ປະຕິມະກຳໂຄມໄຟສ້າງຮູບຈຳລອງຊ້າງແລະພະທາດຫຼວງມິ່ງຂວັນຊາວລາວ

   ປະຕິມະກຳໂຄມໄຟສ້າງຂຶ້ນບົນພື້ນຖານການປະຕິບັດຕາມນະໂຍບາຍໜຶ່ງແລວໜຶ່ງເສັ້ນທາງຂອງລັດຖະບານຈີນເພື່ອເປັນຂອງຂວັນໃຫ້ລັດຖະບານລາວ  ໃນໂອກາດເປີດປີທ່ອງທ່ຽວ ລາວ-ຈີນ 2019, ອອກແບບ ແລະສ້າງຂຶ້ນດ້ວຍການປະສົມປະສານລະຫວ່າງຮູບຈຳລອງຊ້າງທີ່ເປັນສັດມະຫາມຸງຄຸນຂອງລາວ ແລະຮູບຈຳລອງພະທາດຫຼວງທີ່ເປັນມິ່ງຂວັນຂອງຊາວລາວໂດຍນຳໃຊ້ຫັດຖະກຳເຄື່ອງປັ້ນດິນເຜົາທີ່ເປັນເອກະລັກຂອງເມືອງຈື້ກົງ.

   ພິທີມອບຮັບປະຕິມະກຳໂຄມໄຟຂອງອຳນາດປົກຄອງນະຄອນຈື້ກົງແຂວງເສສວນ ສປ ຈີນ ເພື່ອມອບເປັນຂອງຂວັນໃຫ້ແກ່ ສປປ ລາວ ໄດ້ມີຂຶ້ນໃນວັນທີ 25 ມັງກອນຜ່ານມາທີ່ສວນປະຕູໄຊ, ນະຄອນຫຼວງວຽງຈັນມອບໂດຍທ່ານ ຢູຊຽງປາຍ ຕາງໜ້າອຳນາດການປົກຄອງນະຄອນຈື້ກົງ ແລະຮັບໂດຍທ່ານ ສູນມະນີວົງ ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ, ມີຜູ້ຕາງໜ້າຈາກພາກສ່ວນກ່ຽວຂ້ອງສອງຝ່າຍເຂົ້າຮ່ວມ.

   ການມອບປະຕິມະກຳໂຄມໄຟຄັ້ງນີ້ເປັນການປະຕິບັດຕາມນະໂຍບາຍໜຶ່ງແລວໜຶ່ງເສັ້ນທາງຂອງລັດຖະບານຈີນກໍຄືອຳນາດການປົກຄອງນະຄອນຈື້ກົງ ເພື່ອເປັນຂອງຂວັນໃຫ້ລັດຖະບານລາວໃນໂອກາດເປີດປີທ່ອງທ່ຽວ ລາວ-ຈີນ 2019, ຊຶ່ງປະຕິມະກຳໂຄມໄຟອອກແບບ ແລະສ້າງຂຶ້ນດ້ວຍການປະສົມປະສານລະຫວ່າງຮູບຈຳລອງຊ້າງທີ່ເປັນສັດມະຫາມຸງຄຸນຂອງລາວ  ແລະຮູບຈຳລອງພະທາດຫຼວງທີ່ເປັນມິ່ງຂວັນຂອງຊາວລາວໂດຍການນຳໃຊ້ຫັດຖະກຳເຄື່ອງປັ້ນດິນເຜົາທີ່ເປັນເອກະລັກຂອງເມືອງຈື້ກົງຈຳນວນ 150.000 ອັນ, ຫຍິບຕິດຕໍ່ກັນດ້ວຍມືໃຫ້ເປັນຮູບດອກໄຟ“ໃບໜ້າໃໝ່ວຽງຈັນ”ທີ່ມີລວງສູງ 10 ແມັດ, ກວ້າງ 7,5 ແມັດ, ມີນ້ຳໜັກ 16  ໂຕນ, ຊຶ່ງໂຄມໄຟດັ່ງກ່າວໄດ້ອາໄສແສງສະທ້ອນຂອງພື້ນຜິວເຄື່ອງປັ້ນດິນເຜົາເຮັດໃຫ້ດອກໄຟແສງສີ  “ໃບໜ້າໃໝ່ວຽງຈັນ”ມີແສງສາດສ່ອງຊອດໃສ່ກັນອັນເຮັດໃຫ້ມີຄວາມງົດງາມພິເສດ ແລະຂອງຂວັນໃບໜ້າໃໝ່ວຽງຈັນນີ້ຈະເປັນພະຍານຂອງມິດຕະພາບ ອັນດີງາມ ລາວ-ຈີນ. ສໍາລັບປະຕິມະກຳໂຄມໄຟຈະວາງສະແດງຢູ່ສວນປະຕູໄຊມີໄລຍະເວລາ 3 ເດືອນນັບແຕ່ນີ້ເປັນຕົ້ນໄປ.

   ແນວໃດກໍດີເພື່ອເຮັດໃຫ້ການສະເຫຼີມສະຫຼອງປີທ່ອງທ່ຽວລາວຈີນ 2019 ມີບັນຍາກາດຟົດຟື້ນມ່ວນຊື່ນ, ໃນເດືອນຕຸລາ 2019 ຈະໄດ້ມີການຈັດງານສະແດງປະດັບປະດາໄຟແສງສີຈື້ກົງ ສປ ຈີນ ໃນເຂດເສດຖະກິດສະເພາະບຶງທາດ ຫຼວງ, ຊຶ່ງງານຄັ້ງທຳອິດນີ້ຈະໄດ້ຊົມຄວາມງົດງາມຂອງຫັດຖະກຳໄຟແສງສີປະສົມປະສານກັບທຳມະຊາດອັນສວຍສົດງົດງາມຂອງລາວ, ພ້ອມທັງສະແດງໃຫ້ເຫັນຄວາມງົດງາມທາງດ້ານປະເພນີ ແລະສາສະໜາພຸດອັນເປັນຕົ້ນສະ ບັບສ້າງໃຫ້ງານດັ່ງກ່າວໄດ້ຂຶ້ນຊື່ວ່າສະຫວັນບົນດິນ.

แชร์