2020 ກະຊວງການເງິນຈະປະຕິບັດ 12 ມາດຕະການເກັບລາຍຮັບໃຫ້ໄດ້ແຜນ

  ແຜນງົບປະມານແຫ່ງລັດປະຈໍາປີ 2020 ຂອງລັດຖະບານຈະສູ້ຊົນຈັດເກັບລາຍຮັບໃຫ້ໄດ້ 28.997 ຕື້ກີບ ເທົ່າກັບ 16,31% ຂອງຈີດີພີ ແລະລາຍຈ່າຍໃຫ້ຢູ່ໃນລະດັບ 35.693 ຕື້ກີບ ເທົ່າກັບ 20,08% ຂອງຈີດີພີ, ດັ່ງນັ້ນເພື່ອເຮັດແຜນການດັ່ງກ່າວບັນລຸຜົນກະຊວງການເງິນຈະປະຕິບັດ 12 ມາດຕະການ.

  ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນໄດ້ລາຍງານຕໍ່ກອງປະຊຸມການເງິນທົ່ວປະເທດປະຈໍາປີ 2019 ໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2020 ແມ່ນຈະປະຕິບັດ 12 ມາດຕະການໃນນັ້ນ 1) ສືບຕໍ່ສຸມໃສ່ຈັດຕັ້ງປະຕິບັດວຽກຈຸດສຸມໃນມະຕິ 7 ແລະ ມະຕິ 8 ຂອງພັກ, ກະ ຊວງການເງິນໄດ້ນໍາມາຈັດຕັ້ງຜັນຂະຫຍາຍເປັນວຽກລະອຽດເປັນຕົ້ນແມ່ນ: ແກ້ໄຂການຮົ່ວໄຫຼງົບປະມານ, ດໍາເນີນມາດຕະການປະຢັດການໃຊ້ຈ່າຍບໍລິຫານຢ່າງເຂັ້ມງວດປັບປຸງຍົກລະດັບການຄຸ້ມຄອງແຫຼ່ງລາຍຮັບງົບປະມານ, ແກ້ໄຂໜີ້ສິນສາທາລະນະ ແລະ ບັນຫາອື່ນໆທີ່ຕິດພັນທາງດ້ານງົບປະມານ; 2) ສືບຕໍ່ຈັດຕັ້ງປະຕິບັດຄໍາສັ່ງ ເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດ ຢູ່ ສປປ ລາວ ໃຫ້ມີຄວາມຄືບໜ້າ ແລະ ມີປະສິດທິຜົນໄວ; 3) ສຸມໃສ່ຜັນຂະຫຍາຍຄໍາສັ່ງນາຍົກລັດຖະມົນຕີວ່າດ້ວຍການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດໃຫ້ວ່ອງໄວ ແລະມີປະສິດທິຜົນຫຼາຍຂຶ້ນ; 4) ຮີບ ຮ້ອນຈັດຕັ້ງປະຕິບັດບັນດາກົດໝາຍທີ່ຮັບຮອງໃໝ່ໂດຍສະເພາະແມ່ນກົດໝາຍກ່ຽວຂ້ອງກັບສ່ວຍສາອາກອນໃຫ້ສາມາດປະຕິບັດໄດ້ແຕ່ຫົວທີ, ທົ່ວເຖິງ ແລະ ຮັດກຸມ, ພ້ອມທັງສືບຕໍ່ປັບປຸງ ແລະ ຜັນຂະຫຍາຍບາງນິຕິກໍາລຸ່ມກົດໝາຍໃຫ້ສອດຄ່ອງເພື່ອໃຫ້ສາມາດປະຕິບັດໄດ້ໂດຍໄວ.

