ເຊີນທ່ຽວບຸນກິນຈຽງຊົນເຜົ່າມົ້ງບ້ານຊຳເກດ

ເພື່ອເປັນການສືບສານວັດທະນະທຳຊົນເຜົ່າມົ້ງທີ່ໄດ້ສືບທອດກັນມາແຕ່ບູຮານທາງຄະນະຮັບຜິດຊອບຈຶ່ງໄດ້ຮ່ວມຈັດງານເທສະການບຸນກິນຈຽງເຜົ່າມົ້ງປະຈຳປີ 2020 ຂຶ້ນທີ່ສະໜາມກີລາພື້ນເມືອງລາວສໍາພັນນາໆຊາດ ບ້ານຊຳເກດ ເມືອງສີໂຄດຕະບອງ ນະຄອນຫຼວງວຽງຈັນ ໂດຍເຂົ້າຮ່ວມ ເປີດພິທີໂດຍທ່ານນາງ ພູວົງ ແກ້ວວົງວິຈິດເຈົ້າເມືອງສີໂຄດຕະບອງທ່ານ ທອງວິໄລ ລິດທິເດດ ປະທານຈັດງານບຸນກິນຈຽງຊົນເຜົ່າມົ້ງ, ທ່ານ ໂຊກໄຊ ມົ້ງຊົ້ງ ຄະນະຈັດງານບຸນກິນຈຽງຊົນເຜົ່າມົ້ງ, ທ່ານ ວາກີລີ ວົງໄຊ ຄະນະຈັດງານບຸນກິນຈຽງຊົນເຜົ່າ.

  ທ່ານ ທອງວິໄລ ລິດທິເດດ ກ່າວວ່າ: ປີນີ້ເປັນປີທີ 4 ທີ່ໄດ້ຮ່ວມຈັດງານດັ່ງກ່າວຊຶ່ງໄດ້ເນີນແຕ່ວັນທີ 28 ທັນວາ-5 ມັງກອນ 2020 ສຳລັບບັນດາກິດຈະກຳທີ່ໜ້າສົນໃຈພາຍໃນງານເທສະການບຸນກິນຈຽງເຜົ່າມົ້ງປະກອບມີການໂຍນໝາກຄອນ, ຟ້ອນສິລະປະຊົນເຜົ່າມົ້ງ, ຂັບລຳເຜົ່າມົ້ງ, ການແຂ່ງຂັນກີລາປະເພດຕ່າງໆ ເຊັ່ນ: ເຕະບານ, ຕີໝາກຂ່າງ,ຍິງໜ້າເກັກ,ງົວຊົນງົວ ແລະອື່ນໆ ນອກຈາກກິດຈະກຳທີ່ກ່າວມາແລ້ວຍັງໄດ້ມີການຈັດປະກວດນາງສາວເຜົ່າມົ້ງທົ່ວປະເທດຂຶ້ນເພື່ອສ້າງສີສັນ ພາຍໃນງານອີກດ້ວຍ.

  ງານບຸນກິນຈຽງເຜົ່າມົ້ງ ຫຼືນໍ່ເປເຈົ່າແມ່ນເປັນງານສົ່ງທ້າຍປີເກົ່າຕ້ອນຮັບປີໃໝ່, ເປັນສັນຍາລັກແຫ່ງຄວາມສາມັກຄີ,ຄວາມຜູກພັນໃນວົງສາຄະນາຍາດຂອງຊົນເຜົ່າມົ້ງທີ່ຢູ່ຫ່າງໄກໄດ້ມາພົບປະສ້າງສັນ ແລະເພື່ອເຮັດພິທີກຳ ລະນຶກເຖິງບັນພະບູລຸດຂອງຍາດ ພີ່ນ້ອງຕົນ ຊຶ່ງເຈົ້າກົກ-ເຈົ້າເລົ່າໄດ້ນຳພາຊາວເຜົ່າມົ້ງຈັດງານບຸນນໍ່ເປເຈົ່າ ທີ່ຍິ່ງໃຫຍ່ຂຶ້ນມາແຕ່ດົນນານ ແລະມີຄວາມໝາຍຄວາມສຳຄັນທີ່ສ່ອງແສງເຖິງຮີດຄອງປະເພນີ,ວັດທະນະທຳອັນດີງາມຂອງຊົນເຜົ່າໃນລາວໂດຍສະເພາະແມ່ນຊົນເຜົ່າມົ້ງທີ່ມີເອກະລັກສະເພາະຂອງເຜົ່າເຊັ່ນ: ການໂຍນໝາກຄອນ, ເປົ່າແຄນ, ຂັບລຳ, ຍິງໜ້າເກັກ, ຕີໝາກຂ່າງ, ເປົ່າຂຸ່ຍ, ເປົ່າໃບໄມ້ ແລະອື່ນໆ.

___________

ຮຽບຮຽງໂດຍ: ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์