ສືບຕໍ່ພັດທະນາຕະຫຼາດທຶນໃຫ້ມີປະສິດທິພາບ

 ກອງປະຊຸມຄະນະກໍາມະການຄຸ້ມຄອງຫຼັກຊັບຄັ້ງທີ IV ປະຈໍາປີ 2019 ໄດ້ສໍາເລັດໃນວັນທີ 24 ທັນວາ 2019 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ, ປະທານຄະນະກໍາມະການຄຸ້ມຄອງຫຼັກຊັບພ້ອມນີ້ກໍ່ມີການເຂົ້າຮ່ວມຂອງຮອງປະ ທານ-ບັນດາຄະນະກໍາມະການຄຸ້ມຄອງຫຼັກຊັບ ແລະພາກສ່ວນກ່ຽວຂ້ອງ.

  ກອງປະຊຸມໄດ້ເປີດຂຶ້ນໃນທ່າມກາງການຈັດຕັ້ງປະຕິບັດແຜນການເງິນ-ເງິນ ຕາໄລຍະທ້າຍຂອງປີ 2019 ພ້ອມນີ້ໄດ້ຕິດພັນກັບວຽກງານການທະນາຄານທີ່ພວມຂຸ້ນຂ້ຽວແກ້ໄຂບັນຫາທາງດ້ານເງິນຕາ-ການເງິນ ເພື່ອເຮັດໃຫ້ຄ່າຂອງສະກຸນເງິນກີບມີການປັບຕົວດີຂຶ້ນສໍາລັບຂົງເຂດວຽກງານຕະຫຼາດທຶນກໍ່ສຸມໃສ່ປະຕິບັດໜ້າທີ່ວຽກ ງານທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງແຕ່ເນື່ອງຈາກວ່າມີຫຼາຍເງື່ອນໄຂບໍ່ທັນເອື້ອອຳນວຍແທ້ຈຶ່ງເຮັດໃຫ້ບາງວຽກງານຍັງບໍ່ສາມາດປະຕິບັດໄດ້ດີເທົ່າທີ່ຄວນ ໂດຍສະເພາະຜົນການດຳເນີນງານຂອງບາງບໍລິສັດຍັງເຮັດບໍ່ທັນໄດ້ດີການເປີດເຜີຍຂໍ້ມູນຂອງບາງບໍລິສັດຈົດທະບຽນຍັງຊັກຊ້າສົ່ງຜົນໃຫ້ພາບລວມການຊື້-ຂາຍ ແລະລາຄາຮຸ້ນໃນຕະຫຼາດຫຼັກຊັບລາວບໍ່ບັນລຸຜົນຕາມແຜນ.

  ກອງປະຊຸມຍັງໄດ້ຮັບຟັງ ແລະປຶກສາຫາລືບາງໜ້າວຽກທີ່ສຳຄັນໂດຍສະເພາະໄດ້ລາຍງານຜົນການຈັດຕັ້ງປະຕິບັດມະຕິກອງປະຊຸມຄະນະກໍາມະການຄຸ້ມຄອງຫຼັກຊັບຄັ້ງທີ III ປີ 2019 ຜ່ານມາທີ່ໄດ້ມີການເຄື່ອນໄຫວວຽກງານຄຸ້ມຄອງຫຼັກຊັບຢ່າງຕັ້ງໜ້າໃນນີ້ມີອັນພົ້ນເດັ່ນຫຼາຍດ້ານເປັນຕົ້ນໄດ້ສຳເລັດການຮັບຮອງນິຕິກຳລຸ່ມກົດ ໝາຍ 2 ສະບັບ, ໄດ້ອະນຸຍາດທາງດ້ານຫຼັກການໃຫ້ບໍລິສັດຜະລິດ-ໄຟຟ້າລາວມະຫາຊົນຄົ້ນຄວ້າກ່ຽວກັບອອກໃບສະແດງສິດໃນການຝາກຫຼັກຊັບຕ່າງປະເທດ(DR) ຢູ່ຕະຫຼາດຫຼັກຊັບຕ່າງປະເທດ, ລາຍງານຄວາມຄືບໜ້າໃນການປັບປຸງສັນຍາສໍາປະທານ ແລະສັນຍາຮ່ວມທຶນຂອງບໍລິສັດ 1 ແຫ່ງ, ລາຍງານກ່ຽວກັບບັນຫາ ແລະສະ ເໜີວິທີແກ້ໄຂດ້ານການເງິນຂອງບໍລິສັດຈົດທະບຽນ 1 ແຫ່ງ, ໂຈະການຊື້-ຂາຍຮຸ້ນຂອງບໍລິສັດ 1 ແຫ່ງ ໃນຕະຫຼາດຫຼັກຊັບລາວ, ລາຍງານຄວາມຄືບໜ້າໃນການສະ ໜັບສະໜູນການຂ້າມຜ່ານສູ່ມາດຕະຖານສາກົນດ້ານການລາຍງານການເງິນ (IFRS) ສຳລັບຂະແໜງການຫຼັກຊັບ,ລາຍງານສະພາບການເຄື່ອນໄຫວຂອງຕະຫຼາດຫຼັກຊັບລາວ; ພ້ອມດຽວກັນນີ້, ບັນດາຜູ້ທີ່ເຂົ້າຮ່ວມກອງປະຊຸມຍັງໄດ້ຄົ້ນຄວ້າ ແລະປະກອບຄໍາເຫັນຫຼາຍພໍສົມຄວນເພື່ອເຮັດໃຫ້ແຜນດໍາເນີນງານໃນຕໍ່ໜ້າໄດ້ຮັບຜົນສໍາເລັດດີຂຶ້ນກວ່າເກົ່າ.

 ໃນໂອກາດດຽວກັນ,ທ່ານຮອງນາຍົກລັດຖະມົນຕີ, ປະທານຄະນະກໍາມະການຄຸ້ມຄອງຫຼັກຊັບໄດ້ເນັ້ນໃຫ້ສືບຕໍ່ເອົາໃຈໃສ່ພັດທະນາຕະຫຼາດທຶນລາວໃຫ້ມີປະສິດທິພາບ, ມີຄວາມໜ້າເຊື່ອຖື ແລະ ມີມາດຕະຖານສາກົນເທື່ອລະກ້າວ, ພ້ອມທັງມອບໃຫ້ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ຮອງປະທານ-ຜູ້ປະຈໍາການ ຄຄຊ ເປັນຜູ້ຊີ້ນໍາໂດຍກົງ ແລະ ໃຫ້ສໍານັກງານ ຄຄຊ ທີ່ເປັນກົງຈັກຊ່ວຍວຽກຂອງ ຄຄຊ ໃນການພັດທະນາຕະຫຼາດທຶນຈົ່ງຮີບຮ້ອນປະສານສົມທົບກັບຂະ ແໜງການຕ່າງໆ ເຊີດຊູຄວາມຮັບຜິດຊອບສູງ ແລະສຸມທຸກສະຕິປັນຍາເຂົ້າໃນການຈັດຕັ້ງປະຕິບັດຜົນຂອງກອງປະຊຸມໃນຄັ້ງນີ້ໃຫ້ແທດເໝາະກັບສະພາບຄວາມເປັນຈິງ  ແລະ ມີປະສິດທິພາບສູງບົນພື້ນຖານເພື່ອຜົນປະໂຫຍດລວມຂອງຊາດ.

__________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์