ພູຄູນທຳລາຍສັດປ່າຫຼາຍລາຍການ

  ວັນທີ 19 ທັນວາ 2019 ເຈົ້າໜ້າທີ່ປ່າໄມ້ຫ້ອງການກະສິກຳ ແລະປ່າໄມ້ເມືອງພູຄູນ ແຂວງຫຼວງພະບາງ ຮ່ວມກັບຫ້ອງການທີ່ກ່ຽວຂ້ອງຂອງເມືອງໄດ້ຈັດພິທີຈູດທຳລາຍສັດປ່າປະເພດຫວງຫ້າມທີ່ຢຶດໄດ້ຈາກການລະເມີດລະບຽບກົດໝາຍທ່ີບຸກຄົນໄດ້ລັກລອບຄ້າ-ຂາຍຕາມຈຸດຕ່າງໆພາຍໃນເມືອງໃຫ້ກຽດເຂົ້າຮ່ວມ.

  ໃນພິທີດັ່ງກ່າວມີທ່ານ ທອງຈັນ ແພງຈັນທີ ຮອງເຈົ້າເມືອງພູຄູນມີບັນດາຫ້ອງການທີ່ກ່ຽວຂ້ອງ, ຜູ້ຕາງໜ້າຈາກພະແນກກະສິກຳ ແລະປ່າໄມ້ແຂວງ ແລະພະນັກ ງານວິຊາການເຂົ້າຮ່ວມ.

  ທ່ານ ຂັນທອງ ຈັນທະວິໄລ ຫົວໜ້າຫ້ອງການກະສີກຳ ແລະປ່າໄມ້ເມືອງໄດ້ໃຫ້ຮູ້ວ່າ: ໂດຍຈັດຕັ້ງປະຕິບັດຕາມກົດໝາຍວ່າດ້ວຍສັດນໍ້າ-ສັດປ່າຢ່າງເຂັ້ມງວດເຈົ້າໜ້າທີປ່າໄມ້ສົບທົບກັບພາກສ່ວນທີ່ກ່ຽວຂ້ອງໄດ້ເອົາໃຈໃສ່ເປັນເຈົ້າການໃນການຕິດຕາມສະກັດກັ້ນການລ່າ,ກວດກາຂະບວນການລັກລອບຊື້-ຂາຍສັດນໍ້າ-ສັດປ່າປະເພດຫວງຫ້າມຕາມຈຸດຕະຫຼາດ, ຈຸດຕ່າງໆຂອງບ້ານ ແລະ ໄດ້ຢຶດອາຍັດເປັນຂອງກາງຊຶ່ງສັດປ່າທີນຳມາທຳລາຍໃນຄັ້ງນີ້ມີຟານ 2 ໂຕ, ຊິ້ນສ່ວນຊີ້ນຟານ 8 ກິໂລ, ເຫງັນ 2 ໂຕ ແລະບ່າງຈຳນວນ 1 ໂຕ.

____________

ຂຽນໂດຍ: ວັນທຽນ ຄຳທະສິດ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 27/12/2019