ໂຮງຮຽນ13ແຫ່ງຍົກລະດັບນຳໃຊ້ເຄື່ອງທົດລອງວິທະຍາສາດ

   ກອງປະຊຸມຝຶກອົບຮົມຍົກລະດັບການນຳໃຊ້ເຄື່ອງທົດລອງວິທະຍາສາດສຳລັບໂຮງຮຽນມັດທະຍົມສົມບູນຕົວແບບຈັດຂຶ້ນໃນລະຫວ່າງວັນທີ 28 ມັງກອນ ຫາ 1 ກຸມພາ 2019 ທີ່ໂຮງຮຽນມິດຕະພາບຄຳມ່ວນ-ກວາງບິ່ງແຂວງຄຳມ່ວນເປັນກຽດເຂົ້າຮ່ວມມີທ່ານ ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະກີລາ, ມີບັນດາກົມ, ພະແນກການອ້ອມຂ້າງກະຊວງ, ມີຜູ້ອຳນວຍການໂຮງງານຜະລິດອຸປະກອນການສຶກສາ, ພາກສ່ວນກ່ຽວຂ້ອງຕະຫຼອດເຖິງພະນັກງານຄູ-ອາຈານໂຮງຮຽນມັດທະຍົມຕົວແບບ 13 ແຫ່ງທົ່ວປະເທດເຂົ້າຮ່ວມ.

   ໃນຕະຫຼອດໄລຍະການດຳເນີນຝຶກອົບຮົມຄະນະຮັບຜິດຊອບຊຸດຝຶກອົບຮົມຈະໄດ້ມີການປະເມີນຄວາມຮູ້, ຄວາມສາມາດຂອງບັນດາຄູ-ອາຈານພ້ອມທັງນຳພາຄົ້ນຄວ້າເນື້ອໃນປຶ້ມຄູ່ມື, ນຳພາເຮັດການທົດລອງນຳໃຊ້ ແລະທົດລອງສອນຕົວຈິງ ແລະສະຫຼຸບຖອດຖອນບົດຮຽນ. ທັງນີ້ກໍ່ເພື່ອຮັບປະກັນໃຫ້ເຄື່ອງທົດລອງ ແລະສື່ອຸປະກອນການຮຽນ-ການສອນສາຍວິທະຍາສາດທຳມະຊາດໂດຍສະເພາະແມ່ນວິຊາຄະນິດສາດ, ຟີຊິກສາດ, ຊີວະວິທະຍາ ແລະເຄມີສາດທີ່ທາງລັດຖະບານສະໜອງໃຫ້ໄດ້ຖືກນຳໃຊ້ຢ່າງມີປະໂຫຍດສູງສຸດໃຫ້ແກ່ຄູສອນ ແລະນັກຮຽນທັງເປັນການສົ່ງເສີມໂຮງຮຽນໃຫ້ມີການຈັດການຮຽນ-ການສອນພາກປະຕິບັດຕົວຈິງ ແລະນຳໃຊ້ເຄື່ອງທົດລອງ, ສື່ອຸປະກອນຕ່າງໆໃຫ້ມີປະສິດທິພາບສູງ, ເຮັດໃຫ້ຄູ-ອາຈານ ແລະຜູ້ບໍລິຫານໂຮງຮຽນເຂົ້າໃຈ ແລະຮັບຮູ້ເຖິງບົດບາດຄວາມສຳຄັນກ່ຽວກັບການຮຽນ-ການສອນພາກປະຕິບັດຕົວຈິງໃນວິຊາວິທະຍາສາດທຳມະຊາດເພື່ອຮັບປະກັນລະບົບການຮຽນ-ການສອນຄົບຕາມໂຄງການຫຼັກສູດແຫ່ງຊາດ.

   ການຝຶດອົບຮົມໃນຄັ້ງນີ້ຍັງເປັນບ່ອນອີງໃຫ້ບັນດາຄູ-ອາຈານໄດ້ນຳເອົາບົດຮຽນດັ່ງກ່າວໄປຖ່າຍຖອດໃຫ້ແກ່ບັນດາພະນັກງານຄູໃນບັນດາໂຮງຮຽນມັດທະຍົມສົມບູນຕົວແບບທີ່ຢູ່ໃນກົມກອງຕົນຕື່ມອີກ. ຊຶ່ງບັນດາໂຮງຮຽນທີ່ເຂົ້າຮ່ວມມີໂຮງຮຽນມັດທະຍົມຕົວແບບຈາກນະຄອນຫຼວງວຽງຈັນ, ແຂວງບໍ່ແກ້ວ, ອຸດົມໄຊ, ຫົວພັນ, ຊຽງຂວາງ, ໄຊຍະບູລີ, ແຂວງວຽງຈັນ, ບໍລິຄຳໄຊ, ສະຫວັນນະເຂດ, ສາລະວັນ, ຈຳປາສັກ ແລະແຂວງຄຳມ່ວນ.

แชร์