ນໍ້າຕົກຕາດຜາເຍືອງ ແຫຼ່ງທ່ອງທ່ຽວ ທໍາມະຊາດທີ່ສວຍງາມ

  ປະເທດເຮົາກໍເປັນປະເທດ ທີ່ອຸດົມສົມບູນໄປດ້ວຍແຫຼ່ງທ່ອງ ທ່ຽວທີ່ຢາຍກັນໄປຢູ່ແຕ່ລະຫົນ ແຫ່ງທີ່ແຕກຕ່າງກັນໄປ ຊຶ່ງມີທັງທ່ອງທ່ຽວແບບທໍາມະຊາດ, ດ້ານວັດທະນະທໍາ ແລະທາງປະຫວັດ ສາດທີ່ໄດ້ຖືກຈັດສັນ ແລະເປີດໄວ້ ເພື່ອບໍລິການໃຫ້ກັບບັນດານັກທ່ອງທ່ຽວທຸກຄົນ ໂດຍສະເພາະແມ່ນ ນໍ້າຕົກຕາດຜາເຍືອງ ນີ້ເອງທີ່ເປັນ ແຫຼ່ງທ່ອງທ່ຽວທາງທໍາມະຊາດທີ່ສວຍສົດງົດງາມທີ່ຮັກສາໄວ້ສິ່ງ ສວຍງາມເຫຼົ່ານັ້ນໄວ້ບໍ່ໃຫ້ຈາງ ຫາຍໄປ.

ນໍ້າຕົກຕາດຜາເຍືອງ ເປັນສະຖານທີ່ທ່ອງທ່ຽວທາງທໍາມະຊາດ ທີ່ສວຍສົດງົດງາມອີກແຫ່ງໜຶ່ງ ເພາະເປັນຕາດທີ່ອ້ອມຮອບໄປດ້ວຍຕົ້ນໄມ້ນ້ອຍໃຫຍ່ສີຂຽວຄຽງ ຂ້າງກັນກໍ່ມີທິວທັດທໍາມະຊາດ, ຊີວະນາໆພັນ, ມີສາຍລົມເຢັນພັດໂຊຍມາຕະຫຼອດເວລາ, ປະກອບກັບນໍ້າທີ່ໃສສະອາດ ແລະເຢັນດີ ໄຫຼລົງມາໜ້າຊະອອນສໍາຜັດແລ້ວມີຄວາມສຸກຈິດໃຈເພີດເພີນໄປຈົນ ລືມອິດລືມເມື່ອຍ ໂດຍລວມຍັງ ຄົງຮັກສາໄວ້ທໍາມະຊາດບໍ່ມີຫຍັງ ປ່ຽນແປງ, ຈຶ່ງກາຍເປັນທີ່ນິຍົມ ຊົມຊອບຂອງບັນດານັກທ່ອງທ່ຽວ ທັງພາຍໃນເອງ ແລະຕ່າງປະເທດອີກດ້ວຍ, ທັງນີ້ກໍຍ້ອນສະຖານ ທີ່ດັ່ງກ່າວມີອາກາດປອດໂປ່ງສົດ ໃສ ແລະເຢັນດີອັນເນື່ອງຈາກວ່າຢູ່ພາຍໃນຕາດມີຕົ້ນໄມ້ໃຫຍ່ດົກໜາ ປົກຄຸມບໍລິເວນ, ນັກທ່ອງທ່ຽວທຸກ ຄົນສາມາດລົງໄປນັ່ງຫຼິ້ນຢູ່ຕາມ ໂງ່ນຫີນທີ່ຕັ້ງລຽນເປັນຈຸດໆຕາມແລວນໍ້າທີ່ມີແກ້ງໄຫຼຜ່ານໃສເຢັນດີ ຫຼື ລົງໄປລອຍຫຼິ້ນໄດ້ຕາມສະບາຍ.

ສໍາລັບຕາດຜາເຍືອງ ທີ່ວ່ານີ້ ແມ່ນຕັ້ງຢູ່ເຂດເສັ້ນທາງຫຼວງນໍ້າທາ-ເມືອງສິງ ຫ່າງຈາກເມືອງ ຫຼວງນໍ້າທາ 40 ກິໂລແມັດ ແລະ ຫ່າງຈາກ ເມືອງສີງ 17 ກິໂລແມັດ, ຊຶ່ງມີສາຍນໍ້າໄຫຼລົງມາຈາກເທິງພູກັນຕອງຄວາມໃສສະອາດໂດຍທໍາມະຊາດຢ່າງແທ້ຈິງ.

ໂດຍ: ວົງມະນີິ

• 31/12/2019