ຫຼວງພະບາງມອບ-ຮັບໜ້າທີ່ ຫົວໜ້າພະແນກສາທາ

 ພິທີມອບ-ຮັບຫົວໜ້າພະແນກສາທາລະນະສຸກ ແຂວງຫຼວງພະບາງ ລະຫວ່າງຜູ້ເກົ່າ ແລະຜູ້ໃໝ່ໄດ້ຈັດຂຶ້ນວັນທີ 25 ທັນວາ 2019 ນີ້ທີ່ພະແນກດັ່ງກ່າວໂດຍການເປັນປະທານຂອງ ທ່ານ ສາຍສະໝອນ ຄົມທະວົງ ຮອງປະທານສະພາປະຊາຊົນແຂວງ,ມີຕາງໜ້າກະຊວງສາທາລະນະສຸກ,ພະແນກການຂອງແຂວງ,ຊ່ຽວຊານ, ຫົວ ໜ້າຫ້ອງການສາທາລະນະສຸກເມືອງ, ນະຄອນ, ໂຮງໝໍພ້ອມດ້ວຍຫົວໜ້າຂະແໜງການພາຍໃນພະແນກສາທາລະນະສຸກແຂວງເຂົ້າຮ່ວມ.

  ທ່ານ ດຣ ອຳພອນ ພະລາມມີໄຊ ຫົວໜ້າພະແນກສາທາລະນະສຸກແຂວງຜູ້ເກົ່າໄດ້ຂຶ້ນຜ່ານຜົນງານການເຄື່ອນໄຫວ ແລະການຊີ້ນໍາໆພາຈັດຕັ້ງປະຕິບັດວຽກງານໃນຂົງເຂດສາທາລະນະສຸກ ແຂວງຫຼວງພະບາງ ຕະຫຼອດໄລຍະ 36 ປີຜ່ານມາໂດຍທ່ານໄດ້ສຸມສະຕິປັນຍາເຫື່ອແຮງເຂົ້າໃນພະລະກິດທີ່ພັກ-ລັດ ກໍຄືແຂວງຫຼວງພະບາງ ມອບໝາຍໃຫ້ເຫັນວ່າມີຜົນສຳເລັດຫຼາຍດ້ານ ແລະມີການພັດທະນາດີຂຶ້ນເຊັ່ນ: ຕາໜ່າງສາທາລະນະສຸກໄດ້ຮັບການຂະຫຍາຍຕົວ, ປະຊາເຂົ້າເຖິງການບໍລິການໆປິ່ນ ປົວ,ອັດຕາການຕາຍຂອງແມ່ ແລະເດັກນ້ອຍຫຼຸດລົງ, ວຽກງານແຕ່ລະດ້ານໄດ້ຮັບການປັບປຸງ ແລະຫັນໄປສູ່ທັນສະໄໝເທື່ອລະກ້າວ.

  ຈາກນັ້ນ, ຕາງໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງຂອງຄະນະເລຂາທິການສູນກາງພັກວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບຳ ນານ ແລະຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກຜ່ອນຮັບອຸດໜູນບຳນານພາຍຫຼັງອາຍຸເຖິງກະ ສຽນໃນການປະຕິບັດໜ້າທີ່ຕາມກົດໝາຍລັດຖະກອນໄດ້ກຳນົດໄວ້ໂດຍໄດ້ຕົກລົງອະນຸມັດໃຫ້ທ່ານ ດຣ ອຳພອນ ພະລາມມີໄຊ ຫົວໜ້າພະແນກສາທາລະນະສຸກແຂວງຫຼວງພະບາງ ອອກພັກການ-ຮັບອຸດໜູນບຳນານ, ຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການແຕ່ງຕັ້ງຮັກສາການຫົວໜ້າພະແນກສາທາລະນະສຸກ ແຂວງຫຼວງພະບາງ, ເຈົ້າແຂວງຕົກລົງເຫັນດີແຕ່ງຕັ້ງ ທ່ານ ດຣ ຄຳສອນ ພົງສະຫວັດດີ ຂຶ້ນເປັນຮັກສາການຫົວໜ້າພະແນກສາທາລະນະສຸກແຂວງຫຼວງພະບາງ.

  ຈາກນັ້ນຫົວໜ້າພະແນກສາທາລະນະສຸກແຂວງຫຼວງພະບາງຜູ້ເກົ່າ ແລະຜູ້ໃໝ່ໄດ້ລົງນາມເຊັນບົດບັນທຶກມອບ-ຮັບໜ້າທີ່ໂດຍມີຮອງເລຂາພັກແຂວງປະທານສະພາປະຊາຊົນແຂວງພ້ອມດ້ວຍພາກສ່ວນທີ່ກ່ຽວຂ້ອງຂອງ ແລະພະນັກງານພາຍໃນຂົງເຂດສາທາລະນະສຸກເຂົ້າຮ່ວມເປັນຂີພິຍານ.

_____________

ຂຽນໂດຍ: ແຫຼ້ ສຸລິນພອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 27/12/2019