ຍທຂ ທ່າແຕງ ເອົາໃຈໃສ່ຕິດຕາມໂຄງການສ້ອມແປງເສັ້ນທາງໄພພິບັດສຸກເສີນ

   ວັນທີ 18 ທັນວາ 2019 ທ່ານ ບົວໄຂ ໄຊຍະວົງ ຫົວໜ້າຫ້ອງການໂຍທາທິການ ແລະຂົນສົ່ງເມືອງທ່າແຕງ ແຂວງເຊກອງ ພ້ອມດ້ວຍພະແນກ, ຫ້ອງການກ່ຽວ ຂ້ອງຂັ້ນແຂວງ-ເມືອງ ແລະ ຜູ້ຕາງໜ້າບໍລິສັດຮັບເໝົາກໍ່ສ້າງລົງຕິດຕາມກວດກາຄວາມຄືບໜ້າໂຄງການສ້ອມແປງເສັ້ນທາງໄພພິບັດຢູ່ 2 ເຂດຈຸດ ສຸມພັດທະນາຄື: ບ້ານຕຸມຍໍຫາເຂດການ ຜະລິດກະສິກຳຂອງປະຊາຊົນ, ໜ້າບໍລິສັດຄູນມີໄຊ ຫາແຫຼ່ງທ່ອງຕາດໄຟໄໝ້ ແລະທາງບ້ານບ້ານຈຸລາ (ຄຸ້ມປາຍ) ເຂດການຜະລິດກະສິກໍາຂອງປະຊາຊົນ.

  ທ່ານ ໂພຊະນະ ໄຊເສນາ ຮອງຫົວໜ້າຫ້ອງການໂຍທາທິການ ແລະຂົນສົ່ງເມືອງ (ວິຊາການປະຈຳສະໜາມເຈົ້າຂອງໂຄງການ) ກ່າວວ່າ: ໂຄງການກໍ່ສ້າງ ແລະສ້ອມແປງເສັ້ນທາງແຍກ 1H ໜ້າບໍລິສັດຄູນມີໄຊ ຫາແຫຼ່ງທ່ອງທ່ຽວຕາດໄຟໄໝ້ລວງຍາວ 7 ກິໂລແມັດ, ກວ້າງ 6 ແມັດ, ມູນຄ່າ 7 ຮ້ອຍລ້ານກວ່າກີບ ແມ່ນໄດ້ເລີ່ມລົງມືກໍ່ສ້າງມາແຕ່ວັນທີ 12 ກັນຍາຫາວັນທີ 11 ຕຸລາ 2019 ຊຶ່ງແມ່ນບໍລິສັດຄູນມີໄຊກໍ່ສ້າງສ້ອມແປງຂົວ-ທາງ ເປັນຜູ້ຮັບເໝົາໂດຍມີໜ້າວຽກຖົມຂຸມຈຸດທາງຂາດ ທີ່ນໍ້າກັດເຊາະໜ້າທາງ,ຕັດດິນຟື້ນທາງພ້ອມຖົມກັບທີ່ໜ້າທາງ,ຈົກຮ່ອງລະບາຍນໍ້າຂ້າງທາງດ້ວຍກົນຈັກ,ກໍ່ສ້າງທໍ່ລະບາຍນໍ້າພ້ອມຝາປິດຟຣີ 600 ມມ

(1 ແຫ່ງ), ທາງເຂົ້າບ້ານຕຸ້ມຍໍຫາຈຸດເຊື່ອມຕໍ່ເຂົ້າເຂດການຜະລິດກະສິກໍາຂອງປະຊາຊົນມີຄວາມຍາວ 5,6 ກິໂລແມັດ, ກວ້າງ 6 ແມັດ, ມູນຄ່າ 3 ຮ້ອຍກວ່າລ້ານກີບ ແມ່ນໄດ້ເລີ່ມລົງມືກໍ່ສ້າງມາແຕ່ວັນທີ 12 ກັນຍາຫາວັນທີ 10 ຕຸລາ 2019 ໂດຍແມ່ນບໍລິສັດສອນກໍ່ສ້າງສ້ອມແປງຂົວ-ທາງ ເປັນຜູ້ຮັບເໝົາປະກອບມີໜ້າວຽກຍົກຍ້າຍດິນເຈື່ອນອອກຈາກທາງ, ຖົມຂຸມທາງໜ້າ (ດ້ວຍວັດສະດຸຈາກບໍ່), ຈົກດິນບວມອອກຈາກໜ້າທາງພ້ອມຖົມຄືນ, ຈົກຮ່ອງລະບາຍນໍ້າດ້ວຍກົນຈັກ.

 ສ່ວນທາງບ້ານຈຸນລາ (ຄຸ້ມບ້ານປາຍ) ເຂດການຜະລິດກະສິກຳຂອງປະຊາຊົນມີຄວາມຍາວ 2,3 ກິໂລແມັດ, ກວ້າງ 6 ແມັດ, ມູນຄ່າ 3 ຮ້ອຍກວ່າລ້ານກີບ ແມ່ນໄດ້ເລີ່ມລົງມືກໍ່ສ້າງມາແຕ່ວັນທີ 12 ກັນຍາຫາວັນທີ 21 ຕຸລາ 2019 ໂດຍແມ່ນບໍລິສັດສຸກປະສົງກໍ່ສ້າງສ້ອມແປງຂົວ-ທາງ ເປັນຜູ້ຮັບເໝົາທີ່ປະກອບມີໜ້າວຽກບຸກເບີກແລວທາງພ້ອມຂະຫຍາຍໜ້າທາງ,ຈົກດິນບວມອອກຈາກໝ້າທາງພ້ອມຖົມຄືນບາງຈຸດ, ຕັດສັນພູ ແລະຕັດພື້ນທາງ, ມາຮອດປະຈຸບັນການກໍ່ສ້າງສ້ອມແປງເສັ້ນທາງດັ່ງກ່າວແມ່ນສຳເລັດ 100%. ຊຶ່ງສາມາດເຮັດໃຫ້ການສັນຈອນໄປ-ມາ ຫາສູ່ກັນລະຫວ່າງບ້ານຕໍ່ບ້ານ, ບ້ານຫາເຂດການຜະລິດຂອງປະຊາຊົນໄດ້ມີຄວາມສະ ດວກສະບາຍດີຂຶ້ນ.

------------------

ຂຽນໂດຍ: ລັດຕະນາ ຄຳສົມພູ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์