ລົດໄຟລາວ-ຈີນ ຊ້ວງຫຼວງນໍ້າທາສຳເລັດເກືອບ 90% ສ່ວນປະຊາຊົນຮັບຊົດເຊີຍແລ້ວ 208 ຄອບຄົວ

 ວັນທີ 25 ທັນວາ 2019 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະຫົວ ໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ພ້ອມຄະນະໄດ້ໄປຢ້ຽມຢາມ ແລະຊຸກຍູ້ວຽກງານການກະ ກຽມກອງປະຊຸມໃຫຍ່ 3 ຂັ້ນ ຂອງພັກ ແລະຊຸກຍູ້ການກໍ່ສ້າງທາງລົດໄຟໂຄງການກໍ່ສ້າງທາງລົດໄຟລາວ-ຈີນ ຢູ່ແຂວງຫຼວງນໍ້າທາ ໂດຍມີທ່ານ ບຸນຍີ່ ແກ້ວຄູນເມືອງ ຮອງເຈົ້າແຂວງຫຼວງນໍ້າທາ, ພ້ອມນີ້ກໍມີພະນັກງານຫຼັກແຫຼ່ງ, ພວກສ່ວນທີ່ກ່ຽວຂ້ອງໃຫ້ການຕ້ອນຮັບ ແລະຮ່ວມເຮັດວຽກ.

  ໃນການລົງຢ້ຽມຄັ້ງນີ້ຫຼັງຈາກຮັບຟັງລາຍງານສະພາບການພັດທະນາເສດຖະກິດຂອງແຂວງໃນໄລຍະຜ່ານມາຈາກ ທ່ານ ບຸນຍີ່ ແກ້ວຄູນເມືອງ ກໍໄດ້ຮັບຟັງລາຍງານຄວາມຄືບໜ້າຂອງໂຄງການກໍ່ສ້າງທາງລົດໄຟລາວ-ຈີນ ຊ້ວງຜ່ານແຂວງຫຼວງນໍ້າທາ ຈາກທ່ານ ທອງແດງ ສິດທິສົນ ຫົວໜ້າຄະນະໄກ່ເກ່ຍ ແລະເບີກຈ່າຍຜົນກະທົບໂຄງການຮູ້ວ່າ: ທາງລົດໄຟລາວ-ຈີນມີຄວາມຍາວທັງໝົດ 409 ກິໂລແມັດ, ໃນນີ້ຜ່ານ ແຂວງຫຼວງນໍ້າທາ 16,9 ກິໂລແມັດ ປະ ກອບມີ 2 ສະຖານນີຄື: ສະຖານີບໍ່

ເຕ່ນແລະສະຖານີນາເຕີຍ,ກໍ່ສ້າງອຸໂມງ 3 ແຫ່ງຄື: ອຸໂມງມິດຕະພາບລາວ-ຈີນ,ອຸໂມງບໍ່ເຕ່ນ ແລະອຸໂມງຕີນຕົກມີຄວາມຍາວທັງໝົດ 10,05 ກິໂລແມັດ, ເຈາະໄດ້ 9,3 ກິໂລແມັດ ເທົ່າກັບ 93,1% ມາເຖິງປະຈຸບັນບໍລິສັດກໍ່ສ້າງທາງລົດໄຟເລກ 5 ແລະ ບໍລິສັດກໍ່ສ້າງທາງລົດໄຟເລກ 2 (ຜູ້ຮັບເໝົາກໍ່ສ້າງຈາກ ສປ ຈີນ ທີ່ກໍ່ສ້າງສັນຍາຊ່ວງທີ 1) ໄດ້ສໍາເລັດການເຈາະອຸໂມງແລ້ວ 2 ແຫ່ງຄື: ອຸໂມງບໍ່ເຕ່ນ ແລະ ອຸໂມງຫີນຕົກ,ສະເລ່ຍຄວາມຄືບໜ້າໃນການກໍ່ສ້າງທາງລົດໄຟລາວ-ຈີນ ຊ່ວງຜ່ານແຂວງຫຼວງນໍ້າທາມາເຖິງປະຈຸບັນສໍາເລັດແລ້ວ 89% ໃນນັ້ນຍັງບໍ່ທັນລວມວຽກຕິດຕັ້ງລາງລົດໄຟຟ້າ ແລະລະບົບໄຟຟ້າເພື່ອສະໜອງໃຫ້ລົດໄຟ.

