ລ້ຽງສັດຂາຍເປັນສິນຄ້າສາມາດສ້າງລາຍຮັບໄດ້ 200 ລ້ານກວ່າກີບຕໍ່ປີ

   ທ່ານ ທອງສະຫວັດ ຊົງລາຍງານກ່ຽວກັບການສ້າງເສດຖະກິດຄອບຄົວຂອງຕົນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງງາ ຄັ້ງທີ XI ໃຫ້ຮູ້ວ່າ: ປະຈຸບັນແມ່ນຢູ່ບ້ານຫ້ວຍສະຫຼາກເມືອງງາ ແຂວງອຸດົມໄຊ, ພາຍໃນຄອບຄົວມີສະມາຊິກທັງໝົດ 12 ຄົນ, ຍິງ 5 ຄົນ, ແຮງງານຕົ້ນຕໍ່ 2 ຄົນ, ຍິງ 1 ຄົນ, ອາຊີບຕົ້ນຕໍແມ່ນໄດ້ຢຶດຖືເອົາກິດຈະກໍາລ້ຽງງົວ, ນອກນີ້ຍັງໄດ້ລ້ຽງແບ້, ໝູ, ເຮັດສວນສາລີ, ສວນປູກເຂົ້າ ແລະ ສວນຢາງພາລາເປັນອາຊີບສຳຮອງ.

ພາຍຫຼັງສ້າງຄອບຄົວໃນປີ 2007 ຈາກນັ້ນເປັນຕົ້ນມາ, ຄອບຄົວແມ່ນຍຶດຖືການຖ່າງປ່າເຮັດໄຮ່ເປັນອາຊີບຕົ້ນຕໍ່ ແລະ ລ້ຽງສັດເປັນອາຊີບສຳຮອງ, ຊີວິດການເປັນຢູ່ຂອງຄອບຄົວຕອນນັ້ນເຫັນວ່າມີຄວາມຫຍຸ້ງຍາກຂາດເຂີນລາຍຮັບເກັບໄດ້ໜ້ອຍບໍ່ສາມາດກຸ້ມກິນເນື່ອງຈາກມີລາຍຮັບໜ້ອຍ ແຕ່ສະມາຊິກພາຍໃນຄອບຄົວພັດຫຼາຍ, ເມື່ອພັກ-ລັດໄດ້ມີແນວທາງນະໂຍບາຍຕໍ່ກັບການແກ້ໄຂຄວາມທຸກຍາກຂອງປະຊາຊົນສອງຜົວ-ເມຍຈຶ່ງໄດ້ປຶກສາຫາລືກັນ ແລະ ຕົກລົງຫັນມາລ້ຽງສັດໃຫຍ່ໂດຍສະເພາະແມ່ນງົວເປັນອາຊີບຕົ້ນຕໍ່ເພື່ອຂາຍອອກເປັນສິນຄ້າ.

ໃນເບື່ອງຕົ້ນຄອບຄົວມີງົວພຽງ 19 ໂຕ ແລະ ລ້ຽງງົວແບບທຳມະຊາດເຫັນວ່າບໍ່ສາມາດສະໜອງຕາມຄວາມຮຽກຮ້ອງຕ້ອງການຂອງຕະຫຼາດໄດ້, ມາຮອດ ປີ 2014 ຈຶ່ງໄດ້ຕັດສິນໃຈສູ້ຊົນປູກຫຍ້າໄດ້ 8 ເຮັກຕາ ເພື່ອລ້ຽງງົວຈົນມາຮອດປີ 2019 ຈຶ່ງໄດ້ຂະຫຍາຍເນື້ອທີ່ປູກຫຍ້າໄດ້ຈຳນວນ 12 ເຮັກຕາເຮັດໃຫ້ການລ້ຽງງົວສະດວກຂຶ້ນ, ປະຈຸບັນມີງົວທັງໝົດ 78 ໂຕ, ນອກຈາກການລ້ຽງງົວແລ້ວຍັງໄດ້ລ້ຽງແບ້, ໝູ, ສວນປູກເຂົ້າ, ປູກສາລີ ແລະ ຢາງພາລາຈຳນວນໜຶ່ງຊຶ່ງມີລາຍຮັບເຂົ້າໃນຄອບປະມານ 213 ລ້ານກີບຕໍ່ປີ, ສະເລ່ຍລາຍຮັບໃສ່ຫົວຄົນໃນຄອບຄົວໄດ້ 17,75 ລ້ານກີບຄົນຕໍ່ປີ, ປະຈຸບັນຄອບຄົວທ່ານ ທອງສະຫວັດ ຊົງໄດ້ມີພື້ນຖານເສດຖະກິດດີຂຶ້ນກວ່າແຕ່ກ່ອນສາມາດຕັ້ງເຮືອນຖາວອນໄດ້ 1 ຫຼັງ, ຊື້ລົດໃຫ່ຍໄດ້ 1 ຄັນ, ລົດຊິງ1 ຄັນ, ລົດຈັກ 2 ຄັນ, ມີອຸປະກອນຮັບໃຊ້ຄອບຄົວ, ມີເງິນປິ່ນປົວສຸຂະພາບ ແລະ ມີເງິນຊຸກຍູ້ລູກຫຼານໄດ້ເຂົ້າໂຮງຮຽນທຸກຄົນ.

ທ່ານ ທອງສະຫວັດ ຊົງໃຫ້ຮູ້ອີກວ່າ: ຖ້າທຽບກັບຄວາມຮຽກຮ້ອງຕ້ອງການຂອງສັງຄົມແລ້ວເຫັນວ່າກິດຈະກຳຂອງຕົນເອງແມ່ນຍັງອ່ອນນ້ອຍ, ການສ້າງລາຍຮັບຍັງບໍ່ທັນສູງ, ເນື່ອງຈາກວ່າພື້ນຖານຄວາມຮູ້, ຄວາມສາມາດ, ເຕັກນິກທາງດ້ານວິຊາການຍັງຕໍ່າ, ທຶນຮອນບໍ່ພຽງພໍ, ມີບາງໄລຍະບໍ່ສາມາດສະໜອງງົວໃຫ້ແກ່ທ້ອງຕະຫຼາດໄດ້, ສະນັ້ນໃນຊຸມປີຕໍ່ໜ້າຈະພະຍາຍາມບຸກບຶນຂະຫຍາຍກິດຈະການອອກຕື່ມຈະພະຍາຍາມຊອກຮູ້ຮໍ່າຮຽນທາງດ້ານເຕັກນິກວິຊາການໃຫ້ແນ່ນອນຈາກນັ້ນຍັງຈະສ້າງກິດຈະກຳການລ້ຽງແບ້, ໝູເສີມຕື່ມອີກເພື່ອສ້າງລາຍຮັບໃຫ້ສູງຂຶ້ນກວ່າເກົ່າ.

------------------

ໜັງສືພີມເສດຖະກິດ-ສັງຄົມ

แชร์