ຄອລ ສະຫຼຸບວຽກງານ ປະຈຳປີ ຄອລ ສະຫຼຸບວຽກງານປະຈຳປີ

ວັນທີ 24 ທັນວາ ຜ່ານມາ ທີ່ນະຄອນຫຼວງວຽງຈັນ ຄະນະກຳມະການໂອແລມປິກແຫ່ງຊາດລາວ ຫຼື ຄອລ ເປີດກອງປະຊຸມໃຫຍ່ສາມັນປະຈຳປີເພື່ອສະຫຼຸບຖອດຖອນບົດຮຽນ ແລະທົບທວນຄືນການເຄື່ອນໄຫວຫຼາຍວຽກງານທີ່ພົ້ນເດັ່ນທັງພາຍໃນ ແລະ ເວທີສາກົນໃນຮອບປີ 2019 ພ້ອມທັງຮັບຟັງການລາຍງານຄວາມຄືບໜ້າການເປັນເຈົ້າພາບຈັດງານມະຫາກຳກີລາແຫ່ງຊາດທີ່ແຂວງຊຽງຂວາງ ໃນຕົ້ນປີ 2020 ແລະມະຕິຕົກລົງຮັບຮອງເອົາແຜນການເຄື່ອນໄຫວຕ່າງໆ ເພື່ອຮັບປະກັນໃນການສ້າງຜົນງານໃນຕໍ່ໜ້າໂດຍສະເພາະເຂົ້າ ຮ່ວມງານມະຫາວິທະຍາໄລອາ ຊຽນ, ງານກີລານັກຮຽນອາຊຽນ, ງານກີລາອາຊຽນພາລາເກມ 2020 ແລະງານມະຫາກຳກີລາ ຊີເກມ 2021 ຈະຈັດຂຶ້ນໃນຕໍ່ໜ້ານີ້.

 ກອງປະຊຸມໃຫຍ່ສາມັນຄະນະບໍລິຫານງານ ຄອລ ປະຈຳປປີ ເປັນກຽດຮ່ວມໂດຍພາຍໃຕ້ການເປັນປະທານຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີ ກະ ຊວງສຶກສາທິການ ແລະກີລາ (ສສກ)ທັງເປັນປະທານຄະນະກຳມະການໂອແລມປີກແຫ່ງຊາດລາວ, ມີທ່ານ ບົວລານ ສິລິປັນຍາ ຮອງລັດຖະມົນຕີ ສສກ,ຮອງປະທານ ຄອລ ພ້ອມດ້ວຍບັນດາຄະນະບໍລິຫານງານ ຄອລ, ຄະນະບໍລິຫານງານສະຫະພັນກີລາແຫ່ງຊາດ, ພ້ອມພາກສ່ວນກ່ຽວຂ້ອງເຂົ້າຮ່ວມ. 

   ກອງປະຊຸມໃຫຍ່ສາມັນ ຄອລ 2019 ໃນຄັ້ງນີ້ມີບັນດາຄະນະບໍລິຫານງານ ຄອລ, ສະຫະພັນກີລາແຫ່ງຊາດປະເພດຕ່າງໆຜູ້ເຂົ້າຮ່ວມທັງໝົດໄດ້ຮັບຟັງການລາຍງານຜົນສຳເລັດການຈັດຕັ້ງປະຕິບັດແຜນປະຈຳປີ 2019 ແຕ່ລະ ດ້ານການສະເໜີແຜນວຽກຕໍ່ໜ້າພ້ອມທັງມີການລາຍງານຂອງບັນ ດາກຳມະການຕ່າງໆ, ໃນນັ້ນມີການສະຫຼຸບການເຄື່ອນໄຫວ 2019 ແລະແຜນການເຄື່ອນໄຫວໃນປີ 2020,ລາຍງານວຽກງານການຮ່ວມມືກັບກອງທຶນໂອແລມປິກສາກົນ (OS)ຂອງປີ 2019, ລາຍງານການຈັດຕັ້ງປະຕິບັດວຽກ ງານການເງິນ ຄອລ, ລາຍງານ ຜົນສຳເລັດການເຂົ້າຮ່ວມຊີເກມ ຄັ້ງທີ XXX ທີ່ຟິລິບປິນ, ລາຍ ງານການເຄື່ອນໄຫວຂະບວນກີລາ ມວນຊົນເພື່ອສັງຄົມຂອງປີ 2019 ແລະການກະກຽມກີລາຄົນພິການ ທີ່ຈະເຂົ້າຮ່ວມໃນງານອາຊຽນພາ ລາເກມ ທີ່ຟິລິບປິນໃນຕົ້ນປີ  2020, ລາຍງານການເຄື່ອນໄຫວງານກີລາມະຫາວິທະຍາໄລອາຊຽນ, ອາຊີວະສຶກສາທັງວຽກພາຍໃນ ແລະການອອກເຄື່ອນໄຫວຕ່າງປະເທດ, ລາຍງານການເຄື່ອນໄຫວກີລາ-ກາຍະກຳ ນັກຮຽນສາມັນ, ລາຍງານວຽກງານສານຕ້ອງຫ້າມໃນກີລາຂອງລາວນາໂດ້, ລາຍງານວຽກງານການແພດກີລາ, ລາຍງານວຽກງານກອງທຶນ ຄອລ ເພື່ອສົ່ງເສີມກີລາສູ່ໂອແລມປິກ, ໂດຍຜູ້ຕາງໜ້າເຈົ້າພາບທັງກອງເລຂາກະກຽມງານ ແລະລາຍງານຄວາມຄືບໜ້າໃນການກະກຽມງານມະຫາກຳກີລາແຫ່ງຊາດທີ່ແຂວງຊຽງຂວາງ.