 ສ່ວນມາດຕະການທີ 5) ສືບ ຕໍ່ເຮັດວຽກງານແນວຄິດການເມືອງຕໍ່ຄະນະພັກ-ຄະນະນໍາ, ສະມາຊິກພັກ, ພະນັກງານທຸກຂັ້ນຂອງສູນກາງ ແລະທ້ອງຖິ່ນໃຫ້ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບການມອບໝາຍ; 6) ຮີບຮ້ອນຈັດຕັ້ງປະຕິບັດຕາມແຜນປະຕິຮູບຂອງຂະແໜງການເງິນບາດກ້າວທີ 1 ໄລຍະ 2 ຫຼື (201 8-2025) ໂດຍສະເພາະແມ່ນໜ້າວຽກຈຸດສຸມທີ່ຈະຕ້ອງຈັດຕັ້ງປະຕິບັດໃນປີ 2020; 7)ສືບຕໍ່ສ້າງເງື່ອນໄຂເພື່ອກະກຽມຫັນກົງຈັກການຄຸ້ມຄອງການຈັດເກັບລາຍຮັບໃຫ້ລວມສູນຂຶ້ນກວ່າເກົ່າຈາກ 4 ກົມມາເປັນ 2 ກົມ ຮັບຜິດຊອບຈັດເກັບ, ສ່ວນກົມອື່ນແມ່ນເຮັດໜ້າທີ່ຊີ້ນໍາ ແລະຄຸ້ມຄອງມະຫາພາກ; 8) ສ້າງ, ຄຸ້ມຄອງ ແລະ ຂະຫຍາຍຖານລາຍຮັບງົບປະມານແຕ່ລະປະເພດໃຫ້ເປັນລະບົບຄົບຊຸດໂດຍນໍາໃຊ້ລະບົບທັນສະໄໝເພື່ອກໍາໃຫ້ໄດ້ແຫຼ່ງລາຍຮັບຕົ້ນຕໍແຕ່ລະປະເພດຂຶ້ນກັບແຕ່ລະຂະແໜ ງ ແລະທ້ອງຖິ່ນ; 9) ຮີບຮ້ອນປະສານສົມທົບ ແລະຊຸຍູ້ຂະແໜງການ ແລະທ້ອງຖິ່ນ, ຄົ້ນຄວ້າກົນໄກ, ມາດຕະການຕໍ່ກັບການແກ້ໄຂຜົນການກວດສອບໂດຍສະເພາະແມ່ນລາຍຮັບ-ລາຍ ຈ່າຍທີ່ຍັງບໍ່ທັນຫັນມາດຕະການລວມສູງເຂົ້າງົບປະມານໃຫ້ລວມສູນໄດ້ຢ່າງຄົບຖ້ວນ.

ສໍາລັບມາດຕະການທີ 10) ແມ່ນສືບຕໍ່ປະຕິບັດນະໂຍບາຍສົ່ງເສີມການຈັດເກັບລາຍຮັບຂອງຂະແໜງການ ແລະທ້ອງຖິ່ນທີ່ປະຕິບັດລາຍຮັບທີ່ຕົນຄຸ້ມຄອງໄດ້ເກີນແຜນໃຫ້ເໝາະສົມເພື່ອເປັນການກະຕຸກຊຸກຍູ້ໃຫ້ມີຄວາມຮັບຜິດຊອງສູງຂຶ້ນໃນການປະຕິບັດລາຍຮັບຕາມການມອບໝາຍ,ສ່ວນການແບ່ງປັນເງິນເກີນແຜນແມ່ນລັດຖະບານເປັນຜູ້ກໍານົດ; 11) ສືບຕໍ່ປະຕິບັດການບໍລິຫານໜີ້ສິນ ໂດຍສະເພາະແມ່ນການທົດແທນຕົ້ນທຶນໄວ້ຢູ່ແຫຼ່ງດຸ່ນດ່ຽງງົບປະມານ, ສ່ວນລາຍຈ່າຍດອກເບ້ຍແມ່ນປະຕິບັດຢູ່ພາກລາຍຈ່າຍເພື່ອໃຫ້ມີຄວາມຄ່ອງຕົວໃນການຊໍາລະໜີ້ສິນໃຫ້ທັນຕາມກໍານົດເວລາແລະສ້າງຄວາມເຊື່ອໝັ້ນຕໍ່ຜູ້ໃຫ້ກູ້ໂດຍສອດຄ່ອງຕາມກົດໝາຍວ່າດ້ວຍໜີ້ສິນສາທາລະນະ;12)ສໍາລັບບັນດາມາດຕະການລະອຽດດ້ານລາຍຮັບ-ລາຍຈ່າຍ,ການດຸ່ນດ່ຽງແລະບໍລິຫານໜີ້ສິນກະຊວງການເງິນຈະໄດ້ຄົ້ນຄວ້າອອກຄໍາແນະນໍາຈັດຕັ້ງປະຕິບັດແຜນປີ 2020 ເພື່ອເປັນພື້ນຖານໃນການຈັດຕັ້ງປະຕິບັດ.

-------------

ຂຽນໂດຍ: ກິ່ງລັດຕະນະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์