ສມກຈ ຮຽກຮ້ອງໃຫ້ເອົາຜິດທຸລະກິດປ່ອຍກູ້ນອກລະບົບ

  ສະມາຄົມການເງິນຈຸລະພາກ (ສມກຈ) ໄດ້ຈັດກອງປະຊຸມສະມາຊິກ ສມກຈ ປະຈຳປີ 2019 ໃນວັນທີ 24 ທັນວາ 2019 ແລະສໍາເລັດລົງໃນວັນດຽວກັນພາຍໃຕ້ການເປັນປະທານຂອງ ທ່ານ ສົມພອນ ສີແສງລັດ ປະທານສະມາຄົມດັ່ງກ່າວໂດຍການໃຫ້ກຽດເຂົ້າຮ່ວມຂອງທ່ານ ອາລຸນ ບຸນຍົງ ຫົວໜ້າກົມຄຸ້ມຄອງສະຖາບັນການເງິນທະນາຄານ ແຫ່ງ ສປປລາວ ພ້ອມນີ້, ກໍ່ມີບັນດາສະມາຊິກສະ ມາຄົມ ແລະພາກສ່ວນກ່ຽວຂ້ອງເຂົ້າຮ່ວມ.

  ກອງປະຊຸມໄດ້ສະຫຼຸບຕີລາຄາການເຄື່ອນໄຫວປະຈໍາປີ 2019 ຊຶ່ງສະມາຄົມການເງິນຈຸລະພາກໄດ້ເອົາໃຈໃສ່ຕັ້ງໜ້າປະຕິບັດຕາມລະບຽບການຄຸ້ມຄອງຕ່າງໆໄດ້ດີ ແລະບັນດາສະມາຊິກກໍ່ເອົາໃຈໃສ່ຈັດຕັ້ງປະຕິບັດຕາມແນວທາງນະໂຍບາຍຂອງພັກ ແລະລັດວາງອອກຢ່າງມີການແຂ່ງຂັນໃນການສົ່ງເສີມການບໍລິການທາງດ້ານເງິນໃຫ້ເຂົ້າເຖິງປະຊາຊົນຜູ້ທີ່ທຸກຍາກໃຫ້ຫຼາຍທີ່ສຸດເພື່ອໃຫ້ປະຊາຊົນຫຼຸດພົ້ນອອກຈາກຄວາມທຸກຍາກເທື່ອລະກ້າວສະແດງອອກມີລູກຄ້າທີ່ສະມາຊິກ ສກຈ/ສສງ ໃຫ້ບໍລິການມີການຂະຫຍາຍຕົວຂຶ້ນຈາກ ປີ 2018 ມີ 66.157 ຄົນ ແລະໃນປີ 2019ມີ 87.924 ຄົນ ເພີ່ມຂຶ້ນ 30%.

  ໃນຜ່ານມາ ສມກຈ ຍາມໃດກໍ່ໄດ້ຮັບການສະໜັບສະໜູນຈາກກົມຄຸ້ມຄອງສະຖາບັນການເງິນໃນກິດຈະກຳແຜນພັດທະນາສ້າງຄວາມຮູ້ຄວາມສາມາດວິຊາການການເງິນຈຸະພາກໃນພິທີຝຶກອົບຮົມ ແລະກອງປະຊຸມໃນຫົວຂໍ້ສໍາຄັນຕ່າງໆ, ໃນຂະນະດຽວກັນ, ສະພາບໍລິຫານ ສມກຈ ກໍເອົາໃຈໃສ່ຕັ້ງໜ້າປະຕິບັດຕາມພາລະບົດບາດໜ້າ ທີ່ຊຸກຍູ້ພັກດັນແຜນການຂອງສະມາຄົມຈັດຕັ້ງປະຕິບັດໃຫ້ປະສົບຜົນສຳເລັດຕາມແຜນການທີ່ວາງໄວ້ໂດຍໄດ້ຈັດຝຶກອົບຮົມຕ່າງໆສົ່ງເສີມສະມາຊິກ, ຈັດກອງປະຊຸມປຶກ ສາຫາລືວິຊາການສະມາຊິກ, ປະຊຸມປະຈໍາໄຕມາດຮ່ວມກັບກົມຄຸ້ມຄອງສະຖາບັນການເງິນ, ກອງປະຊຸມປະຈໍາໄຕມາດຂອງສະພາບໍລິຫານ, ສະເພາະທີມງານບໍລິຫານ ສມກຈ ສໍາເລັດໃນການປະສານງານ ແລະການໃຫ້ຄວາມຮ່ວມມືກັບຜູ້ມີສ່ວນຮ່ວມໃນຂະແໜງການເປັນຕົ້ນການເຂົ້ານັດພົບຂອງຊ່ຽວຊານ,ການແລກປ່ຽນບົດຮຽນທາງດ້ານວິຊາການໃນຂະແໜງການ ແລະ ຈະສືບຕໍ່ຮັກສາສາຍພົວພັນອັນດີໄວ້, ພ້ອມນັ້ນກໍ່ມີກິດຈະກຳທີ່ສະມາຄົມເຄື່ອນໄຫວໃນ 2019 ຫຼາຍວຽກສໍາຄັນທີ່ເຮັດສໍາເລັດເປັນຢ່າງດີ.

