ເຊັນສັນຍາວຽກປັບປຸງສິ່ງແວດລ້ອມຢູ່ 2 ເມືອງ ແຂວງໄຊຍະ

  ພິທີເຊັນສັນຍາໂຄງການກໍ່ສ້າງປັບປຸງສິ່ງແວດລ້ອມບ້ານຢູ່ 2 ເມືອງ ຄື: ເມືອງໄຊຍະບູລີ ແລະເມືອງບໍ່ແຕນ ແຂວງໄຊຍະບູລີ ໄດ້ຈັດຂຶ້ນບໍ່ດົນຜ່ານມານີ້ທີ່ພະແນກໂຍ ທາທິການ ແລະຂົນສົ່ງແຂວງເຂົ້າຮ່ວມມີທ່ານ ບຸນແທນ ທິແກ້ວ ເຈົ້າເມືອງໄຊຍະບູລີ, ທ່ານ ບຸນທະວີ ໂພທິລັກ ຮອງຫົວໜ້າພະແນກໂຍທາທິການ ແລະຂົນສົ່ງແຂວງ, ມີຮອງເຈົ້າເມືອງໆບໍ່ແຕນພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມ.

  ໂຄງການກໍ່ສ້າງປັບປຸງສິ່ງແວດລ້ອມບ້ານຢູ່ 2 ເມືອງ ແມ່ນຈະໄດ້ເລີ່ມຈັດຕັ້ງປະຕິບັດໃນກາງເດືອນມັງກອນປີ 2020 ໂດຍແມ່ນບໍລິສັດດວງຈັນຮຸ່ງເຮືອງຈໍາກັດເປັນຜູ້ຮັບເໝົາກໍ່ສ້າງ ແລະຈະໃຫ້ສໍາເລັດໃນເດືອນກໍລະກົດ 2020. ໜ້າວຽກທີ່ບໍລິສັດຜູ້ຮັບເໝົາຈະປະຕິ ບັດຢູ່ເມືອງໄຊຍະບູລີມີ 15 ບ້ານ, ແມ່ນກໍ່ສ້າງເສັ້ນທາງຍົກລະ ດັບປູຫີນແຮ່ມີຈໍານວນ 25 ເສັ້ນ, ຍາວທັງໝົດ 4.103 ແມັດ ພ້ອມດ້ວຍທໍ່ລອດທາງຈໍານວນໜຶ່ງ, ຈັດຊື້ວັດສະດຸເພື່ອສ້ອມແປງຫ້ອງການບ້ານ ແລະ ໂຮງຮຽນ, ກໍ່ ສ້າງຮ່ອງລະບາຍນໍ້າແບບປິດເປີດດ້ວຍຫີນພູ ແລະເທຝາຄອນກຼີດເສີມເຫຼັກປົກຮ່ອງນໍ້າບາງຈຸດຍາວ 6 ແມັດ, ລວມມູນຄ່າ 1,1 ຕື້ກີບ.

ເມືອງບໍ່ແຕນມີ 4 ບ້ານ ໜ້າວຽກທີ່ເຮັດກໍ່ສ້າງເສັ້ນທາງຍົກລະດັບປູຫີນແຮ່ຈໍານວນ 7 ເສັ້ນມີຄວາມຍາວທັງໝົດ 1.276 ແມັດ ພ້ອມດ້ວຍທໍ່ລອດທາງຈໍານວນໜຶ່ງ, ຈັດຊື້ອຸປະກອນເພື່ອສ້ອມແປງຫ້ອງການບ້ານມີມູນຄ່າ 264 ລ້ານກວ່າກີບ; ລວມມູນຄ່າທັງໝົດ 1,3 ຕື້ກີບ.  

  ທັງສອງເມືອງໂດຍແມ່ນທຶນກູ້ຢືມຈາກທະນາຄານພັດທະນາອາຊີ 71%, ທຶນປະກອບສ່ວນຂອງປະຊາຊົນ 10% ແລະທຶນຂອງແຂວງ 19%.

  ຈາກນັ້ນ ທ່ານ ບຸນທະວີ ໂພທິລັກ ຮອງຫົວໜ້າພະແນກ ຍທຂ ໃນນາມເຈົ້າຂອງໂຄງການ ແລະທ່ານ ດວງສະໝອນ ບົວມະນີຈັນ ອໍານວຍການບໍລິສັດ ດວງຈັນຮຸ່ງເຮືອງ ໄດ້ຮ່ວມກັນເຊັນສັນຍາໂຄງການປັບປຸງສິ່ງແວດລ້ອມບ້ານຂອງເມືອງໄຊຍະບູລີ ແລະເມືອງບໍ່ແຕນແຂວງໄຊຍະບູລີຢ່າງເປັນທາງການ.

____________

ຂຽນໂດຍ: ບຸນທີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์