ເທສະການອາຫານລາວຈະຈັດຂື້ນທ້າຍເດືອນໜ້າ

  ສູນກາງສະຫະພັນແມ່ຍິງລາວ ແລະສະມາຄົມນັກທຸລະກິດແມ່ຍິງລາວຈະຈັດງານເທສະການອາຫານລາວປະຈໍາປິ2020 ຂຶ້ນໃນລະຫວ່າງວັນທີ 28-31 ມັງກອນ ຢູ່ເດີ່ນສວນເຈົ້າອານຸວົງຊຶ່ງພິທີຖະແຫຼງຂ່າວກ່ຽວກັບງານດັ່ງກ່າວມີຂຶ້ນເມື່ອວັນທີ 24 ທັນວາ ທີ່ນະຄອນຫຼວງວຽງຈັນ ໂດຍທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ ແລະເຂົ້າຮ່ວມມີທ່ານ ນາງ ສີລິກິດ ບຸບຜາ ຮອງປະທານສູນກາງສະຫະພັນແມ່ຍິງລາວ, ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກໍາແຫ່ງຊາດ.

  ທ່ານ ນາງ ຈັນທະຈອນ ວົງໄຊ ກາວວ່າ: ເທສະການອາຫານລາວປະຈໍາປີ 2020 ຈັດຂຶ້ນເພື່ອສືບຕໍ່ຊຸກຍູ້ ແລະສົ່ງເສີມຫົວຫນ່ວຍທຸລະກິດຂອງແມ່ຍິງຜູ້ປະກອບການແມ່ຍິງກ່ຽວກັບການຜະລິດ, ການປູກຝັງລ້ຽງສັດ, ປຸງແຕ່ງທຸລະກິດຮ້ານອາຫານການໂຮງແຮມຜູ້ເຮັດການຜະລິດຫັດຖະກໍາຝ້າຍ, ໄໝ, ຈັກສານ ແລະ ອື່ນໆຈາກທ້ອງຖິ່ນ, ຕ່າງແຂວງນັບທັງ ນະຄອນຫຼວງວຽງຈັນ ໃຫ້ມີໂອກາດ ມາວາງສະແດງ ແລະຂາຍຜະລິດຕະ ພັນຂອງຕົນ; ເພື່ອສ້າງໂອກາດໃຫ້ຜູ້ ປະກອບການແມ່ຍິງທັງຫຼາຍມີໂອກາດ ໄດ້ແລກປ່ຽນບົດຮຽນປະສົບການໃນ ການພັດທະນາຜະລິດຕະພັນຂອງຕົນ ໃຫ້ສາມາດຕອບສະໜອງໄດ້ຕາມຄວາມ ຕ້ອງການຂອງຕະຫຼາດໃນຍຸກປະຈຸບັນ ເພື່ອປຸກລະດົມແນວຄິດແບບໃໝ່່ໃນ ການຜະລິດເປັນສິນຄ້າຂອງຜູ້ປະກອບ ການແມ່ຍິງໃຫ້ສ້າງເຄືອນຂ່າຍການ ຄ້າຢ່າງກວ້າງຂວາງໃນຂອບເຂດທົ່ວປະ ເທດທັງສາມາດຂາຍສົ່ງອອກສູ່ຕະຫຼາດສາກົນໄດ້ເພື່ອໂຄສະນາເຜີຍແຜ່ອາຫານພື້ນເມືອງແບບລາວໆຈາກຜະລິດຕະພັນປອດສານພິດທີ່ດີຕໍ່ສຸຂະພາບ.

  ງານຄັ້ງນີ້ຈະມີຮ້ານວາງສະແດງສິນຄ້າປະເພດອາຫານ, ເຄື່ອງຫັດຖະກໍາ, ກະສິກໍາຈາກພາຍໃນ ແລະປະເທດໄທທັງໝົດ190 ຮ້ານ, ນອກນີ້ຍັງມີສິນຈາກປະເທດອາຊຽນ-ສະຖານທູດຕ່າງໆຈາກ 6 ປະເທດ ປະຈໍາ ສປປ ລາວ ຄືສະຖານທຸູດກໍາປູເຈຍ, ໄທ, ສິງກະໂປ, ມຽນມາ, ຟິລິບປິນ ແລະມາເລເຊຍ, ຊຶ່ງຄາດວ່າຈະມີຄົນເຂົ້າ ຮ່ວມ 80 ພັນຄົນ ແລະຈະມີເງິນໝູນວຽງພາຍໃນງານປະມານ 4 ຕື້ກີບ.

  ສ່ວນກິດຈະກໍາພາຍໃນງານຈະມີການແຂ່ງຂັນປຸງແຕ່ງອາຫານເອກລັກລາວທີ່ມາຈາກ 17 ແຂວງ ແລະ 1 ນະຄອນຫຼວງ, ຈົກສະຫຼາກຜົນລາງວັນບັດສ່ຽງໂຊກຈາກໂຄງການອິນເຕີພລາດເພື່ອຊ່ວຍເຫຼືອຄົນເຈັບຈາກໄຟໄໝ້, ນໍ້າຮ້ອນລວກ ແລະຄົນອານາຖາ, ມີການກວດສຸຂະພາບຟຣີ ຈອງ ດຣ. ສິວິໄຊ LAO INTER CLINIC ຈະບໍລິການກວດສຸຂະພາບຟຣີ 35 ລາຍການດ້ວຍລະບົບທີ່ທັນສະໄໝວ່ອງໄວທັນໃຈ ແລະຮັບຮູ້ຜົນກວດທັນທີ.

  ໂອກາດດັ່ງກ່າວ ທ່ານ ນາງ ຈັນທະຈອນ ວົງໄຊ ໄດ້ເຊີນຊວນແຂກທັງພາຍໃນ ແລະຕ່າງປະເທດເຂົ້າທ່ຽວຊົມງານເທສະການອາຫານຄັ້ງນີ້ຊຶ່ງຈະມີໂອກາດໄດ້ຊີມລົດ ຊາດອາຫານເອກະລັກພື້ນເມືອງລາວ, ຈະໄດ້ຢ້ຽມຊົມ ແລະ ຊື້ສິນຄ້ານາໆຊະນິດຈາກພາຍໃນ ແລະ ຕ່າງປະເທດ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์