ປ່າສະຫງວນ ດົງນາຕາດ ແຫຼ່ງທ່ອງທ່ຽວທາງທຳມະຊາດ

 ໃນປະຈຸບັນໆດາແຫຼ່ງທ່ອງທ່ຽວທີ່ນອນຢູ່ໃນເຂດປ່າສະຫງວນຂອງປະເທດເຮົາລ້ວນແຕ່ຈັດໃຫ້ມີກິດຈະກຳຍ່າງປ່າຊົມທຳມະຊາດຊຶ່ງກໍໄດ້ຮັບຄວາມນິຍົມສູງຈາກນັກທ່ອງທ່ຽວໂດຍສະເພາະແມ່ນນັກທ່ອງທ່ຽວຕ່າງປະເທດ, ສະເພາະຢູ່ປ່າສະຫງວນດົງນາຕາດມີຄວາມອຸດົມສົມບູນ ທາງດ້ານຊີວະນາໆພັນ, ມີໜອງນໍ້າທຳມະຊາດທີ່ບໍ່ມີຍາມບົກແຫ້ງ, ມີສັດປ່າຫຼາຍຊະນິດ, ຈາກຄວາມອຸດົມສົມບູນທາງທຳມະຊາດຈຶ່ງເຮັດໃຫ້ປ່າສະຫງວນດັ່ງກ່າວໄດ້ກາຍມາເປັນແຫຼ່ງທ່ອງທ່ຽວທາງທຳມະຊາດຂອງແຂວງສະຫັວນນະເຂດ.

  ຕາມການເລົ່າຂານກັນມາວ່າແຕ່ກີ້ແຕ່ກ່ອນມີຄູ່ຜົວເມຍຄູ່ໜຶ່ງທີ່ອາໄສຢູ່ໃນປ່າແຫ່ງນີ້ຜົວ ແລະເມຍຊື່ວ່າທ້າວຕາດ ແລະນາງດົງຢູ່ມາຫຼາຍຟ້າລ້າປີໄດ້ລູກຫລານ ແລະ ເກີດແກ່ເຈັບຕາຍ, ລູກຂອງລາວໄດ້ເອົາລາວໄປຝັງຢູ່ໃນປ່າຢູ່ມາບໍ່ດົນບ່ອນຝັງທ້າວຕາດ ແລະນາງດົງກໍ່ເກີດມີປ່າຕຶບໜາ ແລະເຮັດໃຫ້ລູກລາວ ແລະປະຊາຊົນເອີ້ນດົງ ນັ້ນວ່າ: “ດົງນາຕາດ” (ດົງແມ່ນຊື່ເມຍ ແລະ ຕາດແມ່ນຊື່ຜົວ) ຈົນເຖີງປະຈຸບັນນີ້, ສະຖານທີ່ດັ່ງກ່າວຕັ້ງຢູ່ເຂດບ້ານທາດໄລຍະຫ່າງຈາກຕົວເມືອງ ໄກສອນ ພົມວິ ຫານ 15 ກິໂລແມັດ ຕະຫຼອດໄລຍະທາງການຍ່າງປ່ານັກທ່ອງທ່ຽວຈະໄດ້ສຳພັດກັບຄວາມອຸດົມສົມບູນຂອງປ່າໄມ້, ຄວາມງາມເຢັນຂອງປ່າ,ໄດ້ສໍາພັດກັບສຽງສັດປ່ານາໆຊະນິດລວມເຖິງດອກໄມ້ປ່ານາໆພັນ.

  ປະຈຸບັນສະຖານທີ່ແຫ່ງນີ້ຈຶ່ງກາຍເປັນແຫຼ່ງທ່ອງທ່ຽວທີ່ສາມາດດຶງດູດນັກທ່ອງທ່ຽວພາຍໃນ ແລະຕ່າງປະເທດເຂົ້າຊົມເປັນຈຳນວນຫຼາຍມີເສັ້ນທາງເຂົ້າສະດວກສະ ບາຍ ແລະເປັນແຫຼ່ງທ່ອງທ່ຽວທາງທຳມະຊາດອັນເປັນເອກະລັກສະເພາະຂອງຊາວສະຫວັນນະເຂດທີ່ສວຍສົດງົດງາມ ແລະ ເໝາະສຳລັບນັກທ່ອງທ່ຽວຜູ້ທີ່ມັກທ່ຽວຊົມທຳມະຊາດພູຜາປ່າໄມ້ ແລະຫ້ວຍນໍ້າລຳເຊ.

-----------

ໂດຍ: ວົງມະນີ

• 25/12/2019