ປະກາດບ້ານນໍ້າສ່າ ເປັນບ້ານວັດທະນະທໍາ

 ພິທີປະກາດຮັບຮອງບ້ານນໍ້າສ່າ ເມືອງຫຼວງນໍ້າທາ ແຂວງຫຼວງນໍ້າທາ ເປັນບ້ານວັດທະນະທໍາ, ໄດ້ຈັດຂຶ້ນໃນວັນທີ 19 ທັນວາ 2019 ໂດຍການເຂົ້າຮ່ວມທ່ານ ວຽງຄໍາ ໄຊຍະວົງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ, ທ່ານ ສົມສະນິດ ຈັນທະຄໍາ ຫົວໜ້າຫ້ອງ ການສາທາລະນະສຸກເມືອງ, ມີອາດີດການນໍາແຂວງ, ຫົວໜ້າ-ຮອງຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງ, ອົງການປົກຄອງບ້ານ, ແຂກຖືກເຊີນຈາກບັນດາຫ້ອງການອ້ອມ ຂ້າງເມືອງ, ບ້ານໃກ້ຄຽງ, ຕະຫຼອດຮອດພໍ່ແມ່ປະຊາຊົນ ແລະອົງການຈັດຕັ້ງບ້ານເຂົ້າຮ່ວມ.

 ຕາງໜ້ານາຍບ້ານໆນໍ້າສ່າໄດ້ຜ່ານບົດສະຫຼຸບການຈັດຕັ້ງປະຕິບັດການສ້າງຄອບຄົວ, ບ້ານວັດທະນະທໍາ ແລະທິດທາງແຜນການໃນຕໍ່ໜ້າ, ບ້ານນໍ້າສ່າແມ່ນຊົນເຜົ່າອາຄາຕັ້ງຢູ່ເຂດຊົນນະບົດພູດອຍຫ່າງຈາກເທສະບານເມືອງຫຼວງນໍ້າທາ ໄປທາງທິດຕາເວັນຕົກສ່ຽງໃຕ້ປະມານ 13 ກິໂລແມັດ,ມີ 79 ຫຼັງຄາເຮືອນ,105 ຄອບຄົວ, ມີພົນລະເມືອງ 489 ຄົນ, ຍິງ 240 ຄົນ, ທ່າແຮງ ແລະຂໍ້ສະດວກຂອງ ບ້ານນໍ້າສ່າ ແມ່ນມີເສັ້ນທາງລົດເຂົ້າເຖິງບ້ານ, ມີໄຟຟ້າ ແລະນໍ້າລິນໃຊ້, ມີໂຮງຮຽນປະຖົມ 1 ແຫ່ງ, ມີທີ່ດິນທໍາການຜະລິດພຽງພໍ, ປະຊາຊົນມີມູນເຊື້ອດຸໝັ່ນຂະຫຍັນພຽນໃນການຜະລິດກະສິກໍາເປັນ ສິນຄ້າສາມາດສ້າງເສດຖະກິດຄອບຄົວໃຫ້ມີຄວາມເຂັ້ມແຂງຈໍານວນຄອບຄົວພາຍໃນບ້ານແມ່ນກຸ້ມກິນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ, 1 ປີສາມາດສ້າງລາຍຮັບຈາກການຂາຍສັດປະເພດຕ່າງໆໄດ້ 1,45 ຕື້ກີບ, ເຄື່ອງປ່າຂອງດົງ 312 ລ້ານກີບ, ເຂົ້າ 89 ລ້ານກີບ, ຢ່າງພາລາ 398 ລ້ານກີບ, ໝາກແໜ່ງ  137 ລ້ານກີບ ລວມລາຍຮັບທັງໝົດບ້ານໄດ້ 1,98 ຕື້ກີບສະເລ່ຍ ຫົວຄົນໄດ້ 4 ລ້ານກວ່າກີບຕໍ່ຄົນຕໍ່ປີ.

 ການສ້າງຄອບຄົວ ແລະບ້ານວັດທະນະທໍາບ້ານນໍ້າສ່າໄດ້ເລີ່ມເປີດຂະບວນການສ້າງຄອບຄົວ ແລະບ້ານວັດທະນະທໍາມາແຕ່ທ້າຍເດືອນທັນວາ ປີ 2018 ເປັນຕົ້ນມາໄດ້ພ້ອມກັນສ້າງ ແລະປະເມີນຕາມມາດຖານເງື່ອນໄຂມາເປັນໄລຍະຮອດວັນທີ 14 ມີນາ 2019 ສາມາດສ້າງຄອບຄົວວັດທະນະທໍາໄດ້ທັງໝົດ 74 ຄອບຄົວເທົ່າກັບ 93,67ທິດທາງແຜນການຕໍ່ໜ້າສືບຕໍ່ສົ່ງເສີມການຜະລິດເປັນສິນຄ້າຕາມທ່າແຮງຂອງແຕ່ລະຄອບຄົວ ແລະ ຂອງບ້ານໂດຍເລັ່ງໃສ່ການບົວລະບັດຮັກສາຜົນລະປູກ ແລະ ການລ້ຽງສັດເປັນສິນຄ້າຕາມຄວາມເໝາະສົມສູ້ຊົນສ້າງລາຍຮັບໃຫ້ໄດ້ 5 ລ້ານກີບຕໍ່ຄົນຕໍ່ປີ, ສືບຕໍ່ຮັກສາມູນເຊື້ອບ້ານວັດທະນະທໍາໃຫ້ຍືນຍົງ, ຍົກສູງລະດັບການພັດທະນາດ້ານຕ່າງໆໃຫ້ສູງຂຶ້ນ, ສືບຕໍ່ຈັດສັນບ້ານໃຫ້ເປັນລະບຽບ, ສະອາດງາມຕາ, ຮັກສາ ແລະສົ່ງເສີມມູນເຊື້ອວັດທະນະທໍາ ແລະຮີດຄອງປະເພນີອັນດີງາມຂອງເຜົ່າ ແລະແບບແຜນການດໍາລົງຊີວິດທີ່ດີ.

------- 

  ຈາກນັ້ນທ່ານ ວຽງຄໍາ ໄຊຍະວົງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວໄດ້ມອບໃບຂໍ້ຕົກລົງບ້ານຂອງທ່ານເຈົ້າແຂວງວ່າດ້ວຍການຮັບ ຮອງບ້ານນໍ້າສ່າເປັນບ້ານວັດທະນະທໍາໃຫ້ແກ່ທ່ານຊາເລາະນາຍບ້ານໆນໍ້າສ່າ ແລະຮ່ວມກັນຕັດແຖບຜ້າເປີດປ້າຍບ້ານນໍ້າສ່າເປັນບ້ານວັດທະນະທໍາຢ່າງເປັນທາງການ.

--------

ຂຽນໂດຍ: ມູນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์