ສະຫຼຸບຄືນວຽກເຂດເລືອກຕັ້ງ

  ວັນທີ 24 ທັນວາ 2019 ທີ່ ນະຄອນຫຼວງວຽງຈັນ ຄະນະຮັບຜິດຊອບວຽກງານເຂດເລືອກຕັ້ງຄະນະປະຈໍາສະພາແຫ່ງຊາດໄດ້ຈັດກອງປະຊຸມປະຈໍາປີເພື່ອສະຫຼຸບຕີລາຄາຄືນການປະຕິບັດພາລະບົດບາດ, ສິດ ແລະໜ້າທີ່ ແລະວາງທິດທາງວຽກງານປະຈໍາປີ 2020, ໂດຍການເປັນປະທານຂອງທ່ານ ສົມພັນ ແພງຄໍາມີ ຮອງປະ ທານສະພາແຫ່ງຊາດ, ທ່ານ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງສະພາແຫ່ງຊາດ ແລະພາກສ່ວນກ່ຽວຂ້ອງເຂົ້າຮ່ວມ.

 ທ່ານ ພົງສະເໜ່ ຍຸຕິທໍາ ກ່າວວ່າ: ໃນໄລຍະຜ່ານມາ,ຄະນະ ສສຊ ປະຈໍາເຂດເລືອກຕັ້ງ ແລະສະພາປະຊາຊົນແຂວງ(ສພຂ) ໄດ້ຮ່ວມກັນຄົ້ນຄວ້າປຶກສາຫາລືກ່ຽວກັບການຈັດຕັ້ງ ແລະ ແບບວິທີການເຄື່ອນໄຫວ,ສ້າງບັນດານິຕິກໍາໃຕ້ກົດໝາຍເພື່ອເປັນບ່ອນອີງໃຫ້ແກ່ການເຄື່ອນໄຫວປະຕິບັດພາລະບົດບາດ,ສິດ ແລະໜ້າທີ່ຂອງສະພາປະຊາຊົນແຂວງໃນ 16 ແຂວງ, ພ້ອມທັງຄົ້ນຄວ້າກ່ຽວກັບການແຕ່ງຕັ້ງ, ຍົກຍ້າຍບຸກຄະລາກອນບາງຕໍາແໜ່ງຂອງຄະນະ ສສຊ ປະຈໍາເຂດເລືອກຕັ້ງ ແລະ ສພຂ ຕາມຄວາມຮຽກຮ້ອງຕ້ອງການຂອງວຽກງານ ແລະໄດ້ປະຕິບັດສໍາເລັດຄື: ແຂວງຜົ້ງສາລີ, ອຸດົມໄຊ, ຫົວພັນ, ຊຽງຂວາງ ແລະແຂວງຈໍາປະສັກ ນອກນີ້, ໄດ້ຈັດຝຶກອົບຮົມໃຫ້ໜ່ວຍ ສພຂ ປະ ຈໍາເຂດເລືອກຕັ້ງຂັ້ນເມືອງ ແລະກົງ ຈັກເສນາທິການຊ່ວຍວຽກຄະນະ ສສຊ ປະຈໍາເຂດເລືອກຕັ້ງ ແລະ ສພຂ ໄດ້ 3 ຊຸດຄື: ຈັດຢູ່ແຂວງວຽງຈັນ ໂດຍມີແຂວງບໍລິຄໍາໄຊແລະແຂວງໄຊສົມບູນ ເຂົ້າຮ່ວມ, ຈັດຢູ່ແຂວງຄໍາມ່ວນ ມີສາລະວັນ ແລະແຂວງສະຫວັນນະເຂດເຂົ້າຮ່ວມ ແລະຈັດຢູ່ແຂວງເຊກອງ ໂດຍມີ ແຂວງອັດຕະປືເຂົ້າຮ່ວມ.

  ຄຽງຄູ່ກັບຜົນສໍາເລັດດັ່ງກ່າວ, ກໍຍັງມີຂໍ້ຄົງຄ້າງໃຫ້ສືບຕໍ່ປັບປຸງແກ້ໄຂໂດຍສະເພາະແມ່ນການຄົ້ນຄວ້າ ແລະສ້າງນິຕິກໍາໃຫ້ແກ່ການຈັດຕັ້ງ ແລະການເຄື່ອນໄຫວຂອງຄະນະ ສສຊ ປະ ຈໍາເຂດເລືອກຕັ້ງ ແລະສະພາປະຊາຊົນ ຂັ້ນແຂວງໃຫ້ດີ ແລະພຽງພໍກັບຄວາມຮຽກຮ້ອງຕ້ອງການຂອງວຽກງານ, ການເຄື່ອນໄຫວວຽກງານສ່ວນໜຶ່ງບໍ່ໄດ້ປະຕິບັດຕາມຂໍ້ມຕົກລົງການແບ່ງຄວາມຮັບຜິດຊອບພາຍໃນຄະນະນໍາ ແລະຄະນະກົມ, ການຕິດຕາມ, ຊຸກຍູ້ການເຄື່ອນໄຫວວຽກງານຂອງສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ສະພາປະຊາຊົນຂັ້ນແຂວງຍັງເຮັດບໍ່ທັນໄດ້ດີເທົ່າທີ່ຄວນເປັນຕົ້ນການສ້າງກົນໄກ, ວິທີການເຄື່ອນໄຫວ, ການສ້າງນິຕິກໍາທີ່ສໍາຄັນຂອງທ້ອງຖິ່ນ, ການກະກຽມ ແລະດໍາເນີນກອງປະຊຸມປະຈໍາຂອງຄະນະ ສສຊ ປະຈໍາເຂດເລືອກຕັ້ງ ແລະຂອງ ສພຂ ຕິດຕາມ ແລະຊຸກຍູ້ບໍ່ທັນທັນທົ່ວເຖິງແຕ່ລະທ້ອງຖິ່ນ ແລະການລົງຕິດຕາມການພົບປະປະຊາຊົນຂອງ ສສຊ ແລະ ສພຂ ຍັງບໍ່ສາມາດຈັດຕັ້ງປະຕິບັດ.

__________

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์