ບ້ານນາຊານ ເມືອງງາ ມີລາຍຮັບຈາກການຂາຍໂອນໍ້າກ້ຽງ 4,85 ຕື້ກີບ

 ບ້ານນາຊານຕັ້ງຢູ່ທິດໃຕ້ຂອງເທສະບານເມືອງງາ 66 ກິໂລແມັດ, ມີເນື້ອທີ່ເຂດຄຸ້ມຄອງຂອງບ້ານທັງໝົດ 4.718 ເຮັກຕາ, ປະກອບມີ 174 ຄົວເຮືອນ, ມີ 234 ຄອບຄົວ, ມີພົນລະເມືອງທັງໝົດ 743 ຄົນ, ຍິງ 356 ຄົນ ປະຊາຊົນຢູ່ຮ່ວມກັນ 2 ຊົນເຜົ່າ ຄື: ເຜົ່າລື້ ແລະ ເຜົ່າກຶມມຸປະຊາຊົນ 73% ເຮັດອາຊີບຜະລິດໂອນໍ້າກ້ຽງຂາຍເປັນສິນຄ້າຊຶ່ງເປັນແຫຼ່ງລາຍຮັບຫຼັກຂອງບ້ານນາຊານ, ເມືອງງາ.

  ທ່ານ ໄມ່ລາ ວັນນະພອນ ເລຂາພັກບ້ານ, ນາຍບ້ານນາຊານລາຍງານຕໍ່ກອງປະຊຸມໃຫ່ຍຜູ້ ແທນອົງຄະນະພັກເມືອງງາຄັ້ງທີ 11 ໃຫ້ຮູ້ວ່າ: ເມື່ອກ່ອນປະຊາຊົນທໍາການຜະລິດແບບກະແຈກ, ກະຈາຍ, ຖ້າງປ່າເຮັດໄຮ່ແບບ ເລື່ອນລອຍ, ເຮັດນາຈຳນວນໜຶ່ງ, ການຜະລິດຍັງອາໄສແຕ່ທໍາມະຊາດເປັນສ່ວນໃຫ່ຍ ຕໍ່ມາຮອດປີ 2015 ປະຊາຊົນຢູບ້ານນາຊານ ຈຳນວນ 5 ຄອບຄົວໄດ້ໄປຖອດ ຖອນບົດຮຽນວິທີການຜະລິດໂອ ນໍ້າກ້ຽງຢູ່ນະຄອນຫຼວງພະບາງ, ມາຜະລິດຢູ່ບ້ານເຫັນວ່າເປັນທີ່ຕ້ອງການຂອງຕະຫຼາດ ດັ່ງນັ້ນ ປະຊາຊົນພາຍໃນບ້ານຈິ່ງມີຄວາມ ສົນໃຈຍາກຮຽນຮູ້ຈິ່ງພາກັນເຮັດ ເປັນຂະບວນ ຫຼັງຈາກນັ້ນຈິ່ງໄດ້ ຫັນອາຊີບຈາກການຜະລິດເຂົ້າ, ຢາແດງ, ພືດພັກຕ່າງໆ, ການ ລ້ຽງສັດ ມາຜະລິດໂອນ້ຳກ້ຽງ ເພື່ອຊົມໃຊ້ພາຍໃນບ້ານແລະຂາຍ ອອກເປັນສິນຄ້າໃນເບື້ອງຕົ້ນມີ 17 ຄອບຄົວ, ຜະລິດໄດ້ 720 ໜ່ວຍ, ສ້າງລາຍຮັບໃຫ້ຄອບຄົວໄດ້ 50 ລ້ານກວ່າກີບຕໍ່ປີ, ປະຈຸບັນໄດ້ຈັດຕັ້ງເປັນ 13 ກຸ່ມການຜະລິດ, ມີ 126 ຄົວເຮືອນສາມາດສ້າງລາຍຮັບຈາກການຂາຍໂອນໍ້າກ້ຽງ 4,85 ຕື້ກີບໃນປີ 2019.

