ປີໃໝ່ 2020 ລາວຈະນຳໃຊ້ເຄື່ອງມືທັນສະໄໝຢູ່ບັນດາດ່ານໃນຂອບເຂດທົ່ວປະເທດ

  ເພື່ອແກ້ໄຂບັນດາຂໍ້ຄົງຄ້າງວຽກງານວິຊາສະເພາະຂອງຂະແໜງພາສີໃນປີຜ່ານມາ ແລະ ໄດ້ວາງມາດຕະການໃນການຈັດເກັບລາບຮັບເຂົ້າງົບປະມານແຫ່ງລັດໃນປີ 2020 ຂະແໜງພາສີຈະຫັນເປັນທັນສະໄໝເປັນຕົ້ນ: ລະບົບອາຊິກູດາ, ລະບົບບ53, ລະບົບແຈ້ງພາສີປະຕູດຽວແຫ່ງຊາດ, ລະບົບແຈ້ງພາສີປະຕູດຽວອາຊຽນ, ການຄຸ້ມຄອງຂົນສົ່ງສິນຄ້າຜ່ານແດນອາຊຽນ (ACTS) ແລະເຄື່ອງສະແກນເນີຢູ່ບັນດາດ່ານພາສີໃນຂອບເຂດທົ່ວປະເທດ.

  ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີກະຊວງການເງິນໃຫ້ຮູ້ວ່າ: ການຈັດຕັ້ງປະຕິບັດວຽກງານວິຊາສະເພາະຂອງຂະແໜງພາສີໃນປີ 2019 ຜ່ານມາໄດ້ຮັບການຊີ້ນຳຢ່າງໃກ້ຊິດຈາກຄະນະນຳກະຊວງການເງິນ, ອັນເປັນເງື່ອນໄຂການປັບປຸງກົງຈັກການຈັດຕັ້ງຂະແໜງຕ້ານສະກັດກັ້ນການລັກລອບໜີພາສີໃຫ້ລວມສູນບັນຊາໂດຍກົງຈາກສາຍຕັ້ງໃນຂອບເຂດທົ່ວປະເທດ,ການປະກອບເຄື່ອງມືທັນສະໄໝເຂົ້າໃນການຈັດຕັ້ງປະຕິບັດວຽກງານວິຊາສະເພາະຂອງຂະແໜງພາສີເປັນຕົ້ນ: ລະບົບຕິດຕາມຄຸ້ມຄອງພາຫະນະທ່ອງທ່ຽວຢ້ຽມຢາມ (ບ53), ລະບົບການຈັດເກັບຄ່າທຳນຽມແບບອີເລັກໂຕຣນິກ, ລະບົບການແຈ້ງພາສີປະຕູດຽວແຫ່ງຊາດແລະອື່ນໆ.

  ນອກນັ້ນ, ຍັງໄດ້ເອົາໃຈໃສ່ກໍ່ສ້າງພັດທະນາບຸກຄະລາກອນຢ່າງເປັນລະບົບໃຫ້ມີຄວາມຮູ້ຄວາມສາມາດຕອບສະໜອງກັບຄວາມຮຽກຮ້ອງຕ້ອງການຂອງວຽກງານຕົວຈິງ, ເຮັດໃຫ້ການ ຈັດເກັບລາຍຮັບເຂົ້າງົບປະມານໃນປີ 2019 ໃນ 11 ເດືອນສາມາດຈັດຕັ້ງ ປະຕິບັດໄດ້ 6,1 ພັນຕື້ກີບ ຊຶ່ງລາຍຮັບ ຕົ້ນຕໍສ່ວນໃຫຍ່ຍັງແມ່ນການນຳເຂົ້ານໍ້າ ມັນເຊື້ອໄຟກວມ 39,7%, ພາຫະນະກວມ 24,92%, ເຄື່ອງອຸປະໂພກບໍລິໂພກກວມ 12,76% ຂອງລາຍຮັບທັງໝົດເຖິງວ່າການຈັດເກັບລາຍຮັບໃນປີ2019 ອາດບໍ່ບັນລຸໄດ້ຕາມແຜນການແຕ່ກໍ່ມີລັກສະນະເພີ່ມ ຂຶ້ນຖ້າທຽບໃສ່ປີ 2018.

