ໂຮງງານປຸງແຕ່ງຊາ ແສງຄຳ ລາວລີ ໄດ້ຮັບກາໝາຍສິນຄ້າໂອດັອບ

   ວັນທີ 18 ທັນວາຜ່ານມາ, ທີ່ໂຮງງານປຸງແຕ່ງຊາ ແສງຄຳ ລາວລີ ໄດ້ຈັດໃຫ້ມີພິທີເປີດປ້າຍກາໝາຍໜຶ່ງເມືອງໜຶ່ງຜະລິດຕະພັນໂດຍເຂົ້າຮ່ວມຂອງ ທ່ານ ທອງສຸກ ເປົາສຸລີ ເຈົ້າເມືອງຜົ້ງສາລີ, ທ່ານ ທະນູຄຳ ປິດຈະວົງ ຫົວໜ້າພະແນກອຸດສາຫະກຳ ແລະ ການຄ້າແຂວງ, ມີຜູ້ຕາງໜ້າຈາກສະພາການຄ້າແຫ່ງຊາດ-ແຂວງ, ກະຊວງອຸດສາຫະກໍາ ແລະການຄ້າ, ຜູ້ອຳນວຍການໂຮງງານປຸງແຕ່ງຊາ ແສງຄຳ ລາວລີ, ບັນດາທ່ານຄະນະກຳມະການຄັດເລືອກຜະລິດຕະພັນໂອດັອບຂັ້ນ ແຂວງ-ຂັ້ນເມືອງພ້ອມດ້ວຍແຂກຖືກເຊີນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ວຽງທອງ ຕົງ ຫົວໜ້າ ຫ້ອງການອຸດສາຫະກຳ ແລະການຄ້າເມືອງໄດ້ລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດການຜະລິດສິນຄ້າໂອດັອບວ່າ: ຮອດ ປະຈຸບັນທົ່ວເມືອງຜົ້ງສາລີມີບ້ານປູກຊາ 32 ບ້ານກວມ 46,37% ຂອງຈໍານວນບ້ານທັງໝົດ, ມີເນື້ອທີ່ປູກຊາ 1,643 ເຮັກຕາ ສາມາດບັນລຸຜົນຜະລິດຊາດິບ 900 ໂຕນ ຕໍ່ປີ, ມີໂຮງງານອົບຊາປຸງແຕ່ງ ຊາ 8 ແຫ່ງ ໃນນີ້ ພາຍໃນ 3 ແຫ່ງ, ຕ່າງປະເທດ 5 ແຫ່ງ, ເຕົາຂົ້ວຊາ ທີ່ປະກອບເອກະສານດໍາເນີນວິສາຫະກິດ 27 ຫົວໜ່ວຍ, ກຸ່ມຜະລິດຊາເປັນສິນຄ້າ 2 ກຸ່ມ ສາມາດຜະລິດຊາແຫ້ງ ແລະ ຜະລິດຕະພັນຊາສໍາເລັດຮູບໄດ້ 200 ໂຕນ ຄິດເປັນມູນຄ່າ 7 ຕື້ກວ່າກີບ.

  ຍ້ອນຄວາມເອົາໃຈໃສ່ຂອງການນໍາແຂວງ, ເມືອງ ແລະ ພາກສ່ວນຕ່າງໆທີ່ກຽ່ວຂ້ອງມາຮອດປະຈຸບັນນີ້ຜະລິດຕະພັນຊາເມືອງຜົ້ງສາລີໄດ້ຮັບອະນຸຍາດກາໝາຍໂອດັອບແຫ່ງຊາດ (ໜຶ່ງເມືອງໜຶ່ງ ຜະລິດຕະພັນທີ່ເປັນເອກະລັກ) ມີ 5 ຜະລິດຕະພັນທີ່ໄດ້ກາໝາຍໂອດັອບແຫ່ງຊາດເຊັ່ນ: ຊາຂຽວຜົ້ງສາລີຂອງໂຮງງານທ່ານ ຄໍາພັນ ຈັງຕີ່ງຍົງ,ຊາບັ້ງຂອງກຸ່ມຜະລິດຊາບ້ານລຸ້ງຈີ້ງ, ຊາພຽງໂມຢາຂອງກຸ່ມຜະລິດຊາບ້ານບໍ່ກົ້ງ, ຊາພະຍາສີຂອງໂຮງງານຊາສົມນຶກລາວຖັງ ແລະໂຮງງານແສງຄໍາ ລາວລີ ອັນນີ້ແມ່ນໝາກຜົນແຫ່ງການນໍາພາ ແລະ ຈັດຕັ້ງປະຕິບັດການພັດທະນາສິນຄ້າ.

  ຈາກນັ້ນທ່ານ ຈະເລີນ ສຸນີຈັນ ຫົວໜ້າພະແນກສົງເສີມຕະຫຼາດຕ່າງໜ້າກົມສົ່ງເສີມການຄ້າກະຊວງອຸກສາຫະກຳ ແລະການຄ້າກໍໄດ້ຂຶ້ນມອບໃບອະນຸຍາດນໍາໃຊ້ກາໝາຍ ໜຶ່ງເມືອງໜຶ່ງຜະລິດຕະພັນແຫ່ງຊາດໃຫ້ກັບໂຮງງານປຸງແຕ່ງຊາ ແສງຄຳ ລາວລີ ປະເພດຜະລິດຕະພັນເຄື່ອງດື່ມຂຶ້ນຮັບໂດຍແມ່ນທ່ານ ແສງຄຳ ລາວ ລີ ຜູ້ອຳນວຍການໂຮງງານປຸງແຕ່ງຊາ ແສງຄຳ ລາວລີ.

__________

ຂຽນໂດຍ: ແສງຄຳ ສາລີວັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์