ຊຽງຂວາງ ສຸມໃສ່ຫຼາຍໜ້າວຽກ

  ກອງປະຊຸມຄົບຄະນະບໍລິຫານງານພັກ ແຂວງຊຽງຂວາງ ຄັ້ງທີ 9 ສະໄໝ ທີ VII ໄດ້ຈັດຂຶ້ນໃນວັນທີ 2 ມັງກອນ 2020 ຢູ່ຫ້ອງວ່າການແຂວງໂດຍການເປັນປະທານຂອງສະຫາຍ ບຸນຕົ້ນ ຈັນທະພອນ ເລຂາພັກແຂວງເຈົ້າແຂວງໆ ຊຽງຂວາງ, ມີບັນດາທ່ານຄະນະບໍລິຫານງານພັກແຂວງເຂົ້າຮ່ວມ.

  ສະຫາຍ ບົວສອນ ສີນວນທອງ ຮອງເລຂາພັກແຂວງຮອງເຈົ້າແຂວງໆຊຽງຂວາງ ໄດ້ຂຶ້ນຜ່ານບົດສັງເກດຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິ ຫານງານ ຄັ້ງທີ 8 ສະໄໝ VII ເຊິ່ງມີຜົນສຳເລັດຫຼາຍດ້ານສັງຄົມມີຄວາມເປັນລະບຽບຮຽບຮ້ອຍ, ເສດຖະກິດສືບຕໍ່ຂະຫຍາຍຕົວຢູ່ໃນລະດັບ8,27%, ລວມຍອດຜະລິດຕະພັນພາຍໃນໄດ້3,7 ພັນຕື້ກີບ, ສະເລ່ຍລາຍຮັບຕໍ່ຄົນໄດ້ 1.747ໂດລາຕໍ່ຄົນຕໍ່ປີ, ທົ່ວແຂວງມີບ້ານທຸກຍາກ 66 ບ້ານ ກວມ13,84%, ຄົວເຮືອນທຸກຍາກຍັງ ເຫຼືອ 769 ຄົວເຮືອນກວມ1,63%, ໄດ້ ພັດທະນາພື້ນຖານໂຄງລ່າງການສຶກສາ ໃຫ້ດີຂຶ້ນ ແລະ ທົ່ວເຖິງ, ອັດຕາການຕາຍ ຂອງເດັກຕໍ່າກ່ວາ 1 ປີປະຕິບັດໄດ້ 17 ຕໍ່ 1 ພັນຄົນ, ອັດຕາການເກີດລູກທີ່ມີແພດຊ່ວຍໄດ້ 53%, ອັດຕາການສັກຢາກັນພະຍາດເດັກນ້ອຍລຸ່ມ 1 ປີໄດ້ 57%, ຊົມໃຊ້ນໍ້າສະອາດ 87%, ວິດຖ່າຍ 85,24%, ອັດຕາການປົກຄຸມປະກັນສຸຂະພາບໄດ້ 92,34%, ວຽກງານການທ່ອງທ່ຽວໄດ້ຂະຫຍາຍຕົວຢ່າງຕໍ່ເນື່ອງ, ໄດ້ຈັດຫາວຽກເຮັດງານທຳ ແລະພັດທະນາສີມືແຮງງານ, ສາມາດກວດກູ້ລະເບີດທີ່ບໍ່ທັນແຕກອອກຈາກພື້ນທີ່ໄດ້894ເຮັກຕາ, ຮັບມະຫາຊົນກ້າວໜ້າເຂົ້າພັກສຳຮອງໄດ້ 85 ທ່ານ,ເລື່ອນຂຶ້ນສົມບູນ 77 ທ່ານ,

ສ້າງສາຍພົວພັນທີ່ດີກັບບັນດາປະເທດເພື່ອນມິດຍຸດທະສາດ, ກະກຽມ ແລະດຳເນີນກອງປະຊຸມໃຫຍ່ຂອງເມືອງ ແລະ ແຂວງ, ເພີ່ມທະວີການປ້ອງກັນ ແລະ ຕ້ານຍຸດ ທະສາດຫັນປ່ຽນໂດຍສັນຕິ, ເພີ່ມທະວີການຊີ້ນຳ-ນຳພາການພັດທະນາເສດຖະກິດເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນືອງ, ໝັ້ນທ່ຽງ, ເອົາໃຈໃສ່ຊີ້ນຳການຄຸ້ມ ຄອງການລົງທຶນ, ການເກັບລາຍຮັບງົບປະມານ, ພັດທະນາຊົນນະບົດແກ້ໄຂຄວາມທຸກຍາກຢ່າງມີຈຸດສຸມ, ຊຸກຍູ້ການຜະລິດໃຫ້ກາຍເປັນສິນຄ້າເພື່ອຮອງຮັບການເປັນເຈົ້າພາບທີ່ດີໃນງານມະຫາກຳກີລາແຫ່ງຊາດຄັ້ງທີ 11 ແລະ ພິທີຮັບເອົາໄຫຫີນເຂົ້າເປັນມໍລະດົກໂລກ,ຍົກສູງປະສິດທິພາບຂອງການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍຕິດພັນກັບການເຮັດໃຫ້ກົງຈັກລັດກະທັດລັດ, ເຂັ້ມແຂງ, ຫຼຸດຜ່ອນຂັ້ນ-ຂອດບໍລິຫານ, ເຄື່ອນໄຫວເປັນລະບົບມີປະສິດທິພາບໂປ່ງໃສ ແລະວ່ອງໄວ, ເພີ່ມທະວີການຊີ້ນຳ-ນຳພາເພື່ອໃຫ້ບັນລຸເປົ້າໝາຍສະຫັດສະວັດການພັດທະນາແບບຍືນຍົງ, ເພີ່ມທະວີຄວາມຮັບຜິດຊອບເພື່ອແກ້ໄຂຜົນຂອງການດຳເນີນຊີວິດການເມືອງປົວແປງພັກປີ 2017, ການລະເມີດຄຳສັ່ງເລກທີ15/ນຍ,ໂຄງການທີ່ມີສ່ວນຫຼຸດ30/70,ຕິດພັນກັບການແກ້ໄຂປະກົດການຫຍໍ້ທໍ້ການເຊື່ອມຖອຍພາຍໃນພັກ,ມີຄວາມເດັດຂາດເຂັ້ມງວດ, ຄັດຈ້ອນຄືນໃໝ່ເປົ້າໝາຍປະຕິບັດວິໄນໃຫ້ຊັດເຈນ ຕິດພັນກັບການປັບປຸງແກ້ໄຂຈຸດອ່ອນ, ຂໍ້ຄົງຄ້າງຕົວຈິງ.

____________

ຂຽນໂດຍ: ບຸນມີ ແສງທຸມມີ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

                       

แชร์