ຝຶກສີມືແຮງງານສາຂາຊ່າງຕັດຫຍິບ ແລະສ້ອມແປງລົດ

  ວັນທີ 24 ທັນວາ ຜ່ານມາສະຖາບັນພັດທະນາສີມືແຮງງານ ລາວ-ເກົາຫຼີ ຮ່ວມກັບອົງການກອຍກາປະຈຳລາວໄດ້ຈັດພິທີເປີດຫຼັກສູດຝຶກອົບຮົມສີມືແຮງງານ CBT ສາຂາຊ່າງຕັດຫຍິບເຄື່ອງນຸ່ງ ແລະຊ່າງສ້ອມແປງລົດຍົນຊຸດທີ 1 ໂດຍເປັນກຽດເຂົ້າຮ່ວມຂອງ ທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານລາວ-ເກົາຫຼີ,ທ່ານນາງ ຢໍ ວອນ ຢອງ ຮອງປະທານກອຍກາປະຈໍາລາວ, ມີຜູ້ບໍລິຫານໂຄງການປັບປຸງສະຖາບັນພັດທະນາສີມືແຮງງານລາວ-ເກົາຫຼີ, ຫົວໜ້າກົມ, ຮອງກົມ , ຜູ້ອຳນວຍສະຖາບັນ, ວິທະຍາໄລການຝຶກ, ຫົວໜ້າສະມາຄົມ, ກຸ່ມອາຊີບຕ່າງໆ, ພະນັກງານຄູ-ອາຈານຕະຫຼອດຮອດນັກສຶກສາເຂົ້າຮ່ວມ.

  ທ່ານ ບຸນມາ ສິດທິໂສມ ກ່າວວ່າ: ການເປີດຫຼັກສູດ CBT ເນັ້ນໃຫ້ຜູ້ເຂົ້າຝຶກມີຄວາມຮູ້, ມີຄວາມສາມາດ, ມີຄວາມສຳນານ, ມີທັດສະນະຄະຕິທີ່ດີ, ມີຄວາມປອດ ໄພໃນການເຮັດວຽກ,ຊຶ່ງເປັນກິດຈະກຳ 1 ໃນ 4 ກິດຈະກໍາໃຫ່ຍຂອງໂຄງການ, ຫຼັກສູດ CBT ໄດ້ ຮັບການສ້າງຂຶ້ນໃນ 4 ສາຂາອາຊີບເຊັ່ນ: ຊ່າງຕັດຫຍິບເຄື່ອງນຸ່ງ ຫົ່ມ, ຊ່າງບຳລຸງ ແລະສ້ອມແປງລົດຍົນ, ຊ່າງໄຟຟ້າ ແລະຊ່າງ ICT ໂດຍດຳເນີນການສ້າງຫຼັກສູດໄປຕາມຂັ້ນຕອນ ແລະຂະບວນການເປັນຢ່າງດີ, ມີຜູ້ຊ່ຽວຊານຈາກ ສ.ເກົາຫຼີ ເປັນຜູ້ນໍາພາສ້າງ ແລະການມີສ່ວນຮ່ວມຂອງຄູ-ອາຈານ, ຄະນະນຳທັງພາກລັດ ແລະເອກະຊົນໄດ້ມີການວິເຄາະວິໄຈໜ້າວຽກຕ່າງໆມີຊົ່ວໂມງຝຶກທັງໝົດ 1740 ຊົ່ວໂມງ, ໄລຍະການຝຶກໃຊ້ເວລາ 1 ປີເຕັມ, ປະກອບມີທັງໝົດ 244 ໂມດູນ, ໃນນັ້ນ, ສາຂາຊ່າງຕັດຫຍິບ 42 ໂມດູນ, ຊ່າງລົດຍົນ 42 ໂມດູນ, ຊ່າງໄຟ ຟ້າ 85 ໂມດູນ ແລະຊ່າງພັດທະນາເວັບໄຊ 75 ໂມດູນ, ພາຍຫຼັງສໍາເລັດການຝຶກ, ຜູ້ເຂົ້າຝຶກຈະໄດ້ຮັບວຸດທິສີມືແຮງງານລະດັບ 3 ຫຼື ເທົ່າກັບວຸດທິວິ ຊາຊີບຊັ້ນຕົ້ນ 3, ສໍາລັບສົກຮຽນປີ 2019-2020 ຈະໄດ້ດໍາເນີນການຝຶກຫຼັກສູດ CBT ໃນ 2 ສາ ຂາອາຊີບຄືສາຂາຊ່າງຕັດຫຍິບເຄື່ອງນຸ່ງ ແລະ ຊ່າງສ້ອມແປງລົດຍົນຊຶ່ງມີນັກ ຮຽນເຂົ້າຮ່ວມ ຝຶກອົບຮົມຫຼັກສູດ CBT ໃນຄັ້ງນີ້ຈຳນວນທັງໝົດ 60 ຄົນ, ແບ່ງເປັນສອງຫ້ອງໆລະ 30 ຄົນ.

 ທ່ານ ນາງ ຢໍ ວອນ ຢອງ ກ່າວວ່າ: ການສ້າງຫຼັກສູດ 2 ສາຂາອາຊີບນີ້ເພື່ອເຮັດໃຫ້ນັກຮຽນທີ່ຈົບອອກໄປມີຄວາມຮູ້ຄວາມສາມາດຕາມຄວາມຕ້ອງການຂອງຕະຫຼາດແຮງງານ ແລະ ເປັນການເຊື່ອມໂຍງກັບເກົາຫຼີໃນການສ້າງບຸກຄະລາກອນໃຫ້ມີປະສິດທິພາບຫຼາຍຂຶ້ນເຊັ່ນ: ການຍົກລະດັບສີມືແຮງງານໃນການສອນພາກທິດສະດີໃນຫ້ອງມາລົງພາກປະຕິບັດຕົວຈິງເພື່ອໃຫ້ນັກຮຽນຊຳນານ ແລະ ມີຄວາມຮູ້ລົງເລິກຫຼາຍຂຶ້ນກວ່າເກົ່າ, ນອກນັ້ນໃນງານດັ່ງກ່າວຍັງໄດ້ມອບປຶ້ມຄູ່ມືການຝຶກໃນລະບົບຫຼັກ ສູດ CBT ຂະແໜງຊ່າງສ້ອມແປງລົດຍົນ ແລະຊ່າງຕັດຫຍິບເຄື່ອງນຸ່ງຈຳນວນ 400 ຫົວ ໃຫ້ສະຖາບັນພັດທະນາສີມືແຮງງານລາວ-ເກົາຫຼີ.

---------

ຂຽນໂດຍ:  ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์