ເມືອງທ່າແຕງ ສະຫຼຸບໂຄງການພັດທະນາແບບປະສົມປະສານ

  ໃນວັນທີ 20 ທັນວາ  2019 ເມືອງທ່າແຕງໄດ້ຈັດກອງປະຊຸມສະຫຼຸບການຈັດຕັ້ງປະຕິບັດໂຄງການພັດທະນາແບບປະສົມປະສານປະຈໍາປີ 2019 ແລະຜ່ານແຜນປະຈໍາປີ 2020, ຢູ່ທີ່ຫ້ອງປະຊຸມໂຮງແຮມແອນນາໂດຍການເປັນປະທານຂອງທ່ານ ສຸກັນ ຈັນສີປະເສິດ ຫົວໜ້າຫ້ອງວ່າການປົກຄອງເມືອງທ່າແຕງ, ມີ ທ່ານ ບຸນສຳ ສີສັກ ຮອງຫົວໜ້າພະແນກກະສີກຳ ແລະ ປ່າໄມ້ແຂວງເຊກອງ, ທ່ານ ນາງ ເພັດ ສະລີນ ຜູ້ອຳນວຍການອົງການ GLAD( ສະມາຄົມເຢຍລະມັນ-ລາວເພື່ອການພັດທະນາ ຫຼື ສະມາຄົມເພື່ອການພັດທະນາບ້ານແບບປະສົມປະສານ) ພ້ອມດ້ວຍພາກສ່ວນກ່ຽວຂ້ອງຂັ້ນແຂວງ ແລະ 3 ເມືອງເຂົ້າຮ່ວມ.

ທ່ານ ປັນຍາ ໄຊສົງຄາມ ຜູ້ປະສານງານໂຄງການພັດທະນາແບບປະສົມປະສານເມືອງທ່າແຕງກ່າວ ວ່າ: ໂຄງການພັດທະນາແບບປະສົມປະສານແມ່ນໂຄງການໜຶ່ງ ທີ່ຈັດຕັ້ງປະຕິບັດກິດຈະກຳຢູ່ 3 ເມືອງຂອງແຂວງເຊກອງຄື: ເມືອງທ່າແຕງ, ດາກຈຶງ ແລະ ເມືອງກະລຶມ,  ໂຄງການດັ່ງກ່າວແມ່ນຄວາມອາດສາມາດຂອງ GLAD (ສະມາຄົມເຢຍລະມັນ-ລາວ ເພື່ອການພັດທະນາ ຫຼື ສະມາຄົມເພື່ອການພັດທະນາບ້ານແບບປະສົມປະສານ )  ທາງດ້ານການວາງແຜນ, ການຈັດຕັ້ງປະຕິບັດການຕິດຕາມຊຸກຍູ້ ແລະ ປະເມີນຜົນບັນດາໂຄງການພັດທະນາ ແລະ ພາລະບົດບາດຂອງ GLAD                      (ສະມາຄົມເຢຍລະມັນ-ລາວເພື່ອການພັດທະນາ ຫຼື ສະມາຄົມເພື່ອການພັດທະນາບ້ານແບບປະສົມປະສານ) ໃຫ້ເປັນອົງການຈັດຕັ້ງປະຕິບັດຢ່າງເປັນເອກະລາດເພື່ອຈັດຕັ້ງປະຕິບັດບັນດາກິດຈະກໍາຕ່າງໆເປັນໄລຍະ 4 ປີ, ແຕ່ປີ 2018-2021, ໂດຍມີທຶນສະໜັບສະໜູນທັງໝົດ 6,86 ແສນເອີໂຣ ຫຼື ເທົ່າກັບ 6,17 ຕື້ກີບ ທັງນີ້ກໍເພື່ອຄໍາປະກັນສະບຽງອາຫານໃຫ້ປະຊາຊົນມີອາຫານທີ່ຫຼາກຫຼາຍພຽງພໍຕໍ່ກັບການບໍລິໂພກ ແລະ ຂາຍເປັນສິນຄ້າ, ເພື່ອພັດທະນາ ຊຸມຊົນໃນທຸກດ້ານໃຫ້ມີຄວາມເຂັ້ມແຂງເປັນຕົ້ນແມ່ນ: ລາຍຮັບຂອງຄອບຄົວ, ສ້າງທຸລະກິດຂະໜາດນ້ອຍທາງດ້ານກະສີກຳທີ່ຂາຍໄດ້ໃນການລ້ຽງສັດ ແລະ ປູກພືດສະເພາະດ້ານ, ສ້າງການນໍາໃຊ້ພື້ນນຖານໂຄງລ່າງແບບລວມໝູ່ທີ່ປະກອບສ່ວນເປັນຄວາມຕ້ອງການພື້ນຖານຂອງບ້ານ ແລະ ອື່ນໆ.

ໃນໄລຍະ 1 ປີ ໂຄງການດັ່ງກ່າວສາມາດຈັດຕັ້ງປະຕິບັດໄດ້ຫຼາຍກິດຈະກໍາສໍາເລັດໂດຍພື້ນຖານ, ໂດຍເລັງໃສ່ 35 ບ້ານເປົ້າໝາຍຂອງ 3 ເມືອງຄື: ເມືອງທ່າ ແຕງ 10 ບ້ານ, ດາກຈຶງ 20 ບ້ານ, ກະລືມ 5 ບ້ານ, ຝຶກອົບຮົມຜູ້ປະສານງານຂັ້ນເມືອງ ແລະ ພະນັກງານຊ່ວຍໂຄງການຂັ້ນບ້ານ (ເຕັກນິກການລ້ຽງໝູ, ລ້ຽງແບ້, ປູກຖົ່ວດາວ), ຝຶກອົບຮົມທຸລະກິດຂະໜາດນ້ອຍ, ຝຶກອົບຮົມການລ້ຽງໝູ-ລ້ຽງແບ້ 10 ຄອບຄົວໃຫ້ແກ່ກຸ່ມເປົ້າໝາຍ, ກະກຽມປື້ມຄູ່ມືການປູກພິກໄທ, ຖົ່ວດາວ, ສົ້ມພໍດີ, ຝຶກອົບຮົມການປູກຖົ່ວດາວ 20 ຄອບຄົວ, ພິກໄທ 20 ຄອບ ຄົວ ແລະສະໜອງອຸປະກອນແບ້ 10 ຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນແຕ່ລະຄົວເຮືອນມີລາຍຮັບເພີ່ມຂຶ້ນເພື່ອຫຼຸດຜ່ອນການລະບາດຂອງພະຍາດສັດລ້ຽງ, ຈາກນັ້ນກອງປະຊຸມກໍໄດ້ຄົ້ນຄວ້າປະກອບຄໍາຄິດຄໍາເຫັນເພື່ອໃຫ້ແຜນການສືບຕໍ່ຈັດຕັ້ງປະຕິບັດບັນດາກິດຈະກໍາຕ່າງໆໃນຕໍ່ໜ້າມີຜົນສໍາເລັດ ແລະ ມີປະສິດທິຜົນດີຂຶ້ນກວ່າເກົ່າ

------------------

ຂ່າວ: ລັດຕະນາ ຄຳສົມພູ  

แชร์