ບໍ່ຄໍາ-ທອງເຊໂປນມອບອາກອນກຳໄລໃຫ້ລັດ

  ບໍລິສັດລ້ານຊ້າງມີເນໂຣນສ໌ລີ ມິເຕັດບໍ່ຄຳ-ທອງເຊໂປນ (ລຊມລ) ໄດ້ມອບແຊັກເງິນອາກອນກຳໄລລ່ວງໜ້າ ສົກປີ2019 ຈໍານວນ 2 ລ້ານໂດລາສະຫະລັດ ໃຫ້ແກ່ທ່ານ ກົງຄຳ ສິດທິວໍລະດາ, ຮອງຫົວໜ້າກົມສ່ວຍສາອາກອນ,ກະຊວງການເງິນຊຶ່ງໃນຕົວຈິງແລ້ວແລະຕາມສັນຍານັ້ນອາກອນກຳໄລແມ່ນຈະໄດ້ປະກາດ ແລະມອບໃຫ້ ພາກລັດໃນເດືອນມີນາ 2020 ທີ່ຈະ ມາເຖິງໃນສົກປີ 2019 ນີ້, ລຊມລ ໄດ້ຜະລິດແຜ່ນທອງໄດ້ກວ່າ 72,000 ໂຕນ ຊຶ່ງໄດ້ລື່ນຄາດໝາຍທີ່ໄດ້ຕັ້ງໄວ້. ນັບຕັ້ງແຕ່ໄດ້ເລີ່ມດຳເນີນງານໃນປີ 2002 ເປັນຕົ້ນມາ, ລຊມລ ໄດ້ມອບພັນທະຫຼາຍກວ່າ 1,4 ຕື້ໂດລາສະຫະລັດໃຫ້ແກ່ລັດຖະບານຊຶ່ງເປັນລາຍຮັບໂດຍກົງໃນຮູບແບບພາສີ-ອາກອນ, ຄ່າຊັບພະຍາກອນແຮ່ທາດ, ເງິນຄັງສຳຮອງນໍ້າມັນ ແລະເງິນປັນຜົນ.

ທ່ານ ສະໝານ ອະເນກາ, ຜູ້ອຳນວຍການໃຫຍ່ ແລະຜູ້ຈັດການຝ່າຍພົວພັນກັບຜູ້ມີສ່ວນຮ່ວມຂອງບໍລິສັດ ລຊມລ ໄດ້ກ່າວວ່າ: ບໍລິສັດຢຶດໝັ້ນເປັນຄູ່ຮ່ວມມື-ສະໜັບ ສະໜູນໃຫ້ແກ່ລັດຖະບານ ແລະ ມີຄວາມພາກພູມໃຈເປັນຢ່າງຍິ່ງທີ່ໄດ້ປະກອບສ່ວນຕໍ່ການພັດທະນາເສດຖະກິດ-ສັງຄົມໃນ ສປປ ລາວ ນອກຈາກການປະກອບສ່ວນເປັນລາຍຮັບໂດຍກົງຕໍ່ລັດຖະບານແລ້ວ,ບໍລິສັດຍັງໄດ້ເປັນຄູ່ຮ່ວມງານທີ່ໃກ້ຊິດກັບຊຸມຊົນທ້ອງຖິ່ນ ແລະພາກລັດໃນການປະກອບສ່ວນຕໍ່ການພັດທະນາທີ່ສໍາຄັນໃນ ສປປ ລາວ ໂດຍຜ່ານການສ້າງວຽກເຮັດງານທໍາ ແລະການຝຶກອົບຮົມ, ການພັດທະນາພື້ນຖານໂຄງລ່າງ, ການພັດທະນາທຸລະກິດທ້ອງຖິ່ນກໍຄືການພັດທະນາຊຸມຊົນ.”

