ລາວ ກຽມເຂົ້າຮ່ວມແຂ່ງຂັນສີມືແຮງງານອາຊຽນ

  ການແຂ່ງຂັນສີມືແຮງງານເປັນອົງປະກອບໜຶ່ງຂອງລະບົບພັດທະນາສີມືແຮງງານເພື່ອສ້າງຂະບວນການພັດທະນາສີມືແຮງງານໃຫ້ມີຂະບວນຟົດຟື້ນສ້າງໃຫ້ສັງຄົມຫັນມາສົນໃຈການຝຶກວິຊາອາຊິບໃຫ້ຫຼາຍຂຶ້ນ, ທັງເປັນເວທີເພື່ອເປີດໂອກາດໃຫ້ບັນດາຊາວໜຸ່ມໄດ້ນຳໃຊ້ຄວາມຮູ້, ຄວາມສາມາດ ແລະຄຸນສົມບັດເຂົ້າໃນການແຂ່ງຂັນເພື່ອສົ່ງເສີມ ແລະ ຍົກລະດັບສີມືແຮງງານໃຫ້ທຽບທັນພາກພື້ນ ແລະສາກົນ.

 ການແຂ່ງຂັນສີມືແຮງງານອາຊຽນມີຂຶ້ນທຸກໆ 2 ປີ ເຊິ່ງໄດ້ເລີ່ມມາແຕ່ປີ1996 ມາເຖີງປະຈຸບັນການແຂ່ງຂັນສີມືແຮງງານອາຊຽນຖືກຈັດຕັ້ງແລ້ວຈຳນວນ 12 ຄັ້ງ. ໃນນັ້ນ, ສປປ ລາວ ເຂົ້າຮ່ວມການແຂ່ງຂັນສີມືແຮງງານອາຊຽນຈໍານວນທັງໝົດ 10 ຄັ້ງ(ສັງເກດການ 1 ຄັ້ງ) ໂດຍສາມາດຍາດໄດ້ຫຼຽນເງິນເຊີ່ງເປັນຫຼຽນປະຫວັດ ສາດໃນສາຂາອາຊີບຕິດຕັ້ງໄຟຟ້າໃນອາຄານໃນການແຂ່ງຂັນສີມືແຮງງານອາຊຽນຄັ້ງທີ 10 ໃນປີ 2014 ທີ່ ສສ. ຫວຽດນາມ ແລະ ສາມາດຍາດໄດ້ໃບຢັ້ງຢືນສີມືດີເດັ່ນຈຳນວນ 20 ຄົນ ທັງສາມາດນຳໄປຜັນຂະຫຍາຍ ແລະຖ່າຍທອດເຂົ້າໃນການພັດທະນາສີມືແຮງງານລາວໃຫ້ດີຫຍິ່ງໆຂຶ້ນຕາມລຳດັບ.

 ເພື່ອກະກຽມການແຂ່ງຂັນສີມືແຮງງານອາຊຽນຄັ້ງທີ 13, ໃນເດືອນກໍລະກົດ ປີ 2020 ທີ່ປະເທດ ສິງກະໂປ, ກອງປະຊຸມຄັ້ງທີ 1 ຂອງຄະນະກຳມະການເຕັກນິກຮັບຜິດຊອບຈັດການແຂ່ງຂັນສີມືແຮງງານອາຊຽນຄັ້ງທີ 13 ໄດ້ຖືກຈັດຂຶ້ນໃນລະຫວ່າງວັນທີ 9-12 ທັນວາ 2019, ທີ່ສິງກະໂປໂດຍໄດ້ທົບທວນຄືນຄວາມພ້ອມ, ປຶກສາຫາລື ແລະ ສາມາດກໍານົດເອົາລະບຽບ ແລະ ກົດກະຕິກາການແຂ່ງຂັນ, ແລະ ຮັບຮອງເອົາ 20 ສາຂາຊ່າງເຂົ້າໃນການແຂ່ງຂັນລວມມີຂະແໜງ IT 5 ສາຂາຊ່າງ, ວິສະວະກຳ 8 ສາຂາຊ່າງ, ບໍລິການ 4 ສາຂາຊ່າງ, ສິລະປະ ແລະປະຍຸກ 2 ສາຂາ, ການຂົນສົ່ງ 1 ສາຂາ, ແລະ 2 ສາຂາຊ່າງທີ່ເປັນການສາທິດ ຄື: ສາຂາຊ່າງຄວບຄຸມລະບົບເຕັກນິກໃນອຸດສາຫະກຳ ແລະສາຂາຊ່າງຄວບຄຸມລະບົບການຂົນສົ່ງ.

