ເຄແອນບີ ເລັ່ງຜະລິດສິນຄ້າ ຮ່ວມງານວາງສະແດງຜະລິດຕະພັນເຟີນີເຈີໄມ້ລາວ

   ເພື່ອປະກອບສ່ວນໃນງານວາງສະແດງຜະລິດຕະພັນໄມ້ລາວຄັ້ງທີ 6 ໃຫ້ມີຄວາມຄຶກຄັກໂຮງງານເຄແອນບີເຟີນີເຈີໄດ້ເລັ່ງພະນັກງານຜະລິດເຄື່ອງເຟີນິເຈີຄົບວົງ ຈອນ 100 ກວ່າລາຍການເພື່ອເຂົ້າງານດັ່ງກ່າວທັງນີ້ຈະມີການຫຼຸດແລກແຈກແຖມເປັນພິເສດເພື່ອຕ້ອນຮັບຕົ້ນປີ 2020 ທັງເປັນການຄືນກຳໄລໃຫ້ກັບລູກຄ້າທີ່ມາຮ່ວມງານ.

ທ່ານ ກອງມາລາ ພົມມະໄລ ຮອງປະທານສະມາຄົມເພີນີເຈີລາວທັງເປັນເຈົ້າຂອງໂຮງງານເຄແອນບີເຟີນີເຈີເປີດເຜີຍຕໍ່ທີມຂ່າວພວກເຮົາວ່າ: ເພື່ອປະຕິບັດຕາມທິດນະ ໂຍບາຍໃນການສົ່ງເສີມການຜະລິດເຄື່ອງເຟີນີເຈີໄມ້ລາວທັງເປັນການໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ຜະລິດຕະພັນເຟີນີເຈີໄມ້ລາວຫຼາຍຂຶ້ນໃຫ້ຜູ້ຜະລິດສາມາດເຂົ້າ ເຖິງຕະຫຼາດຈຳໜ່າຍສິນຄ້າໄດ້ທັງພາຍໃນ ແລະ ຕ່າງປະເທດກ້າວເຂົ້າໄປສູ່ການສ້າງຕາໜ່າງວາງສະແດງ-ຂາຍສິນຄ້າເພີນີເຈີກັບພາກພື້ນ ແລະ ສາກົນໃນອະນາຄົດສະມາຄົມເຟີນີເຈີລາວຈະຈັດງານວາງສະແດງຜະລິດຕະພັນເຟີນີເຈີໄມ້ລາວຄັ້ງທີ 6 ປະຈຳປີ 2020 ຂຶ້ນໃນລະ ຫວ່າງວັນທີ 11-19 ມັງກອນ 2020 ທີ່ສູນການຄ້າລາວ-ໄອເຕັກນະຄອນຫຼວງວຽງຈັນ.

 ເພື່ອປະກອບສ່ວນເຮັດງານໃຫ້ງານວາງສະແດງດັ່ງກ່າວມີຄວາມໝາຍຄວາມສຳຄັນທັງສ້າງໃຫ້ມີບັນຍາກາດຄຶກຄັກກວ່າຫຼາຍຄັ້ງຜ່ານມາ ທ່ານ ກອງມາລາ ພົມມະໄລ ກ່າວວ່າ: ສະເພາະໂຮງງານເຄແອນບີເຟີນີເຈີເວລານີ້ກຳລັງເລັ່ງມືພະນັກງານກໍຄືນາຍຊ່າງພາຍໃນໂຮງງານໃຫ້ຜະລິດສິນຄ້ານັບຮ້ອຍລາຍການທີ່ອອກແບບໃຫ້ມີຄວາມທັນສະໄໝສວຍງາມອັນເປັນເອກະລັກຂອງລາວເຮົາເພື່ອເຂົ້າຮ່ວມງານວາງສະແດງດັ່ງກ່າວໂດຍຄາດວ່າຕະຫຼອດງານສິນຄ້າທີ່ນຳມາຈະສາມາດມັດໃຈຜູ້ມາທ່ຽວຊົມໄດ້ເປັນຢ່າງດີທັງນີ້ໄດ້ຕັ້ງເປົ້າໝາຍຍອດຂາຍ 80% ຂອງສິນຄ້າທີ່ນຳເຂົ້າຮ່ວມວາງສະແດງ.

 ສຳລັບໂຮງງານເຄແອນບີເຟີນີເຈີແມ່ນໄດ້ຜະລິດສິນຄ້າເຄື່ອງເຟີນີເຈີຄົບວົງຈອນຄຸນນະພາບດີສົມລາຄາອອກສູ່ສັງຄົມມາໄດ້ເຫີງນານໂດຍໄດ້ຮັບການສ້າງຕັ້ງຂຶ້ນມາແຕ່ປີ 1987 ນັບອາຍຸມາຮອດປະຈຸບັນນີ້ກໍປະມານ 30 ກວ່າປີແລ້ວ ແລະຖ້າຫາກທ່ານໃດທີ່ມີຄວາມສົນໃຈໃນສິນຄ້າຂອງເພີ່ນກໍສາມາດໄປຢ້ຽມຊົມ ຫຼືສັ່ງຈອງໄດ້ທີ່ໂຮງ ງານບ້ານໂສກປ່າຫຼວງ ເມືອງສີສັດຕະນາກ ນະຄອນຫຼວງວຽງຈັນ.

-----------------

ໜັງສືພີມເສດຖະກິດ-ສັງຄົມ

แชร์