 ນອກຈາກການຜະລິດໂອນໍ້າກ້ຽງແລ້ວປະຊາຊົນແມ່ນເຮັດນາປູກເຂົ້າ, ປູກຢາແດງ, ປູກຜືດພັກຕ່າງໆ ແລະລ້ຽງສັດເປັນອາຊີບສຳຮອງເຮັດໃຫ້ມີລາຍໄດ້ຈາກການຂາຍຜົນຜະລິດ 600 ລ້ານກີບ ສັງລວມແລ້ວການເຮັດໂອນໍ້າກ້ຽງ ແລະການຜະລິດກະສິກຳເປັນສິນຄ້າຂອງປະຊາຊົນບ້ານນາຊານ ເມືອງງາ ມີລາຍຮັບເຖິງ 5,45 ຕື້ກີບຕໍ່ປີ, ສະເລ່ຍລາຍຮັບໄດ້ 7 ແສນກວ່າກີບຕໍ່ຄົນຕໍ່ປີເມື່ອສົມທຽບເມື່ອກ່ອນກັບປະຈຸບັນນີ້ດ້ານລາຍຮັບເພີ່ມຂຶ້ນ 2 ເທົ່າ, ເຮັດໃຫ້ຊີວິດການເປັນຢູ່ຂອງປະຊາຊົນພາຍໃນບ້ານດີຂຶ້ນເທື່ອລະກ້າວມີເງິນແຮໄວ້ປິ່ນປົວສຸຂະພາບ, ສົ່ງເສີມລູກຫຼານໄປສຶກສາຄວາມຮູ້ຈົນຮອດຊັ້ນມັດທະຍົມປາຍ ແລະໄດ້ຮຽນຕໍ່ວິຊາຊີບຕ່າງໆ. ນອກຈາກນີ້ພາຍໃນບ້ານນາຊານມີລົດໃຫ່ຍ 1 ຄັນ, ລົດຊິງ 3 ຄັນ, ລົດໄຖນາ 90 ຄັນ, ລົດຈັກ60 ຄັນ ແລະປຸກສ້າງເຮືອນຢູ່ແບບຖາວອນ, ເຮືອນເຄິ່ງຖາວອນໄດ້ຈຳນວນໜຶ່ງ, ໃນອະ ນາຄົດຕໍ່ໜ້ານີ້ບ້ານນາຊານຂອງຂ້າພະເຈົ້າຈະຮັກສາມູນເຊື້ອ ແລະສືບຕໍ່ສ້າງຄວາມເຂັ້ມແຂງເປັນບ້ານແບບຢ່າງໃຫ້ແກ່ບ້ານອື່ນພາຍໃນເມືອງງາ.

  ທ່ານ ໄມ່ລາ ວັນນະພອນ ກ່າວຕື່ມວ່າໃນຊຸມປີຕໍ່ໜ້ານີ້ຄະນະພັກ, ອົງການປົກຄອງ ແລະປະຊາຊົນບ້ານນາຊານຈະພ້ອມກັນສືບຕໍ່ພັດທະນາທາງດ້ານສີມືແຮງງານໃນ ການຜະລິດໂອນ້ຳກ້ຽງໃຫ້ເປັນອາຊີບຫຼັກຂອງແຕ່ລະຄອບຄົວພາຍໃນບ້ານ ແລະຈະພະຍາຍາມຊຸກຍູ້ບັນດາຄອບຄົວທີ່ມີເງື່ອນໄຂຫັນມາຜະລິດໂອນໍ້າກ້ຽງເພື່ອຕອບສະ ໜອງກັບຄວາມຕ້ອງການຂອງສັງຄົມພາຍໃນເມືອງ, ຕ່າງເມືອງ ແລະ ບັນດາແຂວງໃນທົ່ວປະເທດ ແລະ ຈະປັບປຸງການຜະລິດໃຫ້ມີຫຼາຍຮູບແບບເພື່ອສະໜອງຕາມ ຄວາມຮຽກຮ້ອງຕ້ອງການຂອງສັງຄົມໃນປະຈຸບັນກໍຄືອະນາຄົດ.

------------

ຂຽນໂດຍ: ສຸລະສັກ ແສງຫຼ້າ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์