ແຂ່ງຂັນກີລານັກສຶກສາ ສະຖາບັນການສຶກສາຊັ້ນສູງ ແລະວິຊາຊີບ

  ວັນທີ 23 ທັນວາ 2019 ທີ່ສະໜາມກີລາວິທະຍາໄລການເງິນພາກເໜືອໄດ້ເປີດງານແຂ່ງຂັນກີລານັກສຶກສາສະຖາບັນການສຶກສາຊັ້ນສູງ ແລະວິຊາຊີບແຂວງຫຼວງພະບາງ ຄັ້ງທີ 6 ໃນລະຫວ່າງວັນທີ 23-27 ທັນວາ 2019 ໂດຍການເປັນປະທານເຂົ້າຮ່ວມຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ທ່ານ ສີສະຫວັນ ປັນຍາສະຫວັດ ຮອງຜູ້ອຳນວຍການວິທະຍາໄລການເງິນພາກເໝືອ, ທ່ານ ຊາຍສະຫວັນ ຈັນທະມິດ ຮອງຫົວໜ້າພະແນກສືກສາທິການ ແລະກີລາ ແຂວງພ້ອມດ້ວຍຜູ້ອຳນວຍການຈາກ 10 ສະຖາບັນການສຶກສາ,ຄະນະກຳມະການ, ຄູຝຶກ,ນັກກີລາ, ນັກສຶກສາ ແລະບັນດາພາກສ່ວນທີ່ກ່ຽວຂ້ອງທີ່ໃຫ້ການສະໜັບ ສະໜູນໃຫ້ກຽດເຂົ້າຮ່ວມເປັນຈຳນວນຫຼວງຫຼາຍ.

  ທ່ານ ສີສະຫວັນ ປັນຍາສະຫວັດ ໄດ້ກ່າວວ່າ: ໃນການເປີດງານແຂ່ງຂັນກີລາປະຈຳສົກປີ  2018-2019 ຂອງສະຖາບັນການສຶກສາຂຶ້ນໃນຄັ້ງນີ້ໂດຍມີຈຸດປະສົງກໍ່ເພື່ອກະຕຸ້ນນັກສຶກສາໃນສະຖາບັນທັງ 10 ແຫ່ງໃຫ້ມີຄວາມຕື່ນຕົວ, ເຫັນຄວາມສຳຄັນໃນການຫຼິ້ນກີລາ,ສົ່ງເສີມສຸຂະພາບພະລານາໄມຂອງນັກສຶກສາໃຫ້ມີຄວາມສົມ ບູນ, ແຂງແຮງທັງຮ່າງກາຍ ແລະຈິດໃຈ, ໃຫ້ນັກສຶກສາຮູ້ຈັກນຳໃຊ້ເວລາຫວ່າງໃຫ້ເປັນປະໂຫຍດ, ຫ່າງໄກຈາກສິ່ງເສບຕິດ ແລະສິ່ງມືນເມົາໃນທາງທີ່ບໍ່ດີຕ່າງໆ.

   ໃນການແຂ່ງຂັນກີລານັກສຶກສາຊັ້ນສູງວິຊາຊີບຄັ້ງນີ້ມີຄູ່ຝຶກທັງໝົດ 75 ຄົນ, ນັກກີລາເຂົ້າຮ່ວມທັງໝົດ 562 ຄົນ ແລະ ກຳມະການຕັດສິນໃນການແຂ່ງຂັນແມ່ນມອບໃຫ້ພະແນກສຶກສາທິການ ແລະ ກີລາແຂວງເປັນຝ່າຍຕັດສິນ, ໃນການເປັນເປີດງານແຂ່ງຂັນຄັ້ງນີ້ໃຊ້ງົບທັງໝົດ126 ລ້ານກີບ, ໃນນັ້ນແມ່ນໄດ້ຈາກການສົມທົບຂອງແຕ່ລະສະຖາບັນການສຶກສາທີ່ເຂົ້າຮ່ວມການແຂ່ງຂັນຕາມເງື່ອນໄຂຂອງໃຜມັນ ຊຶ່ງເລີ່ມແຕ່ 2-18 ລ້ານກີບ, ນອກນັ້ນຍັງໄດ້ ຮັບຈາກການສະໜັບສະໜູນທາງ ດ້ານວັດຖຸປັດໄຈຈຳນວນໜຶ່ງພາກ ສ່ວນຕ່າງ,ໃນການແຂ່ງຂັນຄັ້ງນີ້ຈະໃຊ້ເວລາທັງໝົດ 5 ວັນ ແຕ່ວັນທີ 23-27ທັນວາ 2019,ສ່ວນການແຂ່ງຂັນຕົວຈິ່ງແມ່ນໄດ້ເລີ່ມແຕ່ວັນທີ 17 ທັນວາ 2019 ໂດຍມີການແຂ່ງຂັນທັງໝົດ 4 ປະເພດກີລາຄຶ: ເປຕັງ (ຍິງ-ຊາຍ), ກະຕໍ້ (ຍິງ-ຊາຍ), ບານສົ່ງ (ຍິງ-ຊາຍ), ແລະບານເຕະ (ຍິງ-ຊາຍ).

  ໃນໂອກາດດຽວກັນນັ້ນ ທ່ານ ວົງສະຫວັນ ເທບພະຈັນ ຍັງໄດ້ກ່າວວ່າ: ການແຂ່ງຂັນກີລານັກສຶກສາ 10 ສະຖາບັນການສຶກສາຄັ້ງນີ້ໄດ້ເຫັນເຖິງການສົ່ງເສີມເອົາໃຈໃສ່ຊຸກຍູ້ການຫຼິ້ນກີລາລົງສູ່ຊາວໝຸ່ມນັກຮຽນນັກສຶກສາຢ່າງແທ້ຈິງ, ດັ່ງທີ່ໄດ້ສະແດງອອກໃນ 5 ຫຼັກມູນຂອງການສຶກສາ: ຄຸນສົມບັດສຶກສາ, ປັນຍາສຶກສາ, ພາລະສຶກສາ,ສິລະປະສຶກສາ ແລະແຮງງານສຶກສາ, ເພາະກີລາຖືວ່າເປັນຢາວິເສດທີ່ສາມາດເຮັດໃຫ້ຄົນມີສຸຂະພາບແຂງແຮງ, ມີລະບຽບວິໄນ, ມີຄວາມຮັບຜິດຊອບ, ຮູ້ແພ້-ຮູ້ຊະນະ ແລະຮູ້ໃຫ້ອະໄພເຊິ່ງກັນ ແລະກັນ.

-------------

ຂຽນໂດຍ: ສອນມະນີ ໄຊສະຫວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์