  ສິ່ງທີ່ພົ້ນເດັ່ນໃນເດືອນນີ້, ແມ່ນການປະກາດລາງວັນ “ອາຊຽນ” ດີເດັ່ນດ້ານແຮ່ທາດ (ASEAN Minerals Award) ຊຶ່ງບໍລິສັດ ຊືເຟິງ ລ້ານຊ້າງມີເນໂຣນສ໌ ລິມິເຕັດ ໄດ້ເປັນຜູ້ຊະນະເລີດໃນດ້ານການຂຸດຄົ້ນແຮ່ທາດ ແລະ ໂລຫະທີ່ດີເລີດລາງວັນດັ່ງກ່າວໄດ້ຍົກບົດບາດ ແລະໃຫ້ການຍ້ອງຍໍ-ສັນລະເສີນແກ່ບໍລິສັດຂຸດຄົ້ນປຸງ-ແຕ່ງແຮ່ທາດ ແລະໂລຫະໃນບັນດາປະເທດ“ອາຊຽນ”  ທີ່ດຳເນີນທຸລະກິດພັດທະນາແຮ່ທາດແບບຍືນຍົງ ແລະແບບມີຄວາມຮັບຜິດ ຊອບຢ່າງດີເລີດດ້ານສິ່ງແວດລ້ອມ ແລະສັງຄົມ. ປີ 2019 ເປັນການຈັດລາງວັນ “ອາຊຽນ” ດີເດັ່ນດ້ານແຮ່ທາດຄັ້ງທີ 2 ແລະທັງເປັນຄັ້ງທີ 2 ທີ່ ບໍລິສັດ ລຊມລ ໄດ້ຮັບລາງວັນ ແລະການຍ້ອງຍໍສັນລະ ເສີນສຳລັບຜົນງານ ແລະການປະກອບສ່ວນທີ່ດີເດັ່ນດ້ານການພັດທະນາຊຸມຊົນ, ການປະກອບສ່ວນຕໍ່ການສະໜອງແຮ່ທາດໃນຕະຫຼາດອາຊຽນ, ການພັດທະນາຊັບ ພະຍາກອນມະນຸດ, ຜະລິດຕະຜົນ ແລະປະສິດທິພາບດ້ານຊັບພະຍາກອນ, ຜົນງານດ້ານສຸຂະພາບ ແລະ ຄວາມປອດໄພກໍຄືຜົນງານດ້ານສິ່ງແວດລ້ອມ.

   ນອກຈາກປະກອບເປັນສ່ວນລາຍຮັບໂດຍກົງໃຫ້ແກ່ລັດຖະບານແລ້ວ, ລຊມລ ຍັງໄດ້ລົງທຶນປະມານ 50 ລ້ານໂດລາສະຫະລັດໃນການພັດທະນາໂຄງລ່າງພື້ນຖານແຫ່ງຊາດ ແລະທ້ອງຖິ່ນ, 48 ລ້ານໂດລາສະຫະລັດ ເຂົ້າໃສ່ການເກັບກູ້ລະເບີດທີ່ບໍ່ທັນແຕກ ແລະໄດ້ລົງທຶນຫຼາຍລ້ານໂດລາສະຫະລັດໃສ່ວຽກງານປົກປັກຮັກສາມໍລະ ດົກວັດທະນະທຳ ແລະແຜນງານສະໜັບສະໜູນດ້ານສັງຄົມອື່ນໆ.

  ໃນຊຸມຊົນເມືອງວິລະບູລີໄດ້ມີປະຊາຊົນຫຼາຍກວ່າ 14.000 ຄົນ ທີ່ໄດ້ຮັບຜົນປະໂຫຍດຈາກແຜນງານພັດທະນາຊຸມຊົນລວມ US$13 ລ້ານຜ່ານໂຄງການ ແລະການລົງທຶນໂດຍກົງໃນຂະນະທີ່ລາຍໄດ້ຊຸມຊົນຜ່ານກຸ່ມທຸລະກິດທ້ອງຖິ່ນແມ່ນໄດ້ທະວີຄູນຂຶ້ນເປັນ US$32 ລ້ານ.

  ບໍລິສັດ ລຊມລ ໄດ້ລົງທຶນຫຼາຍລ້ານໂດລາສະຫະລັດເຂົ້າໃນການພັດທະນາ ແລະຝຶກອົບຮົມບຸກຄະລາກອນ, ການລົງທຶນດັ່ງກ່າວໄດ້ພັດທະນາທັກສະ ແລະສ້າງວຽກເຮັດງານທຳໃຫ້ແກ່ຄົນລາວກວ່າ 10.000 ຕໍາແໜ່ງງານ. ໃນໄລຍະທີ່ດຳເນີນການຜະລິດບໍລິສັດກໍ່ໄດ້ວ່າຈ້າງພະນັກງານກວ່າ 5.000 ຄົນ ແລະປະຈຸບັນກໍຍັງມີພະ ນັກງານ ລຊມລ ກວ່າ 1.500 ຄົນ ແລະພະນັກງານບໍລິສັດຜູ້ຮັບເໝົາ 1.400 ຄົນ.

__________

ໜັງສືພິມເສດຖະກິດ-ສັງຄົມ

แชร์