ຮອງນາຍົກ ຊຸກຍູ້ໂຄງການທາງລົດໄຟຢູ່ອຸດົມໄຊໃຫ້ຮີບຮ້ອນຄົ້ນຄວ້າຊົດເຊີຍປະຊາຊົນຈຸດຄ້າງຄາ

  ວັນທີ 26 ທັນວາ 2019 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວ ໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ພ້ອມຄະນະໄດ້ໄປຢ້ຽມຢາມ ແລະ ຊຸກຍູ້ວຽກງານການກະ ກຽມກອງປະຊຸມໃຫຍ່ 3 ຂັ້ນຂອງພັກ ແລະ ຊຸກຍູ້ການກໍ່ສ້າງໂຄງການທາງລົດໄຟລາວ-ຈີນ ຢູ່ແຂວງອຸດົມໄຊໂດຍມີ ທ່ານ ຄໍາພັນ ເຜີຍຍະວົງ ເຈົ້າແຂວງອຸດົມໄຊ, ຄະ ນະປະຈໍາ, ຄະນະພັກ, ພະນັກງານຫຼັກແຫຼ່ງ, ພະນັກງານທີ່ກ່ຽວຂ້ອງຕ້ອນຮັບ ແລະຮ່ວມເຮັດວຽກ.

  ຫຼັງຈາກສຳເລັດຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງແຂວງ, ການກະກຽມດໍາເນີນກອງປະຊຸມໃຫຍ່ 3 ຂັ້ນ ກໍໄດ້ຮັບຟັງກ່ຽວກັບໂຄງ ການກໍ່ສ້າງທາງລົດໄຟລາວ-ຈີນ ຈາກຄະນະຮັບຜິດຊອບຮູ້ວ່າ: ໂຄງການກໍ່ສ້າງທາງລົດໄຟແຕ່ຊາຍແດນລາວ-ຈີນຫານະຄອນຫຼວງວຽງຈັນມີຄວາມຍາວທັງໝົດ 409 ກິໂລແມັດ,ແລວທາງລົດໄຟທີ່ຜ່ານແຂວງອຸດົມໄຊ 126,6 ກິໂລແມັດ ໃນນີ້ປະກອບມີ 9 ສະຖານນີ,ແຕ່ໄລຍະທໍາອິດແມ່ນກໍ່ສ້າງພຽງ 3 ສະຖານນີຄື: ສະຖານີເມືອງນາ ໝໍ້, ສະຖານີເມືອງໄຊ ແລະເມືອງງາ, ກໍ່ສ້າງຂົວໃໝ່ 60 ແຫ່ງ, ຄວາມຍາວລວມ 12,6 ກິໂລແມັດ ກວມອັດຕາສ່ວນ 10,02% ມີອຸໂມງ 32 ອຸມົງ, ຄວາມ ຍາວລວມ 84,8 ກິໂລແມັດ, ກວມອັດຕາສ່ວນ 67,03% ຈຸດດິນຕັດ-ດິນຖົມຄັນທາງມີຄວາມຍາວ 29,03 ກິໂລ ແມັດເທົ່າກັບ 22,93% ຂອງຄວາມຍາວຜ່ານແຂວງ; ຄວາມຄືບໜ້າຂອງການກໍ່ສ້າງທາງລົດໄຟລາວ-ຈີນຊ່ວງຜ່ານແຂວງອຸດົມໄຊ ມາຮອດປະຈຸບັນສາມາດປະຕິບັດໄດ້ 84.40 %.

  ສ່ວນການໄກ່ເກ່ຍແກ້ໄຂບັນຫາຂອງໂຄງການມາຮອດປະຈຸບັນສຳເລັດການແຕ່ງຮີດຄອງປ່າຊ້າຢູ່ບ້ານນາໝໍ້ໃຕ້ເມືອງນາໝໍ້, ສຳເລັດການລົງເກັບກໍາຂໍ້ມູນຜົນກະທົບໃນແລວທາງລົດໄຟ ແລະນອກແລວທາງລົດໄຟ, ການປະຕິບັດວຽກຂອງຄະນະໄກ່ເກ່ຍສິ່ງກີດຂວາງສາມາດມອບພື້ນທີ່ໃຫ້ຜູ້ຮັບເໝົາກໍ່ສ້າງສາມາດລົງມືປະຕິບັດວຽກໄດ້ທັງໝົດ 126,28 ກິໂລແມັດ ເທົ່າກັບ 99,75% ຍັງຄ້າງ 316 ແມັດ ເທົ່າກັບ 0,2% ຂອງຄວາມຍາວທັງໝົດໃນແຂວງ.

  ພາຍຫຼັງທີ່ໄດ້ຮັບຟັງການລາຍງານສະພາບການຕ່າງໆແລ້ວທ່ານຮອງນາຍົກລັດຖະມົນຕີກໍ່ໄດ້ໃຫ້ກຽດໂອ້ລົມ ແລະມີທິດຊີ້ນຳຕໍ່ຄະນະພັກ-ຄະນະນໍາຂອງແຂວງໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳແຂວງທີ່ໄດ້ມີຄວາມຕັດສິນໃຈສູງໃນການຊີ້ນຳໆພາວຽກງານຮອບດ້ານ,ໂດຍສະເພາະແມ່ນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການກະກຽມກອງປະຊຸມໃຫຍ່ 3 ຂັ້ນ, ສ່ວນການກໍ່ສ້າງທາງລົດໄຟລາວ-ຈີນ ທ່ານໄດ້ເນັ້ນໜັກໃຫ້ຄະນະຮັບຜິດຊອບເອົາໃຈໃສ່ໃນການຄົ້ນຄວ້າເບິ່ງຄວາມເໝາະສົມໃນການສະໜອງເນື້ອທີ່ກໍ່ສ້າງສະຖານີທັງ 3 ແຫ່ງ (ສະຖານີນາໝໍ້, ສະຖານີເມືອງງາ, ສະຖານີເມືອງໄຊ) ໃຫ້ເໝາະສົມໂດຍສະ ເພາະສະຖານີເມືອງໄຊ ແລະນາໝໍ້ແລ້ວລາຍງານໃຫ້ຂັ້ນເທິງເພື່ອພິຈາລະນາ; ຮີບຮ້ອນຄົ້ນຄວ້າການຊົດເຊີຍຕໍ່ປະຊາຊົນຜູ້ທີ່ໄດ້ຮັບຜົນກະທົບໃນບັນດາຈຸດທີ່ຍັງຄ້າງຄາໃຫ້ເໝາະສົມກັບຄວາມເປັນຈິງເພື່ອໃຫ້ໂຄງການສາມາດດໍາເນີນໄປຢ່າງສະດວກ ແລະຕໍ່ເນື່ອງ.

 ໂອກາດນີ້ທ່ານຮອງນາຍົກລັດຖະມົນຕີໄດ້ເດີນທາງຢ້ຽມຢາມ, ກວດກາການກໍ່ສ້າງຕົວຈິງ ແລະຊຸກຍູ້ການກໍ່ສ້າງທາງລົດໄຟຢູ່ສະຖານີນາໝໍ້ ແລະສະຖານີເມືອງໄຊຕື່ມອີກ.

__________

ຂຽນໂດຍ: ແສງເພັດ ແຊ່ຈ່າວ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์