ລາວເວີນ ຈັບສະຫຼາກມອບໂຊກລູກຄ້າ

  ບໍລິສັດລາວເວີນ ມະຫາຊົນ ໄດ້ຈັດກິດຈະກຳຈັບສະຫຼາກມອບໂຊກຄືນກຳໄລໃຫ້ລູກຄ້າໃນໂອກາດສະເຫຼີມສະຫຼອງວັນສ້າງຕັ້ງຄົບຮອບ 15 ປີ ເພື່ອເປັນການສະແດງວິໄສທັດພັດທະນາໃຫ້ແກ່ຫົວໜ່ວຍທຸລະກິດ ແລະຜົນງານແຫ່ງການພັດທະນາເຕີບໃຫຍ່ຂະຫຍາຍຕົວທີ່ຜ່ານມາ.

  ພິທີຈັບສະຫຼາກລາງວັນໄດ້ຈັດຂຶ້ນວັນທີ 25 ທັນວາ 2019 ທີ່ສູນການລາວ-ໄອເຕັກ ນະຄອນຫຼວງວຽງຈັນ ໂດຍເຂົ້າຮ່ວມທ່ານ ສີບຸນທຳ ສີບຸນມີ ອຳນວຍການໃຫຍ່ບໍລິສັດລາວເວີນມະຫາຊົນ, ທ່ານ ຄໍາເຟືອງ ດວງບຸດດີ ຮອງຜູ້ອໍານວຍການໃຫຍ່ຝ່າຍການເງິນ-ການບັນ ຊີບໍລິສັດລາວເວີນ ມະຫາຊົນ ມີບັນດາຜູ້ຕາງໜ້າສູນການຄ້າອ້ອມຂ້າງ ແລະມວນຊົນເຂົ້າຮ່ວມ.

  ເພື່ອເປັນການສະແດງຜົນງານແຫ່ງການພັດທະນາເຕີບໃຫຍ່ຂະຫຍາຍຕົວຂອງບໍລິສັດລາວເວີນມະຫາຊົນ ໃນ 15 ປີຜ່ານມາ ຈຶ່ງໄດ້ສະເຫຼີມສະຫຼອງ ແລະມີສິນຄ້າສ່ວນຫຼຸດຫຼາຍຢ່າງໃນບັນດາສູນການຄ້າຂອງບໍລິສັດ ລາວເວີນ ມະຫາຊົນທຸກສາຂາເຊັ່ນ: ສູນການຄ້າລາວ-ໄອເຕັກ, ສູນການຄ້າໄອເຕັກມໍ, ສູນການຄ້າທົ່ງຂັນຄຳ, ສູນການຄ້າສະຫວັນ-ໄອເຕັກ ແລະສວນນໍ້າທີ່ໄດ້ຈັດກິດຈະກຳງານວາງສະແດງ ແລະຂາຍຜະລິດຕະພັນທີ່ຜ່ານມາເພື່ອໃຫ້ມວນຊົນໄດ້ເຂົ້າສຳພັດຊື້ເຄື່ອງອຸປະໂພກບໍລິໂພກໃນນີ້ສຳລັບລູກຄ້າທ່ານໃດໄດ້ຊື້ສິນຄ້າພາຍໃນງານມູນຄ່າ 1 ແສນກີບ ຂຶ້ນໄປແມ່ນໄດ້ຮັບຄູ່ປ໋ອງຮ່ວມຈັບສະຫຼາກລຸ້ນຮັບລາງວັນເຊັ່ນ: ລາງວັນທີ 1 ລົດໃຫຍ່ ຊູຊູກິ ມູນຄ່າ 141 ລ້ານກີບ, ລາງວັນ 2 ລົດຈັກໂຄລາວຈຳນວນ 2 ລາງວັນ, ລາງວັນທີ3 ທອງຄໍາໜັກ 1 ບາດຈຳນວນ2 ລາງວັນ ແລະລາງວັນທີ 4 ໂທລະພາບ 49 ນິ້ວ ຈໍານວນ 2 ລາງວັນ ແລະລາງວັນອື່ນໆ ລວມມູນຄ່າທັງໝົດ 174 ກວ່າລ້ານກີບ.

ຜ່ານການຈັບສະຫຼາກຜູ້ໂຊກດີໄດ້ລາງວັນທີ 1 ລົດໃຫຍ່ຊູຊູກິໄດ້ແກ່ທ້າວ ອານຸລັກ ຊົມສີຫາປັນຍາ ບ້ານຮ່ອງຄ້າ ເມືອງຈັນທະບູລີ, ລາງວັນທີ 2 ລົດຈັກໂຄລາວໄດ້ທ້າວ ພອນຈະເລີນ ພິມມະສອນ ບ້ານໄຮ່ ເມືອງໄຊທານີ ແລະ ນາງ ພຸດດາວັນ ຄຳເພັງໄຊບ້ານນາຊອນ ເມືອງປາກງື່ມ ສ່ວນລາງວັນທີ 3 ສາຍ ຄໍຄຳໜັກໜຶ່ງບາດໄດ້ແກ່ ນາງ ແສງດາ ວອນເລີດຖາວອນ ບ້ານຫົວຂົວ ເມືອງຈັນທະບູລີ ແລະນາງ ວິລະສັກ ແກ້ວພິລາວົງ ບ້ານດົງນາໂຊກ ເມືອງສີໂຄດຕະບອງ ນະຄອນຫຼວງວຽງຈັນ.

__________

ຂຽນໂດຍ: ແພງຕາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์