  ສຳລັບແຜນການເຄື່ອນໄຫວຂອງສະມາຄົມ ໃນປີ 2020 ສມກຈ ປະກາດຫາບໍລິສັດກວດສອບພາຍນອກສໍາລັບປີ 2019 ຈັດກອງປະຊຸມວິຊາການສະມາຊິກ, ກອງປະຊຸມປະສານງານກັບກົມຄຸ້ມຄອງສະຖາບັນການເງິນ, ກອງປະຊຸມສະມາຊິກສະມາຄົມປະຈໍາປີ 2020, ກອງປະຊຸມເພື່ອພັດທະນາຍຸດທະສາດທີ່ເອື້ອອໍານວຍ, ຝຶກອົບຮົມຫຼັກສູດບໍລິຫານການເງິນຈຸລະພາກສໍາລັບຜູ້ບໍລິຫານ ແລະພະນັກງານສືບທອດຂອງສະຖາບັນການເງິນ, ຝຶກອົບຮົມຕາມຫົວຂໍ້ທີ່ຕ້ອງການຈາກສະມາຊິກ, ຝຶກອົບຮົມຄວາມຮູ້ພື້ນຖານທາງດ້ານການເງິນ ແລະການ ວາງແຜນທຸລະກິດຂະໜາດຄອບຄົວ ໃຫ້ແກ່ລູກຄ້າຂອງສະມາຊິກ, ກອງປະ ຊຸມການເຂົ້າເຖິງການບໍລິການທາງ ດ້ານການເງິນປະຈໍາປີ 2020 ເຮັດບົດຄົ້ນຄວ້າທີ່ຈະຊ່ວຍພັດທະນາຂະແໜງການ, ສະໜັບສະໜູນນັກສຶກສາຝຶກງານຢູ່ສະຖາບັນການເງິນຢ່າງໜ້ອຍ 10 ຄົນ, ສືບຕໍ່ຮ່ວມມືກັບອົງກອນ ADA ແລະອົງການ LUXDev-ADA ໃນການ ໃຫ້ບໍລິການທີ່ປຶກສາທາງດ້ານວິຊາການ ທະນາຄານບ້ານກອງທຶນບ້ານ, ເຂົ້າຮ່ວມກອງປະຊຸມເຄື່ອຂ່າຍທີ່ຕ່າງປະເທດ, ສມກຈ ຈະຈັດກິດຈະກໍາສ້າງທີມງານນອກສະຖານທີ່, ກອງປະຊຸມແລກປ່ຽນຖອດຖອນບົດຮຽນກັບສະມາຊິກ ແລະ ເຂົ້າຮ່ວມກອງປະຊຸມທັງພາຍໃນ ແລະ ຕ່າງປະເທດທີ່ກ່ຽວຂ້ອງກັບຂະແໜງການ.

  ກອງປະຊຸມຍັງໄດ້ມີການປະກອບຄໍາຄິດຄໍາເຫັນຢ່າງມີປະຊາທິປະໄຕໃນຂອບເຂດວຽກງານຂອງສະຖາບັນການເງິນໂດຍສະເໜີໃຫ້ອົງການກ່ຽວຂ້ອງຕິດຕາມກວດກາຢ່າງເຂັ້ມງວດບາງສະຖາບັນການເງິນທີ່ເຄື່ອນໄຫວບໍ່ຖືກຕ້ອງກັບພາລະບົດບາດມັນໄດ້ສົ່ງຜົນກະທົບແກ່ສະຖາບັນການເງິນທີ່ເປັນສະມາຊິກຂອງສະມາຄົມໂດຍສະເພາະທຸລະກິດທີ່ເຄື່ອນໄຫວປ່ອຍກູ້ນອກລະບົບ,ສະເໜີເຂົ້າຮ່ວມຮັບຟັງຜົນການກວດກາກັບທີ່ຂອງສະຖາບັນທີ່ເປັນສະມາຊິກເພື່ອຕິດຕາມການເຄື່ອນໄຫວ ຫຼືສໍາເນົາຜົນຂອງການກວດກາເພື່ອໃຫ້ສະມາຄົມເປັນບ່ອນອີງຂໍ້ມູນໃນການຕິດຕາມ, ແກ້ໄຂບັນຫາປາກົດການຫຍໍ້ທໍ້ທີ່ກ່ຽວຂ້ອງໃຫ້ໄດ້ຢ່າງຂາດຕົວ ແລະມີຜົນດີ.

_____________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์