  ໂອກາດດັ່ງກ່າວ, ທ່ານນາງ ແສງເດືອນ ຫຼ້າຈັນທະບູນ ກໍໄດ້ສະແດງຄວາມຍ້ອງຍໍຊົມເຊີຍມາຍັງບັນດາຜູ້ແທນກອງປະຊຸມທີ່ເຂົ້າຮ່ວມໃນຄັ້ງນີ້ທີ່ພາກັນຈິງໃຈປະກອບຄຳຄິດຄຳເຫັນຢ່າງກົງໄປກົງ ມາເຮັດໃຫ້ກອງປະຊຸມໄດ້ຮັບຮູ້ຂໍ້ ມູນຂ່າວສານຕ່າງໆ ທີ່ຕົນເອງໄດ້ ປະຕິບັດຢ່າງກະຈ້າງແຈ້ງ ແລະໄດ້ນຳສະເໜີມີຄຳຖາມຕ່າງໆ ທີ່ຖາມມານັ້ນຈະໄດ້ນຳໄປປຶກສາຫາລືກັນໃນກອງປະຊຸມຄະນະປະຈຳທີ່ໄດ້ເປີດກອງປະຊຸມປົກກະຕິຕື່ມອີກ ແລະຂໍໃຫ້ຄະນະຮັບຜິດຊອບກອງເລຂາກໍຄືຫ້ອງການ ຄອລ ນຳເອົາຄຳຄິດຄຳເຫັນເຫຼົ່ານີ້ໄປປຶກສາຫາລືກັນເພື່ອແກ້ໄຂແຕ່ລະໜ້າວຽກໃຫ້ແທດເໝາະກັບຄວາມເປັນຈິງແນໃສ່ສົ່ງເສີມສະຫະພັນກີລາແຫ່ງຊາດຕ່າງໆ ນຳໄປຈັດຕັ້ງປະຕິ ບັດໃຫ້ເກີດຜົນປະໂຫຍດສູງສຸດສາມາດຮັບປະກັນໄດ້ໃນການສ້າງຜົນງານເພື່ອເປັນກຽດສັກສີ ແລະຊື່ສຽງມາສູ່ປະເທດຊາດກໍຄືງານກີລາຊີເກມຄັ້ງທີ XXXl ປີ 2021 ທີ່ ສສ ຫວຽດຮນາມ ຮັບກຽດເປັນເຈົ້າພາບໃນປີ 2021 ກໍເປັນໂອກາດທີ່ດີທີ່ທາງລັດຖະບານ ກໍຄືພະນະທ່ານນາຍົກລັດຖະມົນ ຕີລາວເຮົາຈະໄດ້ເດີນທາງໄປຢ້ຽມຢາມປະເທດເພື່ອນມິດສະຫາຍ ສສ ຫວຽດນາມ ໃນຕົ້ນປີ 2020 ຊຶ່ງເປັນປະເທດທີ່ມີສາຍພົວພັນອັນດີງາມຢ່າງຍາວນານໂດຍທາງລັດຖະບານລາວເຮົາກໍຈະມີການປຶກສາຫາລືກັບທາງລັດຖະບານ ສສ ຫວຽດນາມ ກ່ຽວກັບວຽກງານການຮ່ວມມືການພັດທະນາໃນຂົງເຂດຂອງຂະແໜງການຕ່າງໆເປັນຕົ້ນແມ່ນຂໍງົບປະມານພິເສດເພື່ອຈະນຳມາພັດທະນາສູນຝຶກກີລາ ແຫ່ງຊາດ (ສີເກີດ) ໄລຍະ 2 ແລະຂໍທຶນໃຫ້ນັກກີລາວໄປເກັບຕົວ ຝຶກຊ້ອມທີ່ປະເທດດັ່ງກ່າວເຊື່ອວ່າຖ້າຫາກໄດ້ຮັບການຊ່ວຍເຫຼືອໃນຄັ້ງນີ້ກໍຈະເປັນໝາກຜົນທີ່ດີທີ່ຈະສາມາດພັດທະນານັກກີລາລາວໃຫ້ມີອັນດີຫຼາຍຂຶ້ນກໍຄືສາມາດສ້າງຜົນງານຍາດໄດ້ຫຼຽນຄຳຫຼາຍກວ່າເກົ່າໃນການເຂົ້າຮ່ວມງານດັ່ງກ່າວ.

   ພິທີດຽວກັນ, ທ່ານປະທານ ຄອລ ກໍຍັງໄດ້ມອບໃບຍ້ອງຍໍໃຫ້ແກ່ບໍລິສັດຟຸດບອນໄທສະປອດດີ້ງ ຈຳກັດ ຈາກປະເທດໄທ (FBT) ທີ່ອຸປະຖຳອຸປະກອນກີລາລວມມູນ 381 ລ້ານກວ່າກີບ ຫຼື ປະມານ 1.279.400 ບາດເງິນສະກຸນໄທຕາງໜ້າຮັບໂດຍທ່ານ ວຽງສະຫວັນ ແສງຈັນ ເຈົ້າຂອງສູນຈຳໜ່າຍເຄື່ອງກີລາເອັບບີທີຜູ້ດຽວໃນ ສປປ ລາວ ແລະໃຫ້ບໍລິສັດ ເບຍລາວ ຈຳກັດ ສະໜັບສະໜູນລວມມູນຄ່າ 139 ລ້ານກວ່າກີບ ຕາງໜ້າຮັບໂດຍທ່ານ ຈັນສະໝອນ ຜ່ອງຈັນທາ ຫົວໜ້າຝ່າຍການຕະ ຫຼາດບໍລິສັດເບຍລາວ ຈຳກັດ ຢ່າງສົມກຽດອີກດ້ວຍ.

------------

ຂຽນໂດຍ: ບຸນນິກ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์