ຜູ້ປະສົບໄພເມືອງຊົນນະບູລີໄດ້ຮັບເຄື່ອງຊ່ວຍເຫຼືອ

  ເມື່ອບໍ່ດົນຜ່ານມານີ້ ທ່ານ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກພ້ອມດ້ວຍຄະນະໂດຍການນຳພາທາງຂອງທ່ານ ບົງສຸວັນ ພັນ         ທະວົງສາ ຫົວໜ້າພະແນກສາທາລະນະສຸກແຂວງສະຫວັນນະເຂດ, ມີຕາງໜ້າຈາກບໍລິສັດລຸຍຊຽງຫົງວິສາວະກໍາເຕັກໂນໂລຊີ ແລະ ບໍລິສັດໄຊມັງກອນໄດ້ນໍາເອົາເຄື່ອງຊ່ວຍເຫຼືອມອບໃຫ້ເມືອງຊົນນະບູລີ ໂດຍໃຫ້ກຽດຕ້ອນຮັບຈາກທ່ານ ບົວຜັນ ສຸວັນນະແສງ  ຮອງເຈົ້າເມືອງຊົນນະບູລີພ້ອມຄະນະຕະຫຼອດຮອດອໍານາດການປົກຄອງ 8 ບ້ານເອກະລາດເຂົ້າຮ່ວມ.

ທ່ານ ບົວຜັນ ສຸວັນນະແສງ ໄດ້ລາຍງານສະພາບຜົນເສຍຫາຍຈາກໄພນໍ້າຖ້ວມໃນໄລຍະຜ່ານມາໂດຍໃຫ້ຮູ້ວ່າ: ໃນທົ່ວເມືອງຊົນນະບູລີມີບ້ານທີ່ຖືກນໍ້າຖ້ວມຈໍານວນທັງໝົດ 48 ບ້ານ, ມີ 7.707 ຫຼັງຄາ, ມີ 7.109 ຄອບຄົວ, ພົນລະເມືອງທັງໝົດ 34.478 ຄົນ, ຍິງ 16.807 ຄົນ, ເນື້ອທີ່ຖືກກະທົບ 10.313 ເຮັກຕາ, ເນື້ອທີ່ຖືກເສຍຫາຍ 8.250 ເຮັດຕາ, ເນື້ອທີ່ປູກພືດສໍາຮອງລະດູຝົນຖືກຖ້ວມຈໍານວນ 442,6 ເຮັກຕາ ນອກຈາກນັ້ນ, ຍັງມີບ້ານທີ່ຖືກນໍ້າຖ້ວມ 100%, ມີ 16 ບ້ານ 2.723 ຫຼັງຄາ, 3.638 ຄອບຄົວ ແລະ ວິດຖ່າຍ-ນໍ້າສ້າງຕື້ນຈໍານວນໜຶ່ງ, ມີພົນລະເມືອງ 16.832 ຄົນ, ຍິງ 9.068 ຄົນ, ເຮືອນເສຍຫາຍຖືກນໍ້າພັດມີ 16 ຫຼັງ, ນໍ້າຖ້ວມເລົ້າເຂົ້າ 2.545 ຫຼັງ, ເຂົ້າເປືອກທີ່ຖືກຈົມນໍ້າທັງໝົດ 509 ໂຕນ, ຊົນລະປະທານ 8 ແຫ່ງ, ປະເພດສັດຕາຍເປັນຕົ້ນ: ຄວາຍ 14 ໂຕ, ງົວ 47 ໂຕ, ໜູ 73 ໂຕ, ແບ້ 34 ໂຕ, ເສັ້ນທາງ, ຂົວທີ່ຖືກຖ້ວມ ແລະ ເສຍຫາຍພາຍໃນເມືອງມີ  9 ເສັ້ນຍາວ 213,9 ກີໂລແມັດ, ຂົວທີ່ຖືກເປ້ເພ 11 ແຫ່ງ, ໂຮງຮຽນທີ່ຖືກຖ້ວມມີ 35 ແຫ່ງ, ວັດທີ່ຖືກຖ້ວມມີ 12 ວັດ, ສຸກສາລາທີ່ຖືກຖ້ວມ 3 ແຫ່ງ, ໂຮງງານ, ຮ້ານຂາຍເຄື່ອງຕ່າງໆທີ່ຖືກເສຍ ຫາຍ, ໂຮງສີເຂົ້າ 33 ໂຮງ, ໂຮງງານຖ່ານຂ່າວ 1 ແຫ່ງ, ຮ້ານຂາຍເຄື່ອງ 83 ຮ້ານ, ເຕົາດິນຈີ່ 2 ໂຮງ, ໂຮງຫຼໍ່ເສົາ 3 ໂຮງ, ປໍ້ານໍ້າມັນ 1 ປໍ້, ໂຮງດິນ ບ໋ອກ 6 ໂຮງ, ລວມມູນຄ່າເສຍຫາຍທັງໝົດເກືອບ 2 ຕື້ກີບສໍາລັບການຟື້ນຟູຫຼັງນໍ້າຖ້ວມທາງເມືອງຊົນນະບູລີ ຂອງພວກເຮົາກໍ່ໄດ້ມີແຜນຟື້ນຟູໂດຍສະເພາະໄດ້ສະໜອງແນວພັນເຂົ້າໃຫ້ກັບປະຊົນບ້ານທີ່ມີຖ້າແຮງໃນການເຮັດນາແຊງ, ໄດ້ນໍາພາປະຊາຊົນສ້າງ ຂະບວນການປ້ານຝ່າຍທົດນ້ໍາເພື່ອກັກເກັບນໍ້າໄວ້ສະໜອງການຜະລິດ, ສໍາລັບວຽກງານການສຶກສາບັນດາໂຮງຮຽນທີ່ໄດ້ຮັບຜົນກະທົບແມ່ນໄດ້ຮັບການສ້ອມແປງຄືນໃໝ່ ແລະ ສາມາດເຂົ້າຮຽນໄດ້ເປັນປົກກະຕິ.

