ນໍ້າຕົກຕາດເສນ ສະຖານທີ່ທ່ອງທ່ຽວທາງທໍາມະຊາດ

  ແຫຼ່ງທ່ອງທ່ຽວນໍ້າຕົກຕາດເສນ ເມືອງເລົ່າງາມ ເປັນສະຖານທີ່ທີ່ໄດ້ຮັບຄວາມນິຍົມຈາກນັກທ່ອງທ່ຽວພາຍໃນ, ຕ່າງແຂວງ ແລະ ນັກທ່ອງທ່ຽວຕ່າງປະເທດ, ເພາະບັນດາສະຖານທີ່ທ່ອງທ່ຽວເປັນສະຖານທີ່ພັກຜ່ອນແບບສະບາຍດ້ວຍການຫຼິ້ນນໍ້າກັນຢ່າງຄຶກຄື້ນມ່ວນຊື່ນ,ນອນພັກຜ່ອນໃນພະລານຫີນ, ໃຕ້ຮົ່ມໄມ້ຍິ່ງຖ້າໄດ້ປູສາດນັ່ງກິນເຂົ້າທ່າມກາງບັນຍາກາດອັນສົດຊື່ນແລ້ວຍິ່ງໜ້າປະທັບໃຈ.

  ນໍ້າຕົກຕາດເສນ ເປັນອີກສະຖານທີ່ໜຶ່ງທີ່ມີຄວາມໂດດເດັ່ນ ແລະສວຍສົດງົດງາມທາງດ້ານທິວທັດທໍາມະຊາດປ່າໄມ້ອັນດົກໜາຂຽວງາມອຸ່ມທຸ່ມເຮັດໃຫ້ອາກາດເຂດນີ້ມີຄວາມສົດຊື່ນແຈ່ມ ໃສດີ ຈຶ່ງກາຍເປັນສະຖານທີ່ທ່ອງ ທ່ຽວໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນ ແລະຕ່າງປະເທດເປັນຈໍານວນບໍ່ໜ້ອຍນໍ້າຕົກຕາດເສນຕັ້ງຢູ່ບ້ານນາບອນ ເມືອງເລົ່າງາມຫ່າງຈາກເສັ້ນທາງເລກທີ 20 ປະມານ 8 ກິໂລແມັດ ແລະຫ່າງຈາກເທສະບານເມືອງ 12 ກິໂລແມັດ, ຕາດດັ່ງກ່າວເກີດ ຂຶ້ນຕາມທຳມະຊາດມາແຕ່ໃດໆແລ້ວ.

  ຕາມການເລົ່າຂານຂອງເຖົ້າແກ່ພາຍໃນບ້ານທີ່ບັນພະບູລຸດເຂົາເຈົ້າໄດ້ເລົ່າຕໍ່ກັນມາວ່າ: ໃນໄລຍະຝຣັ່ງເຂົ້າມາປົກຄອງລາວໄລຍະທຳອິດ, ປະຊາຊົນຍັງຕັ້ງບ້ານເຮືອນກະແຈກກະຈາຍ ແລະ ຍັງບໍ່ທັນຕັ້ງຊື່ບ້ານນາບອນ, ມີຊາຍຄົນໜຶ່ງຊື່ວ່າ: ທ້າວ ເສນ ປະຊາຊົນພາຍໃນບ້ານເອີ້ນວ່າ:“ຢະເສນ”ຊຶ່ງຄຳວ່າ“ຢະ”ໃນພາສາຊົນເຜົ່າແງະ ແປວ່າເຈົ້າກົກເຈົ້າເລົ່າ ຫຼືພໍ່ແມ່ເຖົ້າແກ່ອາວຸໂສເປັນຜູ້ທີ່ມີວິຊາອາຄົມໃນບ້ານ, ຕໍ່ມາມີປີໜຶ່ງປະຊາຊົນພາຍໃນບ້ານເກີດມີການລົ້ມຕາຍໂດຍບໍ່ຮູ້ສາເຫດ ແລະມີລັກສະນະການຕາຍແບບແປກໆ; ດັ່ງນັ້ນປະຊາຊົນຈຶ່ງສົງໄສວ່າສາເຫດອາດເປັນຍ້ອນທ້າວ ຢະເສນ ເພາະລາວເປັນຄົນມີວິຊາອາຄົມ ແລະກ່າວຫາລາວວ່າລາວເປັນປອບ (ຕາມຄວາມເຊື່ອຂອງທ້ອງຖິ່ນ) ຈຶ່ງພາກັນລວມຕົວກັນຈັບເອົາ ທ້າວ ຢະເສນ ໄປຂ້າໂດຍການຕັດຄໍທີ່ນໍ້າຕົກຕາດແຫ່ງໜຶ່ງທີ່ບໍລິເວນສົ້ນບ້ານ ແລະປະຊາຊົນຈຶ່ງເອີ້ນວ່າ: ນໍ້າຕົກຕາດເສນຈົນຮອດເທົ່າທຸກວັນນີ້.

_____________

ໂດຍ: ວົງມະນີ

แชร์