9 ບ້ານ ປະສົບໄພພິບັດເຂື່ອນເຊປ່ຽນ-ເຊນໍ້ານ້ອຍ ຮັບເງິນຊ່ວຍເຫຼືອ

 ວັນທີ 20 ທັນວາ 2019 ທະນາຄານການຄ້າຕ່າງປະເທດລາວມະຫາຊົນ ສາຂາແຂວງອັດຕະປື ໄດ້ມອບເງິນຊ່ວຍເຫຼືອຈໍານວນ 4,05 ຕື້ກີບ ໃຫ້ປະຊາຊົນ 9 ບ້ານທີ່ ເມືອງສະໜາມໄຊ ຜູ້ປະສົບໄພພິບັດນໍ້າຖ້ວມຈາກເຂື່ອນເຊປຽນ-ເຊ ນໍ້ານ້ອຍແຕກ.

  ໂດຍການໃຫ້ກຽດເຂົ້າຮ່ວມໃນພິທີຂອງ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ມີທ່ານ ບົວວັນ ສີລະລິວົງ ຮອງອໍານວຍອໍານວຍການໃຫຍ່ທະນາຄານການຄ້າຕ່າງປະເທດລາວມາຫາຊົນພ້ອມດ້ວຍຄະນໍາຂອງແຂວງ, ຄະນະນໍາຂອງເມືອງ, ອໍານາດການປົກຄອງບ້ານ ແລະປະຊາຊົນເຂົ້າຮ່ວມ.

 ໃນພິທີ ທ່ານ ບົວວັນ ສີລະລິວົງ ຮອງອໍານວຍການໃຫຍ່ທະນາຄານການຄ້າຕ່າງປະເທດລາວມະຫາຊົນກໍໄດ້ໃຫ້ກຽດຂຶ້ນກ່າວຈຸດປະສົງແລກປ່ຽນຄໍາເຫັນວ່າ: ຈໍານວນເງິນທີ່ໄດ້ມອບໃນຄັ້ງນີ້ແມ່ນໄດ້ມາການລະດົມຈາກສັງຄົມທັງພາຍໃນ ແລະຕ່າງປະເທດຜ່ານ BCEL oneHeart ໃຫ້ແກ່ຜູ້ຖືກຜົນກະທົບຈາກໄພພິບັດນໍ້າຖ້ວມຈາກເຂື່ອນເຊປຽນ-ເຊນໍ້ານ້ອຍແຕກທີ່ເມືອງສະໜາມໄຊ, ໂດຍມີຜູ້ເຂົ້າຮ່ວມບໍລິຈາກທັງພາຍໃນ ແລະ ຕ່າງປະເທດມີທັງໝົດ 26.991 ຄັ້ງ, ເປັນເງິນ 4,05 ຕື້ກີບ ໃຫ້ແກ່ 9 ບ້ານຄື: ບ້ານໂຄກກ່ອງ, ບ້ານແທຄຸ້ມທ່າອວນ, ບ້ານສະໝອງໃຕ້, ບ້ານທ່າແສງຈັນ, ບ້ານທ່າຫີນ, ບ້ານຫີນລາດ, ບ້ານໃໝ່, ບ້ານໄຊດອນໂຂງ ແລະບ້ານຕະມໍ ຢອດ.

 ພິທີມອບເງິນຊ່ວຍເຫຼືອດັ່ງກ່າວແມ່ນໄດ້ຈັດຂຶ້ນທີ່ສູນພັກຊົ່ວຄາວຈຸດບ້ານດົງບາກ ເມືອງສະໜາມໄຊຕາງໜ້າມອບໂດຍທ່ານ ບົວວັນ ສີລະລິວົງ ຮອງອໍານວຍການໃຫຍ່ທະນາຄານການຄ້າຕ່າງປະເທດລາວມະຫາຊົນ ແລະຕາງໜ້າຮັບໂດຍນາຍບ້ານ 9 ບ້ານ ຢ່າງສົມກຽດເພື່ອເປັນການປະກອບສ່ວນຊ່ວຍເຫຼືອແບ່ງເບົານໍ້າຈິດນໍ້າໃຈແກ້ ໄຂຊີວິດການເປັນຢູ່ຂອງປະຊາຊົນຜູ້ປະສົບໄພໃນ 9 ບ້ານໄດ້ຮັບການດີຂຶ້ນເທື່ອລະກ້າວ.

__________

ຂຽນໂດຍ: ຊິບປະໄຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์