ຄະນະນຳເມືອງຫົງສາ ຮ່ວມງານບຸນປະເພນີປະຈຳປີເຜົ່າໄປຣ່

  ເພື່ອເປັນການອະນຸລັກຮັກສາຮີດຄອງປະເພນີອັນດີງາມຂອງເຜົ່າ ແລະເພີ່ມທະວີຄວາມສາມັກຄີປອງດອງລະຫວ່າງປະຊາຊົນບັນດາເຜົ່າໃຫ້ແໜ້ນແຟ້ນຍິ່ງຂຶ້ນ ແລະ ເພື່ອເປັນການຊົມເຊີຍຜົນສຳເລັດໃນການເພີ່ມພູນຜະລິດຜົນຂອງປະຊາຊົນເຜົ່າໄປຣ່, ໃນວັນທີ 19 ທັນວາ 2019 ຄະນະນຳເມືອງຫົງສາ ແຂວງໄຊຍະບູລີ ນຳໂດຍ ທ່ານ ນາງ ດາວວິນ ລາດຊະກິດ ຮອງເລຂາພັກເມືອງຮອງເຈົ້າ ເມືອງຫົງສາ ພ້ອມດ້ວຍການນຳຂອງເມືອງໄດ້ເຂົ້າຮ່ວມງານບຸນປະເພນີປະຈຳປີຂອງເຜົ່າໄປຣ່ຢູ່ທີ່ບ້ານພູແລ້ງກາງ, ໂດຍມີຄະນະອໍານາດການປົກຄອງບ້ານພ້ອມດ້ວຍປະຊາຊົນເຂົ້າຮ່ວມ.

 ທ່ານ ບຸນລັກ ໄຊຍະວົງ ນາຍບ້ານໆ ພູແລ້ງກາງ ໄດ້ຜ່ານປະຫວັດຄວາມເປັນມາບຸນປະເພນີປະຈຳປີຂອງເຜົ່າໄປຣ່ ໂດຍຫຍໍ້ໃຫ້ຮູ້ວ່າ: ບຸນປະເພນີປະຈຳປີຂອງເຜົ່າໄປຣ່ນີ້, ເອີ້ນກັນວ່າ: ກິນດອກດ້າຍ-ດອກແດງ ຫຼືເວົ້າຕາມພາສາໄປຣ່ມັກເວົ້າກັນວ່າ: ແອັງຄຼັອງ, ແມ່ນເປັນບຸນປະເພນີຕາມຮີດ 12 ຂອງລາວຊຶ່ງເລີ່ມແຕ່ເດືອນຈຽງຫາ ເດືອນຍີ່ ໂດຍຈະກຳນົດເອົາ ມື້ໃດມື້ໜຶ່ງຄື: ມື້ກົດ, ມື້ຮ່ວງ ແລະ ມື້ກາບເພື່ອເປັນການເຕົ້າໂຮມບັນດາຍາດຕິພີ່ນ້ອງທີ່ຢູ່ທາງໃກ້ ແລະໄກໃຫ້ມາຜູກແໜ້ນຄວາມສາມັກຄີ ພ້ອມທັງຊົມເຊີຍຕໍ່ຜົນງານການ ເກັບກູ້ພືດຜົນລະປູກປະຈຳປີຂອງປະຊາຊົນແລ້ວຈັດພິທີໄວ້ບັນພະບູລຸດທີ່ລ່ວງລັບໄປແລ້ວເພື່ອລະນຶກ ເຖິງຄຸນງາມຄວາມດີຂອງພໍ່ແມ່ປູ່

ຍ່າຕາຍາຍ ຫຼື ເວົ້າອີກດ້ານໜຶ່ງ ເພື່ອເປັນການຮຽກເອີ້ນເອົາຂວັນຈາກໄຮ່, ນາ, ຮົ້ວ, ສວນກັບມາບ້ານນັ້ນເອງ, ສໍາລັບການຫ້າງຫາກະກຽມໃນມື້ງານບຸນນັ້ນ, ກໍ່ ໄດ້ນໍາເອົາຜົນລະປູກຈາກໄຮ່, ນາ, ຮົ້ວ, ສວນຂອງປະຊາຊົນມາໂຮມກັນເຊັ່ນ: ໝາກອຶ, ໝາກຝັກ, ໝາກເຜືອກ, ໝາກມັນ, ໝາກຖົ່ວ ແລະດອກໄມ້ສີແດງພ້ອມທັງເຫຼົ້າໄຫ,ຝ້າຍຂາວ,ໄກ່ຕົ້ມ,ແລ້ວຈັດເປັນພາຂວັນຕາມປະເພນີ,ພາຍໃນງານບຸນດັ່ງກ່າວນີ້, ຜູ້ເຂົ້າຮ່ວມກໍ່ໄດ້ຮັບຊົມການສະແດງສິລະປະຂອງນ້ອງນ້ອຍນັກຮຽນຕື່ມອີກ.

--------

  ໃນໂອກາດດັ່ງກ່າວ, ທ່ານ ສົມຍົດ ອານຸວົງ ປະທານແນວລາວສ້າງຊາດເມືອງໄດ້ຜ່ານສານອວຍພອນຂອງປະທານແນວລາວສ້າງຊາດເນື່ອງໃນໂອກາດວັນບຸນປະເພນີປີໃໝ່ 2020 ຂອງບັນດາຊົນເຜົ່າພີ່ນ້ອງປະຊາຊົນລາວບັນດາເຜົ່າໃນທົ່ວປະເທດທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງ ແລະພ້ອມດຽວກັນນັ້ນ, ທ່ານ ນາງ ດາວວິນ ລາດຊະກິດ ຮອງເລຂາພັກເມືອງຫົງສາຮອງເຈົ້າ ເມືອງຫົງສາກໍ່ໄດ້ໂອ້ລົມຄະນະອຳນາດການປົກຄອງບ້ານ ແລະປະຊາຊົນທີ່ເຂົ້າຮ່ວມຕື່ມອີກ.

------------

ຂຽນໂດຍ: ກິດຕິສັກ ບົວໄລ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์