  ແນວໃດກໍຕາມເຖິງແມ່ນວ່າການຈັດຕັ້ງປະຕິບັດວຽກງານຂອງຂະແໜງພາສີມີລັກສະນະທ່າກ້າວ; ແຕ່ກໍຍັງມີຂໍ້ຫຍຸ້ງຍາກຫຼາຍດ້ານທີ່ເຮັດໃຫ້ການຈັດຕັ້ງປະຕິບັດການຈັດເກັບລາຍຮັບບໍ່ໄດ້ຕາມແຜນການເປັນຕົ້ນ: ແມ່ນຜົນກະທົບທີ່ເກີດຈາກໄພທຳມະຊາດ; ການນຳເຂົ້າ-ສົ່ງອອກ ສິນຄ້າຢູ່ບາງດ່ານຊາຍແດນຢຸດສະງັກ, ບໍລິສັດຂາດສະພາບຄ່ອງທາງດ້ານການເງິນ ແລະເງິນຕາໃນການຊໍາລະສິນຄ້າທີ່ສັ່ງຊື້ຈາກຕ່າງປະເທດເຮັດໃຫ້ສະພາບການນຳເຂົ້າສິນຄ້າເສຍພາສີມີລັກສະນະຫຼຸດລົງ, ແຫຼ່ງລາຍຮັບເກືອບ 90% ຂອງສິນຄ້ານຳເຂົ້າມີອັດຕາຫຼຸດຜ່ອນພາສີ 0%,ວັດຖຸປະກອນຕາມນະໂຍບາຍສົ່ງເສີມການລົງທຶນ ແລະການຜະລິດເພື່ອທົດແທນການນຳເຂົ້າ.

  ນອກນັ້ນ, ມາດຕະການໃນການບັງຄັບໃຊ້ກົດໝາຍຍັງບໍ່ທັນເຂັ້ມງວດ ແລະຄວາມເປັນເອກະພາບເປັນຕົ້ນ: ແມ່ນການປະຕິບັດມູນຄ່າແຈ້ງພາສີຂອງບັນດາບໍລິສັດ, ການແກ້ໄຂລົດນຳເຂົ້າບໍ່ຖືກຕ້ອງຢູ່ບັນດາທ້ອງຖິ່ນຍັງບໍ່ທັນເຂັ້ມງວດເຮັດໃຫ້ການແກ້ໄຂລົດນຳເຂົ້າບໍ່ຖືກຕ້ອງຍັງມີລັກສະນະບໍ່ສິ້ນສຸດ, ສະພາບການລັກລອບສິນຄ້າໜີພາສີຍັງມີແຜ່ຫລາຍ ແລະມີຫຼາຍຮູບແບບໂດຍສະເພາະນໍ້າມັນເຊື້ອໄຟ.