  ສ່ວນວຽກງານໄກ່ເກ່ຍແກ້ໄຂຜົນກະທົບຄະນະກຳມະການໄກ່ເກ່ຍຂັ້ນແຂວງ, ເມືອງກໍ່ໄດ້ເອົາໃຈໃສແລະມີຜົນຢ່າງຕໍ່ເນື່ອງມາຮອດທ້າຍເດືອນກັນຍາປີ 2019 ກໍ່ສາ ມາດມອບພື້ນທີ່ໃຫ້ໂຄງການໄດ້ດໍາເນີນການກໍ່ສ້າງ 100% ຂອງແລວທາງລົດໄຟທີ່ມີຄວາມຍາວທັງໝົດຜ່ານແຂວງຊຶ່ງແຂວງຫຼວງນ້ຳທາໄດ້ຮັບເງິນຊົດເຊີຍຈາກສູນ ກາງແລ້ວທັງໝົດ 6 ງວດລວມມູນຄ່າທັງໝົດ 118,6 ຕື້ກີບ, ຄະນະຮັບຜິດຊອບເບີກຈ່າຍຄ່າຊົດເຊີຍ ແຂວງຫຼວງນ້ຳທາກໍ່ໄດ້ດຳເນີນການເບີກຈ່າຍໃຫ້ແກ່ຜູ້ທີ່ໄດ້ຮັບຜົນກະທົບທີ່ ມອບພື້ນທີ່ໃຫ້ໂຄງການໄດ້ດຳເນີນການກໍ່ສ້າງກ່ອນ 208 ຄອບຄົວ ເທົ່າກັບ 66,4% ຂອງມູນຄ່າທີໄດ້ຮັບຜົນກະທົບທັງໝົດ 178,5 ຕື້ກີບ ໃນຈໍານວນ 321 ຄອບຄົວ,ນອກນັ້ນຍັງໄດ້ນຳໃຊ້ເງິນຈຳນວນດັ່ງກ່າວເຂົ້າໃນການກໍ່ສ້າງສາລາເຢັນ,ຍ້າຍປ່າຊ້າບ້ານນາເຕີຍ ແລະແຜນຈະຈ່າຍໃນງວດທີ 7 ຈໍານວນ 13,2 ຕື້ກີບ.

 ພາຍຫຼັງທີ່ໄດ້ຮັບຟັງການລາຍງານສະພາບການຕ່າງໆແລ້ວທ່ານ ບຸນທອງ ຈິດມະນີ ກໍໄດ້ໃຫ້ກຽດໂອ້ລົມ ແລະມີທິດຊີ້ນຳຕໍ່ຄະນະພັກ-ຄະນະນໍາຂອງແຂວງໂດຍໄດ້ສະ ແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳແຂວງທີ່ໄດ້ມີຄວາມຕັດສິນໃຈສູງໃນການຊີ້ນຳ-ນຳພາວຽກງານຮອບດ້ານ, ໂດຍສະເພາະການກະກຽມກອງປະຊຸມ 3 ຂັ້ນແມ່ນໃຫ້ສຸມໃສ່ຫຼາຍວຽກງານຢ່າງມີຄວາມຄືບໜ້າສ່ວນການກໍ່ສ້າງທາງລົດໄຟລາວ-ຈີນທ່ານໄດ້ເນັ້ນໜັກໃຫ້ຄະນະຮັບຜິດຊອບເອົາໃຈໃສ່ສໍາຫຼວດຄືນການອອກແບບກໍ່ສ້າງ ແລະ ການຂະຫຍາຍສະຖານີນາເຕີຍໃຫ້ມີຄວາມເໝາະສົມ, ສາມາດຮອງຮັບການພັດທະນາທີ່ຈະມີຂຶ້ນໃນອະນາຄົດ ແລະ ສາມາດຮອງຮັບກັບຄວາມຮຽກຮ້ອງຕ້ອງການໃນການເຊື່ອມໂຍງກັບປະເທດໃກ້ຄຽງກໍ່ຄືພາກພື້ນ ແລະສາກົນໃນອະນາຄົດ.

  ຈາກນັ້ນທ່ານຍັງໄດ້ນຳພາຄະນະເດີນທາງຢ້ຽມຢາມ, ກວດກາການກໍ່ສ້າງຕົວຈິງ ແລະຊຸກຍູ້ການກໍ່ສ້າງທາງລົດໄຟຢູ່ສະຖານີບໍ່ເຕ່ນ ແລະສະຖານີນາເຕີມຕື່ມອີກ.

-----------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์