ທໍາມະຊາດ ນໍ້າຕົກຕາດເທວະດາ

  ມື້ພັກເສົາ-ອາທິດຫາກຕ້ອງການພັກຜ່ອນຕື່ມອົກຊີໃຫ້ປອດແລະສະໜອງຄວາມສົດຊື່ນໃຫ້ຈິດໃຈຕ້ອງໄປສູບດົມອາກາດບໍລິສຸດຊົມທິວທັດທຳມະຊາດທີ່ນໍ້າຕົກຕາດເທ ວະດາຕັ້ງຢູ່ບ້ານຫາງພູນ້ອຍ ເມືອງສາລະວັນ, ຫ່າງຈາກທາງເລກທີ່ 20 ປະມານ 19 ກິໂລແມັດ ແລະຫ່າງຈາກເທສະບານເມືອງ 35 ກິໂລແມັດ.

  ນໍ້າຕົກຕາດເທວະດາອີກສະຖານທີ່ທ່ອງທ່ຽວທີ່ໄດ້ຮັບຄວາມນິຍົມທີ່ສຸດເພາະເປັນສະຖານທີ່ທ່ອງທ່ຽວທາງທຳມະຊາດເປັນຕົ້ນນໍ້າຕົກຕາດເກາະກາຍກັນເປັນຂັ້ນໆ ຊຶ່ງຜູ້ທີ່ຕ້ອງການພັກຜ່ອນຢ່ອນໃຈ ຫຼື ຕ້ອງການໜີຈາກຄວາມແອອັດທີ່ສັບສົນສາມາດເດີນທາງໄປພັກຜ່ອນ ແລະຊົມທິວທັດທໍາມະຊາດໂດຍມີນໍ້າໃສໄຫຼເຢັນ ແລະ ພູຜາປ່າດົງທີ່ມີຄວາມອຸດົມສົມບູນທາງທຳມະຊາດນາໆພັນໂດຍທີ່ທ່ານບໍ່ຈຳເປັນຕ້ອງໄປຫຼິ້ນຕາດຢູ່ຫ່າງໄກ ຫຼື ໄປເຖິງຕ່າງແຂວງ. 

 ນໍ້າຕົກຕາດເທວະດາມີຊື່ເດີມວ່າ: ນໍ້າຕົກຕາດຕະຫຼຸຍຕາມເຖົ້າແກ່ພາຍໃນບ້ານໄດ້ເລົ່າສູ່ກັນຟັງວ່າ: ໃນບໍລິເວນດ້ານລຸ່ມຂອງນໍ້າຕົກຕາດໄດ້ມີພະພຸດທະຮູບສະຖິດຢູ່ໃນຖໍ້າກ້ອງນໍ້າຕົກແຕ່ລະປີພໍຮອດເດືອນຫ້າປະຊາຊົນພາຍໃນບ້ານຈັດຕັ້ງບຸນ ແລະພາກັນມາຫົດສົງພະ, ໃນບໍລິເວນຕໍ່ໜ້ານໍ້າຕົກຕາດຍັງມີຫີນຕັ້ງມີຮູບລັກສະນະຄ້າຍກັບພົມສີ່ໜ້າ (ໃນສາສະໜາຮິນດູ) ໃນອະດີດມີສອງອັນ ແລະໃນປະຈຸບັນເຫຼືອພຽງອັນດຽວຍ້ອນຖືກລະເບີດຍົນສະໄໝສົງຄາມຈຶ່ງໄດ້ປ່ຽນຊື່ຕາດຕະຫຼຸຍມາເປັນຕາດເທ ວະດາເທົ່າທຸກວັນນີ້.

_____________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์