  ທ່ານ ບຸນປະເສີດ ສີກຸນລະບຸດ ເນັ້ນຕື່ມອີກວ່າ: ເພື່ອແກ້ໄຂບັນດາຂໍ້ຄົງຄ້າງວຽກງານຂອງຂະແໜງພາສີໃນປີຜ່ານມາແລະບາງມາດຕະການໃນການຈັດຕັ້ງປະຕິບັດໃນປີ 2020 ຈະຫັນວຽກງານພາສີເປັນທັນສະໄໝເປັນຕົ້ນ: ຂະຫຍາຍລະບົບເຄື່ອງມືທັນສະໄໝທີ່ມີໃນປະຈຸບັນເຊັ່ນ: ລະບົບອາຊິກູດາສືບຕໍ່ຜັນຂະຫຍາຍຕິດຕັ້ງຢູ່ບັນ ດາດ່ານພາສີທ້ອງ ຖິ່ນໃນທົ່ວປະເທດ, ລະບົບຄຸ້ມຕອງລົດ ນໍາເຂົ້າມາທ່ອງທ່ຽວຢ້ຽມຢາມ (ບ53) ປະຈຸບັນທົດລອງນໍາໃຊ້ຢູ່ດ່ານຂົວມິດ ຕະພາບ1, ຕິດຕັ້ງ ແລະ ນໍາໃຊ້ຢູ່ບັນດາ ດ່ານພາສີສາກົນໃນຂອບເຂດທົ່ວປະ ເທດໃຫ້ສໍາເລັດ, ລະບົບແຈ້ງພາສີປະຕູດຽວແຫ່ງຊາດທົດລອງນໍາໃຊ້ຢູ່ຂົວມິດ ຕະພາບ1 ໃນສົກປີ 2019 ໃຫ້ສາມາດ ຜັນຂະຫຍາຍຕິດຕັ້ງນໍາໃຊ້ຢູ່ບັນດາດ່ານພາສີທີ່ສໍາຄັນ, ລະບົບແຈ້ງພາສີປະຕູດຽວອາຊຽນໃຫ້ສາມາດດໍາເນີນການ ແລກປ່ຽນຂໍ້ມູນໃບຢັ້ງຢືນແຫລ່ງກໍາເນີດສິນຄ້າຟອມດິກັບບັນດາປະເທດອາຊຽນ, ລະບົບການຄຸ້ມຄອງຂົນສົ່ງສິນຄ້າຜ່ານແດນອາຊຽນ (ACTS) ໃຫ້ສາມາດຜັນຂະຫຍາຍໄປສູ່ບັນດາດ່ານເປົ້າໝາຍຈໍານວນ 6 ດ່ານໃນຂອບເຂດທົ່ວປະເທດ ແລະເຄື່ອງສະແກນເນີຈະໄດ້ປະ ສານກັບບໍລິສັດນູເທັກລາວເພື່ອປັບປຸງສ້ອມແປງເຄື່ອງສະແກນເນີທີ່ມີ 8 ເຄື່ອງໃນປະຈຸບັນໃຫ້ສາມາດໃຊ້ງານໄດ້ປົກກະຕິ.

  ນອກນັ້ນ, ປະສານສົມທົບກັບຜູ້ຊ່ຽວຊານໄຈກາ, ທະນາຄານໂລກເພື່ອດໍາເນີນແຜນງານຫັນພາສີເປັນທັນສະໄໝ, ປັບປຸງແລະພັດທະນາລະບົບບໍລິຫານຄວາມສ່ຽງທີ່ນອນໃນລະບົບອາຊິກູດາໃຫ້ມີປະສິດທິພາບ ແລະ ສອດຄ່ອງກັບສະພາບຄວາມສ່ຽງຂອງຜູ້ນໍາເຂົ້າ-ສົ່ງຕົວຈິ່ງ, ດໍາເນີນໂຄງການຜູ້ປະກອບການທີ່ໄດ້ມາດຕະຖານ AEO ໃນປີ 2019 ຄາດໝາຍໃຫ້ສາມາດຮັບຮອງໄດ້ 5 ບໍລິສັດ. ພ້ອມທັງຮຽກຮ້ອງມາຍັງບັນດາຂະແໜງການກ່ຽວຂ້ອງ ແລະທຸກພາກສ່ວນລວມເຖິງພາກທຸລະກິດຈົ່ງໄດ້ໃຫ້ການສະໜັບສະໜູນ ແລະປະສານຮ່ວມມືເພື່ອໃຫ້ວຽກງານພາສີປະສົບຜົນສໍາເລັດຕາມຄາດໝາຍແຜນການ.

____________

ໜັງສືພິມເສດຖະກິດ-ສັງຄົມ

 

แชร์