ ແຂງແຮງເປັນຮົ່ມໂພຮົ່ມໄຊຊີ້ນຳນຳພາພັດທະນາປະເທດຊາດໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ ແລະ ພັດທະນາແຂວງໄຊສົມບູນກໍຄືປະກອບສ່ວນສ້າງສີ່ງເອື້ອອຳນວຍຄວາມສະດວກແກ່ໂຄງການ KPG ສະຫວັນທະເລໝອກພູເບ້ຍໃຫ້ໄດ້ຮັບການຈັດຕັ້ງປະຕິບັດພັດທະນາກາຍເປັນແຫຼ່ງທ່ອງທ່ຽວລະດັບຊາດລະດັບອາຊຽນທີ່ມີຊື່ສຽງ ,ເປັນໜ້າຕາໜຶ່ງໃຫ້ກັບປະເທດຊາດສາມາດດຶງດູດຜູ້ຄົນໃນທົ່ວໂລກໃຫ້ຫຼັ່ງໄຫຼເຂົ້າມາທ່ຽວຊົມ, ພ້ອມຮຽກຮ້ອງໃຫ້ບັນດານັກທຸລະກິດດ້ວຍກັນຈົ່ງມີສະຕິປະຕິບັດຕາມແນວທາງນະໂຍບາຍພັກເຄົາລົບລະບຽບກົດໝາຍຂອງລັດເພື່່ອປະກອບສ່ວນສ້າງເແຫຼ່ງລາຍຮັບທີ່ຍືນຍົງ, ສ້າງອາຊີບທີ່ໝັ້ນຄົງແກ່ປະເທດຊາດ ແລະຄົນໃນທ້ອງຖິ່ນຊຶ່ງເປັນກຸນແຈອັນສຳຄັນຈະຊ່ວຍປົດລັອກຄວາມທຸກຍາກປະຊາຊົນໃຫ້ຫຼຸດໜ້ອຍຖອຍລົງເທື່ອລະກ້າວຕາມແຜນການທີ່ພັກ ແລະ ລັດຖະບານໄດ້ວາງໄວ້.

-------------

ພາບຂ່າວຈາກ: ໜັງສືພິມເສດຖະກິດ-ສັງຄົມ

แชร์