ລັດເຂັ້ມງວດຫ້າມຂື້ນລາຄາສິນຄ້າໃນໄລຍະສະຫຼອງປີໃໝ່ສາກົນ

  ນະຄອນຫຼວງວຽງຈັນໄດ້ອອກແຈ້ງການຫ້າມບໍ່ໃຫ້ຜູ້ປະກອບການ, ພໍ່ຄ້າຊາວຂາຍກັກຕຸນສວຍໂອກາດຂຶ້ນລາຄາສິນຄ້າຕາມລຳພັງໃຈໃນໄລຍະການສະເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ່ສາກົນ 2020 ພ້ອມທັງຮຽກຮ້ອງໃຫ້ບັນດາຊາວຄ້າຂາຍຈັດຕັ້ງປະຕິບັດສະໜອງສິນຄ້າໃຫ້ພຽງພໍໃນການຕັ້ງລາຄາຕາມລະບຽບກົດໝາຍ.

  ອີງຕາມແຈ້ງການພະແນກອຸດສາຫະກຳ ແລະການຄ້ານະຄອນຫຼວງວຽງຈັນໃຫ້ຮູ້ວ່າ: ເພື່ອເຮັດໃຫ້ການຄຸ້ມຄອງສິນຄ້າ ແລະ ການບໍລິການເຂົ້າສູ່ລະບຽບກົດໝາຍບົນພື້ນຖານກົນໄກເສດຖະກິດຕະຫຼາດຈິງໃຫ້ຜູ້ປະກອບການທຸລະກິດ, ຊາວຄ້າຂາຍນຳສິນຄ້າຂອງຕົນມາຈຳໜ່າຍໃນລາຄາທີ່ລັດກຳນົດໃຫ້ໂດຍສະເພາະສິນຄ້າປະເພດເຂົ້າກິນ, ຊີ້ນ, ປາ ແລະ ອື່ນໆ ແມ່ນໃຫ້ຂາຍລາຄາປົກກະຕິທີ່ເຄີຍຂາຍຜ່ານມາ ຫຼື ການຂຶ້ນລາຄາໃຫ້ມີສົມເຫດສົມຜົນຫ້າມກັກຕຸນສວຍໂອກາດຂຶ້ນລາຄາຕາມລຳພັງໃຈໃນນີ້ສຳລັບລາຄາຂາຍຍ່ອຍປະເພດຊີ້ນໝູ, ກະດູກຂ້າງກຳນົດບໍ່ໃຫ້ເກີນ 36 ພັນກີບຕໍ່ກິໂລກຣາມ,ປະເພດຊີ້ນໝູ 3 ຊັ້ນ, ຊີ້ນຕິດມັນ ແມ່ນບໍ່ໃຫ້ເກີນ 34 ພັນກີບຕໍ່ກິໂລກຣາມສ່ວນຊີ້ນງົວ, ຄອຍລາຄາສູງສຸດບໍ່ໃຫ້ເກີນ 65-75 ພັນກີບຕໍ່ກິໂລກຣາມ ແລະປານິນບໍ່ໃຫ້ເກີນ 20 ພັນກີບຕໍ່ກິໂລກຣາມ.

  ນອກນັ້ນຍັງຫ້າມການນຳເຂົ້າ ແລະ ຈຳໜ່າຍສິນຄ້າປະເພດໝາກກະໂພກ, ວັດຖຸອຸປະກອນທີ່ເກີດສຽງແຕກດັງທຸກຊະນິດທີ່ນຳຜົນສະທົບຕໍ່ຄວາມບໍ່ສະຫງົບໃນສັງ ຄົມພ້ອມທັງຮຽກຮ້ອງໃຫ້ບັນດາຊາວຂາຍຈັດຕັ້ງປະຕິບັດສະໜອງສິນຄ້າມີພຽງພໍໃນການຕັ້ງລາຄາຕາມລະບຽບກົດໝາຍ ແລະໄດ້ແຕ່ງຕັ້ງຄະນະຈັດສັນຕະຫຼາດທຸກຂະແໜງເອົາໃຈໃສ່ຕິດຕາມກວດກາເພື່ອໃຫ້ຄຸ້ມຄອງລາຄາສິນຄ້າໃນຊ່ວງໄລຍະຈັດງານສະເຫຼີມສະຫຼອງສົ່ງທ້າຍປີເກົ່າ 2019  ແລະຕ້ອນຮັບປີໃໝ່ 2020 ມີຄວາມເບີກບານມ່ວນຊື່ນ.

__________

ຂຽນໂດຍ: ແພງຕາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์