ຈາກນັ້ນ ທ່ານລັດຖະມົນຕີກະ ຊວງສາທາລະນະສຸກກໍ່ໄດ້ໃຫ້ ກຽດໂອ້ລົມພ້ອມທັງໄດ້ມອບເຄື່ອງຊ່ວຍເຫຼືອໃຫ້ກັບເມືອງຊົນນະບູລີຊຶ່ງປະກອບມີ: ເຂົ້າສານຈໍານວນ 2.000 ກິໂລ, ປຶ້ມຕໍາລາຮຽນຊັ້ນປະຖົມແຕ່ປີທີ 1 ຮອດປີທີ 5 ຈໍານວນ1.500 ຫົວ, ເຄື່ອງນຸ່ງຫົ່ມ, ຢາປົວພະຍາດຈໍານວນໜຶ່ງ ແລະ ຍັງມີເຄື່ອງອຸປະກອນການແພດ ແລະ ຕຽງນອນຄົນເຈັບອີກຈໍານວນ 20 ຕຽງ, ລວມມູນຄ່າທັງໝົດ 230 ລ້ານກີບຊຶ່ງໃຫ້ກຽດຮັບໂດຍທ່ານ ບົວຜັນ ສຸວັນ ນະແສງ, ສໍາລັບເຄື່ອງທີ່ນໍາມາມອບໃນຄັ້ງນີ້ແມ່ນໄດ້ຮັບການຊ່ວຍເຫຼືອຈາກບໍລິສັດລຸຍຊຽງຫົງວິສະວະກໍາເຕັກໂນໂລຊີ ແລະ ບໍລິສັດໄຊມັງກອນ.

ຫຼັງຈາກນັ້ນ, ທ່ານລັດຖະມົນຕີກະຊວງສາທາລະນະສຸກພ້ອມດ້ວຍຄະນະກໍ່ໄດ້ລົງຢ້ຽມຢາມຄົນເຈັບທີ່ໂຮງໝໍເມືອງຊົນນະບູລີອີກດ້ວຍ.

-----------------

ຂ່າວ: ເມືອງຊົນນະບູລີ

แชร์