  ສຳລັບ ສປປ ລາວ, ໄດ້ສະເໜີເອົາ 6 ສາຂາຊ່າງທີ່ຈະສົ່ງເຂົ້າຮ່ວມແຂ່ງຂັນຄື: ສາຂາຊ່າງຕິດຕັ້ງໄຟຟ້າ, ປຸງແຕ່ງອາຫານ, ອອກແບບ ແລະຕັດຫຍິບເຄື່ອງນຸ່ງ, ອອກແບບກຣາບຟິກ, ອອກແບບໜ້າເວັບໄຊ໌ ແລະ (ສາຂາຊ່າງຫຸ່ນຍົນເຄື່ອນທີ່.

  ນອກຈາກນີ້, ກອງປະຊຸມຍັງໄດ້ຮັບຟັງການຢືນຢັນຂອງປະເທດຟິລິບປິນທີ່ພ້ອມຈະເປັນເຈົ້າພາບຈັດຕັ້ງການແຂ່ງຂັນສີມືແຮງງານອາຊຽນຄັ້ງທີ 14 ໃນເດືອນກໍລະ ກົດ ປີ 2022. ສ່ວນການແຂ່ງຂັນສີມືແຮງງານອາຊຽນຄັ້ງທີ 15 ທີ່ປະເທດສະມາຊິກອາຊຽນໄດ້ສະເໜີໃຫ້ ສ ປປ ລາວ ຮັບເປັນເຈົ້າພາບໃນປີ 2024,ກະຊວງແຮງ ງານ ແລະສະຫວັດດີການສັງຄົມຈະມີການສືບຕໍ່ຄົ້ນຄວ້າ ແລະພິຈະລະນາເງື່ອນໄຂ ແລະຄວາມພ້ອມຊຶ່ງຈະແຈ້ງຕໍ່ປະເທດສະມາຊິກອາຊຽນຮັບຊາບກ່ອນວັນທີ 1 ພຶດ ສະພາ 2020; ໃນກໍລະນີທີ່ ສປປ ລາວ ຍັງຂາດຄວາມພ້ອມຫຼາຍດ້ານທີ່ຈະບໍ່ສາມາດເປັນເຈົ້າພາບໃນຄັ້ງທີ 15 ໄດ້, ປະເທດອິນໂດເນເຊຍຈະນຳໄປປຶກສາຫາລືພາຍ ໃນ ເພື່ອຮັບ ກຽດເປັນເຈົ້າພາບແທນ ສປປ ລາວ.

  ການແຂ່ງຂັນສີມືແຮງງານອາຊຽນຄັ້ງທີ 13 ທີ ຈະມີຂຶ້ນລະຫວ່າງວັນທີ 21-31 ກໍລະກົດ 2020 ທີສູນການຄ້າຊານເຕັກ (Suntec City) ປະເທດສິງກະໂປເຊິ່ງເປັນຄັ້ງທີ 11 ຂອງ ສປປ ລາວ ໃນເວທີອາຊຽນ.

  ໃນການກະກຽມຄວາມພ້ອມໃນການທີ່ຈະເຂົ້າຮ່ວມນັ້ນ, ກະຊວງແຮງງານ ແລະສະຫວັດດີການສັງຄົມມີແຜນການຮ່ວມມືກັບພາກສ່ວນກ່ຽວຂ້ອງທັງພາກລັດ ແລະເອກະຊົນຈະຈັດຕັ້ງການແຂ່ງຂັນສີມືແຮງງານແຫ່ງຊາດຄັ້ງທີ 4 ໃນຕົ້ນປີ 2020 ນີ້ ເພື່ອຄັດເລືອກເອົານັກແຂ່ງຂັນສີມືແຮງງານ ແລະ ຄູຝຶກທີມຊາດລາວເຂົ້າຮ່ວມການແຂ່ງຂັນ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์