ງານບຸນປະເພນີ ນໍເປເຈົ່າ ໄຊຍະຈັດຂຶ້ນດ້ວຍຫຼາຍກິດຈະກໍາ

   ບຸນກິນຈຽງ (ນໍເປເຈົ່າ) ເຜົ່າມົ້ງຢູ່ແຂວງໄຊຍະບູລີ ໄດ້ຈັດຂຶ້ນຢ່າງເປັນທາງການໃນວັນທີ 27 ທັນວາ 2019 ນີ້ທີ່ເດີ່ນສະໜາມຫຼວງໄຊຍະບູລີ, ໂດຍໃຫ້ກຽດເຂົ້າ ຮ່ວມມີ ທ່ານ ຈະເລີນ ເຢຍ ເປົາເຮີ ລັດຖະມົນຕີປະຈໍາຫ້ອງວ່າການສໍານັກງານນາຍົກ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ມີການນໍາຂັ້ນແຂວງ ແລະເມືອງ, ພະນັກງານປະຕິວັດອາວຸໂສບໍານານ, ຜູ້ຊົງຄຸນວຸດທິ, ເຈົ້າກົກເຈົ້າເຫຼົ່າ, ຫົວໜ້າຊິງຊາວພ້ອມດ້ວຍພໍ່ແມ່ປະຊາຊົນບັນດາເຜົ່າເຂົ້າຮ່ວມຢ່າງຫຼວງຫຼາຍ.

 ໃນພິທີທ່ານ ຄໍາສຸກ ທໍ່ ຄະນະກໍາມະການສູນກາງແນວລາວສ້າງຊາດໄດ້ລາຍງານການກະກຽມ ແລະສະເໜີຄວາມເປັນມາຂອງ ບຸນກິນຈຽງ ເຜົ່າມົ້ງ ຊຶ່ງທ່ານໄດ້ກ່າວວ່າ: ໂດຍປະຕິບັດຕາມຮີດຄອງປະເພນີຂອງເຜົ່າມົ້ງແຕ່ລະປີຮອດເດືອນ 12 ສາກົນ ແມ່ນຈະໄດ້ຈັດຕັ້ງການສະເຫຼີມສະຫຼອງບຸນປີໃໝ່ຊຶ່ງພວກເຮົາເອີ້ນກັນວ່າ “ນໍເປເຈົ່າ” ແລະ ກໍ່ໄດ້ຈັດຕັ້ງກັນມາແຕ່ດົນນານແລ້ວເປັນການສົ່ງທ້າຍປີເກົ່າ ແລະ ຕ້ອນຮັບປີໃໝ່, ເປັນການຕີລາຄາຜົນສໍາເລັດແຫ່ງການຜະລິດຜົນລະປູກ, ການປະຕິບັດວຽກງານຮອບດ້ານຂອງປະຊາຊົນລາວບັນດາເຜົ່າເວົ້າສະເພາະແມ່ນຊົນເຜົ່າມົ້ງໃນຮອບ 1 ປີຜ່ານມາ, ຊົນເຜົ່າມົ້ງແມ່ນຊົນເຜົ່າໜຶ່ງໃນ 50 ເຜົ່າທີ່ສະພາແຫ່ງຊາດໄດ້ຮັບຮອງເອົາ  ແລະນອນໃນ 8 ເຜົ່າສະເພາະຢູ່ແຂວງໄຊຍະບູ ລີ, ຊົນເຜົ່າມົ້ງໄດ້ມີວັດທະນະທໍາ-ຮີດຄອງປະເພນີອັນດີງາມທີ່ເປັນ ເອກະລັກຂອງເຜົ່າ ແລະນອນໃນວັດທະນະທໍາຂອງຊາດລາວມາແຕ່ດຶກດໍາບັນຄຽງຄູ່ກັບເຜົ່າອື່ນໆໃນ ສປປ ລາວ, ຊົນເຜົ່າມົ້ງມີມູນເຊື້ອຕໍ່ສູ້ພິລະອາດຫານບໍ່ຍອມຈໍານົນ,ມີຄວາມອົດທົນ,ມີຄວາມກ້າຫານ, ດຸໝັ່ນໃນການອອກແຮງງານຄຽງບ່າຄຽງໄລ່ກັບເຜົ່າຕ່າງໆ, ງານບຸນກິນຈຽງ (ນໍເປເຈົ່າ) ເປັນງານບຸນໃຫຍ່ຂອງເຜົ່າມົ້ງ ແລະໜຶ່ງປີໃດມີເທື່ອໜຶ່ງດ້ວຍການໝູນວຽນ ມາຮອດວັນເວລາດຽວກັນຊຶ່ງຈັດຂຶ້ນທ້າຍປີຊຶ່ງກົງກັບເດືອນ 12 ສາກົນ ແລະ ກົງກັບແຮມ 15 ຄໍ່າ ຂອງເດືອນຈຽງເດືອນເຜົ່າລາວເພື່ອສົ່ງທ້າຍປີເກົ່າ ແລະ ຕ້ອນຮັບ ປີໃໝ່, ຊົນເຜົ່າມົ້ງໄດ້ມີປະຫວັດຄວາມເປັນມາພ້ອມເຜົ່າອື່ນໆໃນ ສປປ ລາວ ແລະຕັ້ງຖິ່ນຖານພູມລໍາເນົາຢູ່ພູດອຍ ແລະຢູ່ປົນເປນໍາເຜົ່າຕ່າງໆໃນພາກເໜືອ,ພາກກາງ ຂອງ ສປປ ລາວ.

