ຖໍ້າອົງແກ້ວ ແຫຼ່ງທ່ອງທ່ຽວທໍາມະຊາດ

ເວົ້າເຖິງສະຖານທີ່ທ່ອງທ່ຽວພາຍໃນກໍ່ມີຫຼາຍບ່ອນທີ່ໜ້າສົນໃຈໂດຍສະເພາະທາງດ້ານວັດທະນະທຳ ແລະທຳມະຊາດ, ຄຽງຄູ່ກັນນັ້ນປະຊາຊົນລາວຍັງເປັນຜູ້ທີ່ມີຈິດໃຈໂອບເອື້ອຍອາລີ,ມີຄວາມດຸໝັ້ນຂະຫຍັນພຽງ,ຮັກ ແລະຫວງແຫນໃນມູນເຊື້ອທາງດ້ານມໍລະດົກວັດທະນະທຳອັນດີງາມກໍ່ຄືຂອງຊາດ, ການທ່ອງທ່ຽວທີ່ເມືອງລະມາມ ຄັ້ງນີ້ແມ່ນຈະນຳສະເໜີສະຖານທີ່ທ່ອງທ່ຽວທາງທຳມະຊາດສິ່ງທີ່ເປັນໜ້າອັດສະຈັນທີ່ເກີດຂຶ້ນຈາກທໍາມະຊາດນັ້ນກໍ່ແມ່ນຖໍ້າອົງແກ້ວ.

    ຖໍ້າອົງແກ້ວຫ່າງຈາກເທສະບານເມືອງລະມາມ 40 ກິໂລແມັດ, ຕັ້ງຢູ່ພາກຕາເວັນອອກສຽ່ງໃຕ້ຂອງພູເປັນສະຖານທີ່ທ່ອງທ່ຽວທີ່ໄດ້ຮັບຄວາມສົນໃຈຫຼາຍສົມຄວນ ເນື່ອງຈາກວ່າສະຖານທີ່ທ່ອງທ່ຽວແຫ່ງນີ້ມີຄວາມງາມທີ່ເປັນເອກະລັກແບບທຳມະຊາດຖໍ້າອົງແກ້ວຍັງເປັນຖໍ້າທີ່ເກົ່າແກ່ທີ່ທຳມະຊາດສັນສ້າງຂຶ້ນຢ່າງສວຍສົດງົດງາມ ແລະ ເປັນທີ່ໜ້າອັດສະຈັັນ, ຊຶ່ງໃນສະໄໜຕໍ່ສູ້ກັບຈັກກະພັດອາເມລິກາຖໍ້າດັ່ງກ່າວເປັນເຂດທີ່ໜັ້ນຂອງແນວລາວອິດສະລະ ຫຼືຂອງການປະຕິວັດ ແລະເປັນສຳນັກງານ ແຂວງເກົ່າ, ຜູ້ນຳໄດ້ໃຊ້ເປັນບ່ອນລີ້ຊ້ອນຕົວໃນການເຄື່ອນໄຫວຕໍ່ສູ້, ເຊື່ອມຕໍ່ໃສ່ຖໍ້າຈະກຳເມືອງກະລືມ, ຕໍ່ມາໃນສະໄໝຈັກກະພັດອາເມລິກາປົກຄອງຖໍ້າອົງແກ້ວເປັນສາງອາວຸດຍຸດໂທປະກອນຂອງແນວລາວອິດສະລະ, ກໍ່ຄືແນວລາວຮັກຊາດໃນເມື່ອກ່ອນ.

  ຖໍ້າອົງແກ້ວເປັນຖໍ້າທີ່ອຸດົມສົມບູນເຕັມໄປດ້ວຍປ່າໄມ້ອັນດົກໜາ ແລະ ພືດພັນຫຼາຍສິ່ງຫຼາຍຢ່າງນອກຈາກຄວາມສວຍງາມເຫຼົ່ານັ້ນແລ້ວ, ອາກາດກໍຍັງເປັນມິດກັບຜູ້ ຄົນທີ່ໄປຍ່າງຫຼິ້ນ ແລະ ນັກທ່ອງ ທ່ຽວ, ຍ້ອນວ່າອາກາດສົດຊື່ນເຢັນສະບາຍເໝາະສຳລັບກັບຜູ້ຄົນທີ່ຢາກໄປພັກຜ່ອນຢ່າງຫຼິ້ນ,ກິນເຂົ້າສູບອາກາດສົດ, ຊົມວິວທິວທັດທຳມະຊາດຕ້ອງໄປສະຖານທີ່ນີ້ເລີຍ.

__________

ໂດຍ: ວົງມະນີ

• 02/01/2020