ຝຶກອົບຮົມການທ່ອງທ່ຽວແບບຍືນຍົງ

  ເມື່ອອາທິດຜ່ານມາກົມກວດກາປ່າໄມ້ກະຊວງກະສິກໍາ ແລະປ່າໄມ້ສົມທົບກັບກອງກວດກາປ່າໄມ້ພະແນກກະສິກໍາ ແລະປ່າໄມ້ ແຂວງຫຼວງພະບາງ,ພະແນກຖະແຫຼງຂ່າວ,ວັດທະນະທໍາ ແລະທ່ອງທ່ຽວແຂວງຫຼວງພະບາງ ຈັດກອງປະຊຸມຝຶກອົບຮົມການທ່ອງທ່ຽວແບບຍືນຍົງໃຫ້ແກ່ບັນດາໄກ້ນໍາທ່ຽວໃນ ສປປ ລາວ ກ່ຽວກັບການຫຼຸດຜ່ອນຊື້-ຂາຍຜະລິດຕະພັນສັດປ່າທີ່ຜິດກົດໝາຍໂດຍການເປັນປະທານຂອງ ທ່ານ ບຸນມີ ສະຫວັດ ຮອງຫົວໜ້າພະແນກກະສິກໍາ ແລະ ປ່າໄມ້, ທ່ານນາງ ຫຼອມຄໍາ ແສງຈັນອຸດົມ ຮອງຫົວໜ້າກົມກວດກາປ່າໄມ້ ກະຊວງກະສິກໍາ ແລະປ່າໄມ້, ທ່ານ ສຸລິທິບ ໜໍ່ຄູນຜົນ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຫຼວງພະບາງ ມີບັນດາຜູ້ຕາງໜ້າຈາກພະແນກການຂະແໜງການອົງການສະຖານທູດ ແລະໄກ້ນໍາທ່ຽວຈາກບໍລິສັດກ່ຽວຂ້ອງເຂົ້າຮ່ວມ.

  ກອງປະຊຸມຝຶກອົບຮົມໃຫ້ບັນດາໄກ້ນໍາທ່ຽວຄັ້ງນີ້ເພື່ອຈະແກ້ໄຂບັນຫາຄວາມຕ້ອງການໃນການຊື້-ຂາຍຜະລິດຕະພັນສັດປ່າທີ່ຜິດກົດໝາຍໂດຍຈະເພີ່ມທະວີການປູກຈິດສຳນຶກ ແລະຊີ້ນຳບັນດາໄກ້ນຳທ່ຽວກ່ຽວກັບວິທີທີ່ຈະເຮັດໃຫ້ໄກ້ນຳທ່ຽວມີຄວາມຮັບຜິດຊອບໃນການປະຕິເສດຊື້-ຂາຍຜະລິດຕະພັນສັດປ່າທີ່ຜິດກົດໝາຍທັງຍັງຈະເປີດໂອກາດໃຫ້ມີການພົວພັນກັບບັນດາຄູ່ຮ່ວມງານຂອງລັດຖະບານທ້ອງຖິ່ນໃນການຈັດຕັ້ງຫຼາຍພາກສ່ວນຮ່ວມກັບກອງກວດກາປ່າໄມ້ແຂວງ ແລະພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງລວມທັງສະພາການຄ້າຈີນຢູ່ແຂວງຫຼວງພະບາງ.

  ຂະແໜງການທ່ອງທ່ຽວເປັນຂະແໜງໜຶ່ງທີ່ມີບົດບາດສຳຄັນທີ່ຈະຊ່ວຍຫຼຸດຜ່ອນຄວາມຕ້ອງການຜະລິດຕະພັນສັດປ່າຜິດກົດໝາຍລະຫວ່າງນັກທ່ອງທ່ຽວໂດຍເພີ່ມການປູກຈິດສຳນຶກເພື່ອເສີມສ້າງຄວາມຮັບຜິດຊອບ ແລະຄວາມອາດສາມາດໃນການທ່ອງທ່ຽວຊຶ່ງບັນດາໄກ້ນຳທ່ຽວເປັນຜູ້ທີ່ມີການຕິດຕໍ່ພົວພັນໂດຍກົງກັບບັນດານັກທ່ອງທ່ຽວມີບົດບາດສຳຄັນໃນການຫັນປ່ຽນເພື່ອຫຼຸດຜ່ອນຄວາມຕ້ອງການຜະລິດຕະພັນສັດປ່າທີ່ຜິດກົດໝາຍ.

   ກອງປະຊຸມຄັ້ງນີ້ຈຸດປະສົງເພື່ອສ້າງຄວາມເຂັ້ມແຂງໃຫ້ແກ່ໄກ້ນໍາທ່ຽວໃນການປູກຈິດສໍານຶກໃຫ້ແກ່ນັກທ່ອງທ່ຽວໃນການປະຕິເສດການຊື້-ຂາຍຜະລິດຕະພັນສັດປ່າ ໂດຍສະເພາະນັກທ່ອງທ່ຽວຊາວຈີນທີ່ເດີນທາງເຂົ້າມາ ສປປ ລາວ ເພື່ອປູກຈິດສໍານຶກໃຫ້ແກ່ບັນດາບໍລິສັດທ່ອງທ່ຽວບໍ່ໃຫ້ຊື້ຜະລິດຕະພັນສັດນໍ້າ ແລະ ສັດປ່າກັບບ້ານ ເສີມສ້າງການຮ່ວມມືໃນການບັງຄັບໃຊ້ກົດໝາຍເພື່ອຕ້ານການຄ້າ-ຂາຍສັດປ່າຂ້າມຊາດ, ລົງນາມຮ່ວມພັນທະສັນຍາໃນການຕ້ານການຄ້າ-ຂາຍສັດປ່າທີ່ຜິດກົດໝາຍໃນ ສປປ ລາວ.

___________

ຂຽນໂດຍ: ຈຳປາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์