  ການເຮັດບຸນ (ນໍເປເຈົ່າ) ເຜົ່າມົ້ງແມ່ນຈັດຂຶ້ນພາຍຫຼັງເກັບກູ້ຜົນຜະລິດກະສິກໍາສໍາເລັດ, ກ່ອນຈະເຖິງບຸນນໍເປເຈົ່າຂອງປະຊາຊົນເຜົ່າມົ້ງໄດ້ມີການຫ້າງຫາກະກຽມ ສິ່ງທີ່ຈໍາເປັນໆຕົ້ນແມ່ນເຕົ້າໂຮມເຄື່ອງມືອອກແຮງງານທຸກຊະນິດ, ກະກຽມສະບຽງອາຫານການກິນປະເພດຕ່າງໆ ແລະເຄື່ອງໃຊ້ພາຍໃນຄອບຄົວເຊັ່ນ: ເຂົ້າ, ເຂົ້າປະປາ, ຜັກ, ຟືນ, ນໍ້າ, ເຄື່ອງນຸ່ງ ແລະ ອື່ນໆ ໃຫ້ພຽງພໍພາຍໃນກໍານົດ 3 ວັນ; ໃນເວລາເຮັດບຸນຕ້ອງໄດ້ຄະລໍາ 3 ວັນເປັນຕົ້ນ: ຫ້າມໃຊ້ຈ່າຍເງິນຄໍາ, ຫ້າມໄປອອກແຮງງານ, ໄປຊອກຫາກິນ, ຫ້າມຫຼິ້ນພ້າ,ມີດທີ່ເປັນປະເພດແຫຼມຄົມ ແລະ ອື່ນໆ, ບຸນກິນຈຽງເຜົ່າມົ້ງແມ່ນຈັດພິທີຕາມປະເພນີຄື: ສົ່ງທ້າຍປີເກົ່າ-ຕ້ອນຮັບປີໃໝ່ເຂົ້າໃນວົງວຽນເພື່ອກໍາຈັດປັດເປົ່າສິ່ງຊົ່ວຮ້າຍ,ພະຍາດໂລຄາ,ສິ່ງທີ່ບໍ່ດີໃຫ້ໄປນໍາປີເກົ່າ ແລະອວຍພອນໄຊອັນປະເສີດຕ້ອນຮັບປີໃໝ່ຈາກນັ້ນເອີ້ນຂວັນໃຫ້ແກ່ສະມາຊິກພາຍ ໃນຄອບຄົວ ແລະ ປະຊາຊົນພີ່ນ້ອງຊິງຊາວຕ່າງໆໃນທົ່ວຕະກູນ ຫຼື ຢູ່ພາຍໃນບ້ານ, ນໍາພາເຮັດຮີດຄອງກິນທານໃຫ້ບັນພະບູລຸດຜູ້ທີ່ລ່ວງລັບໄປໃນເມື່ອກ່ອນເພື່ອສະແດງຄວາມເຄົາລົບ,ຄວາມຮູ້ບຸນຄຸນຕໍ່ເຂົາເຈົ້າ, ໃນໂອກາດບຸນປີໃໝ່ຊຶ່ງເປັນເງື່ອນໄຂໃຫ້ແກ່ຊາວໜຸ່ມ, ຍິງໜຸ່ມ (ບ່າວ-ສາວ) ໄດ້ພົບໜ້າພໍ້ຕາ ແລະມີໂອກາດຊອກຫາຄູ່ຄອງເພື່ອສ້າງຄອບຄົວ;ພາຍຫຼັງບຸນນໍເປເຈົ່າຊຶ່ງເປັນບຸນປີໃໝ່ແລ້ວປະຊາຊົນເຜົ່າມົ້ງຈະໄດ້ສືບຕໍ່ກະກຽມອຸປະກອນເຊັ່ນ: ພ້າຂໍ, ຂວັນ ແລະອື່ນໆ ທີ່ຈໍາເປັນເຂົ້າສູ່ການຜະລິດລະດູການໃໝ່ໃຫ້ທັນກັບເວລາ ແລະໄດ້ຮັບຜົນດີກວ່າເກົ່າ.

  ສຳລັບການຈັດງານນໍເປເຈົ່າທີ່ ແຂວງໄຊຍະບູລີ ຄັ້ງນີ້ແມ່ນຈະດໍາເນີນເປັນເວລາ 10 ວັນ ເລີ່ມແຕ່ ວັນທີ 25 ທັນວາ 2019 ຈົນຮອດວັນທີ 4 ມັງກອນ 2020, ໂດຍຈັດໃຫ້ມີຫຼາກຫຼາຍກິດຈະກໍາເປັນຕົ້ນການແຂ່ງຂັນກີລາບານເຕະຍິງ, ກະຕໍ້, ເປຕັງ, ໝາກຄ່າງ, ໜ້າເກັກ, ງົວຊົນງົວພ້ອມນີ້ຍັງມີກິດຈະກໍາຂີ່ຊ້າງຊົມຕົວເມືອງ, ງານຕະ ຫຼາດນັດວາງສະແດງຂາຍສິນຄ້າກະສິກໍາ ແລະສິນຄ້າອື່ນໆ, ຊົມສະແດງສີລະປະວັນນະຄະດີ, ຄອນເສີດສິ່ງທີ່ຂາດບໍ່ໄດ້ໃນງານດັ່ງກ່າວກໍ່ຄືໂຍນໝາກຄອນ.

  ຈາກນັ້ນທ່ານ ຄໍາສິງ ສໍລະສຸກ ປະທານແນວລາວສ້າງຊາດແຂວງທັງເປັນປະທານຈັດງານບຸນໄດ້ໃຫ້ກຽດກ່າວເປີດງານບຸນປະເພນີນໍເປເຈົ່າຂອງພີ່ນ້ອງເຜົ່າມົ້ງແຂວງ ໄຊຍະບູລີ ຢ່າງເປັນທາງການ.

___________

ຮຽບຮຽງໂດຍ: ບຸນທີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์