ປະຊາຊົນຜູ້ປູກຝ້າຍຢູ່ຫົງສາ ເລີ່ມຂາຍຜົນຜະລິດ

  ໃນວັນທີ  23 ທັນວາ 2019 ກຸ່ມ ສະຫະກອນສົ່ງເສີມກະສິກຳ ເມືອງຫົງສາ ແຂວງໄຊຍະບູລີ ລົງເກັບຊື້ຜົນຜະລິດຝ້າຍຈາກສະມາຊິກ, ຊຶ່ງນໍາພາໂດຍທ່ານ ນາງ ແກ້ວຄໍາໃສ ຟອງຄໍາໃບ ໜ່ວຍງານພັດທະນາອາຊີບສ້າງເຂັ້ມແຂງກຸ່ມປູກຝ້າຍສະຫະກອນສົ່ງເສີມກະສິກຳເມືອງຫົງສາ ພ້ອມດ້ວຍຄະນະມີສະມາຊິກກຸ່ມເຂົ້າຮວ່ມ.

ປະຈຸບັນສະຫະກອນສົ່ງເສີມກະສິກຳໂດຍສະເພາະກຸ່ມສົ່ງເສີມການປູກຝ້າຍມີສະມາຊິກກວມເອົາ 2 ເມືອງ, ສະມາຊິກກຸ່ມປູກຝ້າຍເມືອງຫົງສາປະກອບມີບ້ານນາແກ່ນຄໍາ, ນໍ້າແກນ, ຫ້ວຍໃຍ ແລະບ້ານກີ່ວສາລາ, ສະມາຊິກກຸ່ມປູກຝ້າຍເມືອງເງິນປະກອບມີບ້ານນໍ້າທົນ, ບ້ານທອງ ແລະ ບ້ານກາງ, ມີສະມາຊິກທັງໝົດ 66 ຄົນ, ໃນການລົງເກັບຊື້ຜົນຜະລິດຝ້າຍໃນຄັ້ງນີ້ແມ່ນໄດ້ແຍກປະເພດຝ້າຍອອກເປັນ 2 ຊະນິດເຊັ່ນຝ້າຍຕຸ່ນ ແລະຝ້າຍຂາວຜ່ານການລົງເກັບຊື້ໄດ້ທັງໝົດ 874,5 ກິໂລ, ລວມ ເປັນເງິນ 6,3 ລ້ານກີບ,ນອກຈາກນັ້ນທັງກຸ່ມສະຫະກອນຍັງໄດ້ສົ່ງຄືນກໍາໄລໃຫ້ແກ່ສະມາຊິກ 5% ຕໍ່ປີ,ການຊຸກຍູ້ການຜະລິດ ແລະເກັບຊື້ຝ້າຍຂອງກຸ່ມສະຫະກອນສົ່ງ ເສີມກະສິກຳເມືອງຫົງສາແມ່ນໄດ້ເລີ່ມຕົ້ນມາແຕ່ປີ 2013 ເປັນຕົ້ນມາຈົນເຖິງປະຈຸບັນ.

-------- 

ຈຸດປະສົງຂອງການສ້າງກຸ່ມສະຫະກອນການປູກຝ້າຍແມ່ນເພື່ອເຮັດໃຫ້ປະຊາຊົນທີ່ຖືກໂຍກຍ້າຍຈັນສັນໃນຈໍານວນ 450 ຄອບຄົວ ແລະບ້ານທີ່ມີເງື່ອນໄຂທໍາການຜະ ລິດ, ພ້ອມທັງຊົດເຊີຍເນື້ອທີ່ດິນ 2 ເຮັກຕາ, ເພື່ອນໍາໃຊ້ໃນການປູກພືດຜັກ, ສົ່ງເສີມການປູກຝ້າຍ ແລະອະນຸລັກຮັກສາສີມືໃນການຜະລິດຝ້າຍພື້ນເມືອງ, ການຍ້ອມ ສີ, ການຕໍ່າແຜ່ນແຜໃຫ້ຍັງຄົງຢູ່ກັບທ້ອງຖິ່ນເວົ້າສະເພາະກໍ່ແມ່ນຢູ່ພາຍໃນເມືອງຫົງສາ, ເພື່ອຕອບສະໜອງຄວາມຮຽກຮ້ອງຕ້ອງການວັດຖຸດິບຕາມທອ້ງຕະຫຼາດສາ ມາດຂາຍອອກທັງພາຍໃນ ແລະຕ່າງປະເທດໄດ້, ເພື່ອເຮັດໃຫ້ປະຊາຊົນມີອາຊີບຄົງທີ່ ແລະມີລາຍຮັບເພີ່ມຂຶ້ນ.

---------------

ຂຽນໂດຍ: ບຸນປອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์